കുന്നത്തുനാട് മണ്ഡലത്തിലെ പൊതു വിദ്യാലയങ്ങളെ മികവിൻ്റെ കേന്ദ്രങ്ങളാക്കി മാറ്റുമെന്ന് പി.വി.ശ്രീനിജിൻ എം.എൽ.എ. പറഞ്ഞു. വലമ്പൂർ ഗവ.യു പി.സ്കൂളിൽ വർണ്ണക്കൂടാരം പദ്ധതിയുടെ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം. പാഠ്യ-പാഠ്യേതര രംഗത്ത് വിദ്യാർത്ഥികളുടെ മികവ് വർധിപ്പിക്കുന്നതിനാണ് വിദ്യാഭ്യാസ മേഖലയിൽ പദ്ധതി നടപ്പാക്കുന്നതെന്ന് അദ്ദേഹം പറഞ്ഞു.

പൊതുവിദ്യാഭ്യാസ കേന്ദ്രങ്ങളെ മികവിൻ്റെ കേന്ദ്രങ്ങളാക്കി മാറ്റുന്നതിനായി പ്രീ പ്രൈമറി തലത്തിൽ സർക്കാർ നടപ്പാക്കുന്ന പദ്ധതിയാണ് വർണ്ണക്കൂടാരം. സമഗ്രശിക്ഷ കേരളയുടെ പത്തു ലക്ഷം രൂപ ഉപയോഗിച്ചാണ് പദ്ധതി നടപ്പാക്കുന്നത്. പഠനത്തിനോടൊപ്പം കുട്ടികളുടെ കലാകായിക മികവുകള്‍ പ്രോത്സാഹിപ്പിക്കുക, സര്‍ഗശേഷി വര്‍ധിപ്പിക്കുക, ഭാഷ, ശാസ്ത്രം തുടങ്ങിയ മേഖലയിലുള്ള അറിവ് വര്‍ധിപ്പിക്കുക എന്നീ ലക്ഷ്യത്തോടെയുള്ള പ്രവര്‍ത്തനങ്ങളാണ് വര്‍ണ്ണക്കൂടാരം പദ്ധതിയുടെ ഭാഗമായി സ്‌കൂളില്‍ നടപ്പിലാക്കുന്നത്.

പദ്ധതിയുടെ ഭാഗമായി സ്റ്റാർസ് പാർക്കും ക്ലാസ് സജ്ജീകരണങ്ങളും പ്രവർത്തന ഇടങ്ങളും കുട്ടികൾക്കായി ഒരുക്കിയിരിക്കുന്നു. ചടങ്ങിൽ ബ്ലോക്ക് പഞ്ചായത്ത് അംഗം ശ്രീജ അശോകൻ അധ്യക്ഷത വഹിച്ചു. സമഗ്ര ശിക്ഷാ കേരള ജില്ല പ്രൊജക്ട് കോ-ഓഡിനേറ്റർ ബിനോയി.കെ.ജോസഫ് പദ്ധതി വിശദീകരിച്ചു.

ഗ്രാമപഞ്ചായത്തംഗം ജോർജ് ഇടപ്പരത്തി, എ.ഇ.ഒ. ടി.ശ്രീകല, സമഗ്ര ശിക്ഷാ കേരള ബ്ലോക് പ്രോഗ്രാം കോ-ഓഡിനേറ്റർ ഡാൽമിയ തങ്കപ്പൻ, ഹെഡ്മാസ്റ്റർ ടി.പി പത്രോസ്, സ്റ്റാഫ് സെക്രട്ടറി എസ്.ആശാ മോൾ , പി.ടി.എ പ്രസിഡൻ്റ് എം. എം. ഷെമീർ, എസ്.എം.സി. ചെയർമാൻ വി.ആർ.രാഗേഷ്, ഇ.കെ.ബാലകൃഷ്ണൻ നായർ, തമ്പി ഗണേശൻ തുടങ്ങിയവർ പങ്കെടുത്തു.