കോട്ടയം ചിങ്ങവനം പരുത്തുംപാറ മൂലംകുളത്ത് യുവതിയ്ക്കു നേരെ പൊതുസ്ഥലത്ത് നഗ്നതാപ്രദർശനം നടത്തുകയും സ്വയംഭോഗം ചെയ്യുകയും ചെയ്ത യുവാവിനെ ക്യാമറയിൽ കുടുക്കിയ യുവതി ഹീറോയായി. ഞായറാഴ്ച വൈകുന്നേരത്തോടെ ചിങ്ങവനം പരുത്തുംപാറ മൂലംകുളത്തായിരുന്നു സംഭവം. ചിങ്ങവനം സ്വദേശിനിയായ യുവതിയ്ക്കു നേരെയാണ് യുവാവ് നഗ്നതാപ്രദർശനം നടത്തുകയും, സ്വയംഭോഗം ചെയ്യുകയും ചെയ്തത്.

പരസ്യമായി ബൈക്കിലിരുന്നായിരുന്നു യുവാവിന്റെ അതിക്രമം. യുവാവ് കാട്ടിയ അതിക്രമം വീഡിയോയിൽ പകർത്തിയ യുവതി ക്ഷുഭിതയായി പ്രതികരിക്കുകയും ചെയ്തു. ബൈക്കിന്റെ നമ്പർ പ്ലേറ്റ് രണ്ടും സ്റ്റിക്കർ ഉപയോഗിച്ച് മറച്ചാണ് യുവാവ് എത്തിയത്. ഇയാളെ പൊലീസ് കസ്റ്റഡിയിൽ എടുത്തു. ബന്ധുവിന്റെ വീട്ടിൽ പോകുന്നതിനായാണ് ചിങ്ങവനം മൂലംകുളത്തേയ്ക്ക് യുവതി എത്തിയത്. ഈ വീട്ടിലേയ്ക്കുള്ള ഇടവഴിയിൽ യുവതി വരുന്നത് ദൂരെ നിന്നു കണ്ട യുവാവ് ആദ്യം നഗ്നതാ പ്രദർശനം നടത്തുകയും, യുവതി അടുത്തെത്തിയതോടെ സ്വയംഭോഗം ചെയ്യുകയുമായിരുന്നു.

ഇത് കണ്ടതോടെ ഭയന്നെങ്കിലും, മനസാന്നിധ്യം കൈവിടാതിരുന്ന യുവതി ഇയാളുടെ ദൃശ്യം മൊബൈൽ ക്യാമറയിൽ പകർത്തി. തുടർന്ന്, ഇയാളുടെ അടുത്തെത്തി ക്ഷുഭിതയായി. ഇതോടെ ഇയാൾ ബൈക്ക് സ്റ്റാർട്ട് ചെയ്ത് അതിവേഗം ഓടിച്ചു പോയി. സംഭവം ബന്ധുക്കളെ കാട്ടിയ യുവതി ചിങ്ങവനം പൊലീസിൽ പരാതിയും നൽകി.

തുടർന്ന്, ബന്ധുക്കൾ നടത്തിയ അന്വേഷണത്തിൽ ബൈക്കിന്റെ മോഡൽ കണ്ടെത്തുകയും പ്രതിയെ തിരിച്ചറിയുകയുമായിരുന്നു. തുടർന്ന്, ഈ വിവരങ്ങളുടെ അടിസ്ഥാനത്തിൽ ചിങ്ങവനം പൊലീസ് സംഘം പ്രതിയെ കസ്റ്റഡിയിൽ എടുത്തു. ഇയാളെ ചോദ്യം ചെയ്തു വരികയാണ് എന്നു പൊലീസ് സംഘം അറിയിച്ചു. ഇയാളുടെ അറസ്റ്റ് ഉടൻ ഉണ്ടാകും. സംഭവത്തിൽ യുവതിയുടെ മൊഴി രേഖപ്പെടുത്തി പൊലീസ് കേസെടുത്തിട്ടുണ്ട്.