ഇതുപോലൊരു നാണക്കേട് ഏറ്റുവാങ്ങിയ സംഭവം അടുത്ത കാലത്തെങ്ങുമുണ്ടായില്ല. ആരുമറിയാതെ തലസ്ഥാനം മാറ്റാന്‍ ശ്രമിച്ച ഹൈബി ഈഡനെ കോണ്‍ഗ്രസ് നേതാക്കള്‍ പോലും വിമര്‍ശിച്ചു. അതിനിടെ ന്യായീകരിച്ച് ഹൈബി ഈഡന്‍ രംഗത്തെത്തി. പൊതുജനങ്ങളില്‍ നിന്ന് തനിക്ക് ലഭിച്ച നിര്‍ദ്ദേശങ്ങളുടെ അടിസ്ഥാനത്തിലാണ് കൊച്ചി തലസ്ഥാന ആവശ്യം ഉന്നയിച്ചതെന്ന് ഹൈബി ഈഡന്‍ എംപി.

വികസന വിഷയങ്ങളില്‍ അഭിപ്രായം പറയുന്നവര്‍ ഇക്കാര്യം ആവശ്യപ്പെടാറുണ്ട്. അതിന്റെ അടിസ്ഥാനത്തിലാണ് സ്വകാര്യ ബില്ലെന്നും ഹൈബി ഈഡന്‍ പറഞ്ഞു. ഫേസ്ബുക്ക് പോസ്റ്റിലൂടെയാണ് വിമര്‍ശനങ്ങള്‍ക്കുള്ള മറുപടിയുമായി ഹൈബി രംഗത്തെത്തിയത്. വിയോജിപ്പ് അറിയിക്കുന്നവരുടെ അഭിപ്രായത്തെ മാനിക്കുന്നു.

ആവശ്യത്തെ നിരാകരിക്കാനോ അംഗീകരിക്കാനോ ഇനി അവശേഷിക്കുന്നത് പാര്‍ലമെന്റിന്റെ നടപടികള്‍ പ്രകാരമുള്ള തീരുമാനമാണ്. ഇക്കാര്യം ഏതെങ്കിലും സ്ഥലത്തിനോ അവിടുത്തെ നാട്ടുകാര്‍ക്കോ എതിരല്ല. സ്വന്തം നാടിന്റെ വികസന താല്പര്യങ്ങള്‍ സംരക്ഷിക്കുന്നതിന് മറ്റൊരു നാടിനെയും അവിടുത്തെ ജനങ്ങളെയും ശത്രുവായി കാണേണ്ടതില്ല. സ്വകാര്യ ബില്ലിന് പാര്‍ട്ടിയുടെ അനുവാദം വാങ്ങണമെന്ന വ്യവസ്ഥ കോണ്‍ഗ്രസ് പാര്‍ലമെന്ററി പാര്‍ട്ടിയില്‍ ഉണ്ടായിരുന്നില്ല.

രണ്ടു സഭകളിലും അംഗമായി പ്രവര്‍ത്തിച്ചിരുന്ന തനിക്ക് ഇക്കാര്യം ബോദ്ധ്യമുള്ളതാണ്. അതിനാലാണ് സംഘടനാപരമായി ഒരു അനുവാദം ചോദിക്കാതെ തന്നെ ഈ ബില്‍ ലോക്‌സഭയില്‍ സമര്‍പ്പിച്ചതെന്ന് ഹൈബി ഈഡന്‍ പറയുന്നു.

പുതിയ സാഹചര്യത്തില്‍ സ്വകാര്യ ബില്ലുകള്‍ അവതരിപ്പിക്കുന്നതിന് മുന്‍പ് അനുവാദം വാങ്ങണമെന്ന പാര്‍ട്ടി നിര്‍ദേശം അനുസരിക്കാന്‍ ഒരു മടിയുമില്ലെന്ന് ഹൈബി ഈഡന്‍ പറയുന്നു. തന്റെ നിലപാട് പാര്‍ട്ടിക്കൊപ്പമാണെന്നും ഹൈബി കൂട്ടിച്ചേര്‍ത്തു. തലസ്ഥാന വിവാദത്തില്‍ ഇടപെട്ട് കോണ്‍ഗ്രസ് രംഗത്തെത്തിയിരുന്നു. സ്വകാര്യ ബില്ലുകളും പ്രമേയങ്ങളും പാര്‍ട്ടി അറിയണമെന്ന് എംപിമാര്‍ക്ക് കോണ്‍ഗ്രസ് നിര്‍ദ്ദേശം നല്‍കുകയായിരുന്നു. കെ സി വേണുഗോപാലാണ് നിര്‍ദ്ദേശം നല്‍കിയത്.

ഹൈബി ഈഡന്റെ ബില്‍ വിവാദമായ പശ്ചാത്തലത്തിലാണ് കോണ്‍ഗ്രസ് ഇടപെടല്‍ നടത്തിയിരിക്കുന്നത്. കേരളത്തിന്റെ തലസ്ഥാനം തിരുവനന്തപുരത്ത് നിന്നും കൊച്ചിയിലേക്ക് മാറ്റണമെന്ന ഹൈബി ഈഡന്‍ എംപിയുടെ സ്വകാര്യ ബില്ലിലെ ആവശ്യത്തിനെതിരെ കെ.മുരളീധരന്‍ എംപി രംഗത്ത് എത്തിയിരുന്നു. ഹൈബി ഈഡന്‍ പാര്‍ട്ടിയോട് ചോദിക്കാതെ ബില്‍ അവതരിപ്പിച്ചത് തെറ്റാണ്. തലസ്ഥാനം തിരുവനന്തപുരത്ത് തന്നെ തുടരണം. എല്ലാ എം.പി.മാരും അവരവരുടെ മണ്ഡലങ്ങളിലേക്ക് തലസ്ഥാനം ആവശ്യപെട്ടാല്‍ എന്താവും സ്ഥിതി? വടകരയില്‍ തലസ്ഥാനം വേണമെന്ന് പറഞ്ഞാല്‍ എന്താവും അവസ്ഥയെന്നും മുരളീധരന്‍ ചോദിച്ചിരുന്നു. തുടര്‍ന്ന് ദിവസങ്ങള്‍ക്കു ശേഷമാണ് പ്രതികരണവുമായി ഹൈബി ഈഡന്‍ രംഗത്തെത്തിയിരിക്കുന്നത്.

അതേസമയം കേരളത്തിന്റെ തലസ്ഥാനം തിരുവനന്തപുരത്ത് നിന്ന് എറണാകുളത്തേക്ക് മാറ്റണമെന്ന ഹൈബി ഈഡന്‍ എംപിയുടെ ആവശ്യം നിരുത്തരവാദപരവും സങ്കുചിതവും തുഗ്ലക് മാതൃകയുമാണെന്നു ട്രിവാന്‍ഡ്രം ചേംബര്‍ ഓഫ് കൊമേഴ്സ് ആന്‍ഡ് ഇന്‍ഡസ്ട്രി (ടിസിസിഐ) വിമര്‍ശിച്ചു. തിരുവനന്തപുരത്ത് നിന്ന് സ്ഥാപനങ്ങളും പദ്ധതികളും ഹൈജാക്ക് ചെയ്യാന്‍ മധ്യകേരളത്തിലെ ഒരു ലോബിയുടെ ഹിഡന്‍ അജണ്ടയുണ്ടെന്ന വര്‍ഷങ്ങളായുള്ള ടിസിസിഐ നിലപാട് ശരിവയ്ക്കുന്നതാണ് അദ്ദേഹത്തിന്റെ നീക്കമെന്നും ടിസിസിഐ ചൂണ്ടിക്കാണിച്ചു.

തിരുവിതാംകൂര്‍ കാലഘട്ടം മുതല്‍ തന്നെ ഭരണപരമായ പ്രവര്‍ത്തനങ്ങള്‍ക്ക് അനുയോജ്യമായ രീതിയില്‍ തിരുവനന്തപുരത്തെ വികസിപ്പിച്ചതാണെന്നും ആ സംവിധാനങ്ങള്‍ മികച്ച രീതിയില്‍ ഇന്നും നിലനില്‍ക്കുന്നുണ്ടെന്നും ടിസിസിഐ പ്രസിഡന്റ് എസ് എന്‍ രഘുചന്ദ്രന്‍ നായര്‍ പറഞ്ഞു. സ്വാതന്ത്ര്യലബ്ദിക്ക് ശേഷം തിരു-കൊച്ചി സംസ്ഥാനത്തിന്റെ തലസ്ഥാനമായി തിരുവനന്തപുരം മാറിയതും സംസ്ഥാനങ്ങളുടെ പുനഃസംഘടനാ നിയമം പാസ്സായതോടെ കേരളത്തിന്റെ തലസ്ഥാനം ആയതുമായ വലിയ ചരിത്രം ഓര്‍ക്കണമെന്നും അദ്ദേഹം പറഞ്ഞു.