ചങ്കിടിപ്പിന്റെ നിമിഷങ്ങള്... ലോക്സഭാ തെരഞ്ഞെടുപ്പിന് ഒരു വര്ഷം ശേഷിക്കേ സിപിഎമ്മിന്റെ നീക്കം കോണ്ഗ്രസിന് ആപത്ത്; സമസ്ത സെമിനാറില് പങ്കെടുക്കുമെന്ന് പറഞ്ഞതിന് പിന്നാലെ മുസ്ലീം ലീഗിനും ചാഞ്ചാട്ടം; ലീഗ് നേതാക്കള് രണ്ട് തട്ടില്; പാണക്കാട് ഇന്ന് അന്തിമ തീരുമാനമുണ്ടാകും
സംസ്ഥാനത്ത് ഇന്നത്തെ ദിവസം ഏറെ നിര്ണായകമാണ്. ഏക സിവില് കോഡില് സിപിഎം സംഘടിപ്പിക്കുന്ന സെമിനാറില് പങ്കെടുക്കണമോ എന്ന് ലീഗ് ഇന്ന് തീരുമാനിക്കും. സുധാകരനും സതീശനും സര്ക്കാരിനെതിരെ ആഞ്ഞടിച്ചു കൊണ്ടിരുന്ന ഘട്ടത്തിലാണ് കേസില് പെട്ടത്. ഇതോടെ പ്രതിരോധത്തിലായ കോണ്ഗ്രസ് ഇപ്പോഴിതാ സിവില് കോഡിലും പെട്ടിരിക്കുകയാണ്.
യുഡിഎഫിന്റെ കോട്ടയായ മുസ്ലീം ലീഗിനെ പൊളിക്കുമോ എന്നാണ് സകലരും ഉറ്റുനോക്കുന്നത്. സമസ്തയ്ക്ക് പിന്നാലെ മുസ്ലീം ലീഗും സെമിനാറില് പങ്കെടുത്താല് തീര്ന്നു. അത് എല്ഡിഎഫിന് വലിയ നേട്ടമാകും.
സെമിനാറില് പങ്കെടുക്കുന്നതുമായി ബന്ധപ്പെട്ട് നേതാക്കള്ക്കിടയില് കടുത്ത അഭിപ്രായവ്യത്യാസങ്ങള് ഉയര്ന്നിരുന്നു. മുസ്ലിം ലീഗിനെ ചേര്ത്തുപിടിക്കാനുള്ള സിപിഎം തന്ത്രത്തില് വീഴേണ്ടതില്ലെന്നാണ് ലീഗിലെ ഒരു വിഭാഗത്തിന്റെ അഭിപ്രായം.
ഇന്ന് പാണക്കാട് ചേരുന്ന അടിയന്തര യോഗം സെമിനാറില് പങ്കെടുക്കുന്നത് സംബന്ധിച്ച് തീരുമാനമെടുക്കും. രാവിലെ 9.30 തിന് പാണക്കാടാണ് യോഗം. സിപിഎം സെമിനാറില് പങ്കെടുക്കാനുള്ള സമസ്തയുടെ തീരുമാനവും ലീഗിനെ സമ്മര്ദ്ദത്തില് ആക്കിയിരുന്നു. ഇതും യോഗം ചര്ച്ച ചെയ്യും. സിവില് കോഡിനെതിരെ സ്വീകരിക്കേണ്ട രാഷ്ട്രീയ നിയമ തുടര് നടപടികളും യോഗത്തില് ചര്ച്ചയാകും. സിപിഎമ്മുമായി സഹകരിക്കുമെന്നും സെമിനാറില് പങ്കെടുക്കുമെന്നും സമസ്ത അധ്യക്ഷന് ജിഫ്രി മുത്തുക്കോയ തങ്ങള് ഇന്നല പറഞ്ഞിരുന്നു.
ഏക സിവില് കോഡില് സമസ്ത പ്രധാനമന്ത്രിക്ക് നിവേദനം നല്കും. ശേഷം എന്ത് വേണമെന്ന് തീരുമാനിക്കും. കേരളത്തില് ഈ വിഷയത്തില് ആര് നല്ല പ്രവര്ത്തനം നടത്തിയാലും അവര്ക്കൊപ്പം നില്ക്കും. ഏത് രാഷ്ട്രീയ പാര്ട്ടികള്ക്കൊപ്പവും നില്ക്കും. പൗരത്വ വിഷയത്തില് സഹകരിച്ചത് പോലെ കമ്മ്യൂണിസ്റ്റ് പാര്ട്ടിക്കൊപ്പവും നില്ക്കുമെന്നും ജിഫ്രി തങ്ങള് പറഞ്ഞു. മതത്തിന്റെ അടിസ്ഥാനത്തില് അല്ല, പാരസ്പര്യത്തിന്റെ അടിസ്ഥാനത്തിലാണ് രാജ്യം നിലനില്ക്കുന്നത്.
ഈ ലക്ഷ്യം വച്ച് പുലര്ത്തുന്ന ആരുമായും സഹകരിക്കുമെന്നാണ് സമസ്തയുടെ നിലപാട്. രാജ്യത്തിന്റെ നന്മകള്ക്ക് എതിരായ ചരിത്രം മുസ്ലിം സമുദായത്തിനില്ല. വികാരപരമായ എടുത്ത് ചാട്ടമല്ല വേണ്ടത്. ഓരോ മതസ്ഥര്ക്കും അവരുടെ ആചാരപ്രകാരം ജീവിക്കാന് ഭരണ ഘടന സ്വാതന്ത്ര്യം നല്കുന്നുണ്ട്. മതം അനുശാസിക്കുന്ന മത നിയമങ്ങള് പാലിക്കപ്പെടണമെന്നും ജിഫ്രി തങ്ങള് കൂട്ടിച്ചേര്ത്തു.
അതേസമയം ഏക സിവില് കോഡ് നടപ്പാക്കുന്നതിലെ ആശങ്കകള് അറിയിച്ച് ഇന്ത്യന് ഗ്രാന്ഡ് മുഫ്തി കാന്തപുരം എപി അബൂബക്കര് മുസ്ലിയാര് പ്രധാന മന്ത്രി, ആഭ്യന്തര മന്ത്രി, നിയമ മന്ത്രി, നിയമ കമ്മീഷന് എന്നിവര്ക്ക് നിവേദനം നല്കി. ഇന്ത്യയുടെ പ്രധാന സവിശേഷതയായ ബഹുസംസ്കാരവും വൈവിധ്യങ്ങളും ഇല്ലായ്മ ചെയ്യുന്നതിലേക്കും രാജ്യത്ത് അരക്ഷിതാവസ്ഥ സൃഷ്ടിക്കുന്നതിലേക്കും ഏകീകൃത സിവില് കോഡ് വഴിവെക്കുമെന്നും ഈ വിഷയത്തില് കേന്ദ്രസര്ക്കാര് പുനരാലോചന നടത്തണമെന്നും കാന്തപുരം നിവേദനത്തില് ആവശ്യപ്പെട്ടു.
സാംസ്കാരികവും മതപരവുമായ വൈവിധ്യങ്ങള് നിലനില്ക്കെ തന്നെയാണ് ഇന്ത്യ ഇന്ന് കാണുന്ന പ്രതാപവും വികസനവും കൈവരിച്ചത്. രാജ്യ പുരോഗതിയെ ഈ വൈവിധ്യങ്ങള് ഹനിക്കുന്നില്ലെന്നും മതേതര ജനാധിപത്യ രാജ്യത്ത് ഭൂരിപക്ഷ-ന്യൂനപക്ഷ വേര്തിരിവില്ലാതെ എല്ലാ വിഭാഗങ്ങളെയും സര്ക്കാര് ഒരുപോലെ പരിഗണിക്കേണ്ടതുണ്ടെന്നും കത്തില് സൂചിപ്പിച്ചു. ഏകീകൃത സിവില് കോഡ് ഏതെങ്കിലും ഒരു വിഭാഗത്തെ മാത്രം ബാധിക്കുന്ന പ്രശ്നമല്ലെന്നും ബഹുസ്വര സമൂഹത്തിന് ഭരണഘടന നല്കുന്ന അവകാശങ്ങളുടെ നിഷേധമാണ് അതെന്നും നേരത്തെ കാന്തപുരം അഭിപ്രായപ്പെട്ടിരുന്നു.
"
https://www.facebook.com/Malayalivartha
