ഇത്തവണ ഓണക്കിറ്റ് അന്ത്യോദയ അന്ന യോജന (എ.എ.വൈ- മഞ്ഞ) കാര്‍ഡുടമകള്‍ക്കും ക്ഷേമസ്ഥാപനങ്ങളിലെ അന്തേവാസികള്‍ക്കും മാത്രം. തുണിസഞ്ചിയടക്കം 14 ഉത്പന്നങ്ങളുണ്ടാകും. ഗുരുതര സാമ്പത്തികപ്രതിസന്ധിയുടെ പശ്ചാത്തലത്തിലാണ് ഇന്നലെ ചേര്‍ന്ന മന്ത്രിസഭായോഗം ഈ തീരുമാനം കൈക്കൊണ്ടത്.

സംസ്ഥാനത്തെ 93 ലക്ഷം റേഷന്‍ കാര്‍ഡുടമകളില്‍ 5.88 ലക്ഷം (5,87,691 പേര്‍) വരുന്ന എ.എ.വൈ കാര്‍ഡുടമകള്‍ക്കും വിവിധ ക്ഷേമസ്ഥാപനങ്ങളിലായുള്ള 20,000 താമസക്കാര്‍ക്കുമാണ് സൗജന്യ കിറ്റ് ലഭിക്കുക. മൊത്തം 6,07,691 കിറ്രുകള്‍ വിതരണം ചെയ്യും.

കിറ്റ് വിതരണത്തിനായി 32 കോടി രൂപ മുന്‍കൂറായി സപ്ലൈകോയ്ക്ക് അനുവദിക്കും. റേഷന്‍കടകള്‍ മുഖേനയായിരിക്കും കിറ്റ് വിതരണം.
കഴിഞ്ഞ വര്‍ഷം 13 ഇനങ്ങളടങ്ങിയ ഓണക്കിറ്റ് സംസ്ഥാനത്തെ നീല, വെള്ള റേഷന്‍ കാര്‍ഡുടമകള്‍ക്ക് ഉള്‍പ്പെടെ വിതരണം ചെയ്തിട്ടുണ്ടായിരുന്നു. ഇക്കുറി ഇനങ്ങളില്‍ വ്യത്യാസമുണ്ട്.

ഓണക്കിറ്റും സാധനങ്ങളുടെ അളവും

1. തേയില (ശബരി) 100 ഗ്രാം
2. ചെറുപയര്‍ പരിപ്പ് 250 ഗ്രാം
3. സേമിയ പായസം മിക്‌സ് (മില്‍മ) 50 ഗ്രാം
4. നെയ്യ് (മില്‍മ) 50 മില്ലി
5. കശുഅണ്ടി പരിപ്പ് 50 ഗ്രാം
6. വെളിച്ചെണ്ണ (ശബരി) അര ലീറ്റര്‍
7. സാമ്പാര്‍പ്പൊടി (ശബരി) 100 ഗ്രാം
8. മുളകുപൊടി (ശബരി) 100 ഗ്രാം
9. മഞ്ഞള്‍പ്പൊടി (ശബരി) 100 ഗ്രാം
10. മല്ലിപ്പൊടി 100 ഗ്രാം
11. തുവരപ്പരിപ്പ് 250 ഗ്രാം
12. ചെറുപയര്‍ 500 ഗ്രാം
13. പൊടി ഉപ്പ് ഒരു കിലോഗ്രാം
14. തുണി സഞ്ചി ഒരെണ്ണം