ഗുണ്ടാ പിരിവ് നല്‍കാത്തതിന് സിറ്റിയിലെ ഹോട്ടല്‍ ഉടമയെ വെട്ടി കട അടിച്ചു തകര്‍ത്ത് 1.75 ലക്ഷം രൂപയുടെ നാശ നഷ്ടം വരുത്തിയെന്ന കേസില്‍ പ്രതിയായ സ്ഥിരം കുറ്റവാളി വെട്ടുകാട് സ്വദേശി മുഹമ്മദ് നൗഫലിന് ജാമ്യമില്ല. തലസ്ഥാന നഗരത്തില്‍ മോഷണം, വധശ്രമങ്ങളടക്കം 7 കേസുകളില്‍ പ്രതിയാണെന്ന മെഡിക്കല്‍ കോളേജ് പോലീസിന്റെ റിപ്പോര്‍ട്ട് കണക്കിലെടുത്താണ് പ്രതിക്ക് ജാമ്യം നിരസിച്ചത്.



തിരുവനന്തപുരം അഡീ.ചീഫ് ജുഡീഷ്യല്‍ മജിസ്‌ട്രേട്ട് കോടതിയുടേതാണുത്തരവ്. പ്രതി ചെയ്ത കൃത്യങ്ങള്‍ സിസിടിവി ദൃശ്യങ്ങളിലുണ്ടെന്നും ദൃശ്യങ്ങള്‍ കോടതിയില്‍ പ്രദര്‍ശിപ്പിക്കാമെന്നും പ്രോസിക്യൂഷന്‍ കോടതിയില്‍ ബോധിപ്പിച്ചു.


പ്രതിക്ക് കസ്റ്റോഡിയല്‍ വിചാരണ വേണമെന്ന് പ്രോസിക്യൂഷന്‍ എസിജെഎം എല്‍സാ കാതറിന്‍ ജോര്‍ജ് മുമ്പാകെ ആവശ്യമുന്നയിച്ചു. കുറ്റപത്രം ഉടന്‍ സമര്‍പ്പിക്കുമെന്നും പ്രതിയെ കസ്റ്റഡിയിലിട്ട് വിചാരണ ചെയ്യണമെന്നും പ്രോസിക്യൂഷന്‍ ആവശ്യപ്പെട്ടു. 2023 ഓഗസ്റ്റ് 24 ശനിയാഴ്ച രാത്രി 11 മണിക്ക് സംഭവം നടന്നത്.


പണം പിടിച്ചുപറിക്കാന്‍ വെട്ടു കത്തിയുമായി ഹോട്ടലിലെത്തിയ യുവാവ് ഉടമയെ വെട്ടിപ്പരിക്കേല്‍പ്പിച്ച ശേഷം ഹോട്ടല്‍ അടിച്ചുതകര്‍ത്തു. പട്ടം പ്ലാമൂട്ടിലെ അല്‍ഹസന്‍ റെസ്റ്റോറിന് നേരെ വ്യാഴാഴ്ച രാത്രി 11നായിരുന്നു ആക്രമണം. അറസ്റ്റ് അര്‍ദ്ധരാത്രി 12.30 നായിരുന്നു.
ഹോട്ടല്‍ ഉടമ ജസീം ക്യാഷ് കൗണ്ടറിലിരുന്ന് പണം എണ്ണിത്തിട്ടപ്പെടുത്തുന്ന സമയം കടയിലേക്ക് കയറി വന്ന നൗഫല്‍ വെട്ടുകത്തി കാണിച്ച് ഭീഷണിപ്പെടുത്തിയ ശേഷം പണം പിടിച്ചുപറിക്കാന്‍ ശ്രമിച്ചു.


500 രൂപ നൗഫല്‍ പിടിച്ചുവാങ്ങി. ജസീം തടസ്സം നിന്നതോടെ പ്രതി വെട്ടുകത്തി വീശി. ആക്രമണം തടഞ്ഞ ജസീമിന്റെ കൈയ്ക്കു പരിക്കേറ്റു. പിന്നീട് പുറത്തിറങ്ങിയ പ്രതി കടയുടെ മുന്നിലിരുന്ന പാചകത്തിന് ഉപയോഗിക്കുന്നതടക്കമുള്ള നിരവധി ഉപകരണങ്ങള്‍ അടിച്ചു തകര്‍ത്തു. 1.75 ലക്ഷം രൂപയുടെ നാഷനഷ്ടമുണ്ടായതായി പൊലീസ് റിപ്പോര്‍ട്ടില്‍ പറയുന്നു.