തലസ്ഥാനം ഇനി ആരുടെ കൈകളിലാകുമെന്ന ആലോചനയിലാണ് ജനങ്ങള്‍. തലസ്ഥാനം പിടിക്കാന്‍ കുമ്മനം തന്നെ ഇറങ്ങേണ്ടി വരുമെന്നാണ് റിപ്പോര്‍ട്ടുകള്‍. വരുന്ന നിയമസഭാ തെരഞ്ഞെടുപ്പില്‍ പ്രമുഖരായ മുഴുവന്‍ നേതാക്കളെയും മല്‍സരിപ്പിക്കാന്‍ ബി.ജെ.പി. തീരുമാനം. കോര്‍ കമ്മിറ്റിയിലെ മുഴുവന്‍ നേതാക്കന്മാരും സ്ഥാനാര്‍ഥികളാകും. തദ്ദേശ തെരഞ്ഞെടുപ്പില്‍ ഏറെ മുന്നേറ്റമുണ്ടാക്കിയ തിരുവനന്തപുരം ജില്ലയിലാകും പ്രമുഖരില്‍ പലരും മല്‍സരിക്കുക. സംസ്ഥാന അധ്യക്ഷന്‍ കുമ്മനം രാജശേഖരന്‍ തിരുവനന്തപുരം സെന്‍ട്രലിലാകും ഇറങ്ങുക. 
മുതിര്‍ന്ന നേതാവായ ഒ. രാജഗോപാലിന്റെ താല്‍പര്യമനുസരിച്ച് കുമ്മനം നേമത്തേക്കു മാറാനും സാധ്യതയുണ്ട്. മുന്‍ സംസ്ഥാന പ്രസിഡന്റ് വി. മുരളീധരന്‍ കഴക്കൂട്ടത്തു മല്‍സരിക്കുമെന്ന കാര്യത്തില്‍ തീരുമാനമായി. അവിടെ തെരഞ്ഞെടുപ്പിനുള്ള പ്രാഥമിക പ്രവര്‍ത്തനങ്ങള്‍ തുടങ്ങുകയും ചെയ്തു. സംസ്ഥാന ജനറല്‍ സെക്രട്ടറി കെ. സുരേന്ദ്രനെ വേണ്ടെന്ന നിലപാടാണ് മഞ്ചേശ്വരത്തെ പ്രാദേശിക നേതൃത്വത്തിന്റേത്. 
പകരം അന്നാട്ടുകാരായ ആരെയെങ്കിലും മതിയെന്നാണ് അവരുടെ പക്ഷം. എന്നാല്‍ കാസര്‍കോഡ് കേന്ദ്രീകരിച്ചു പ്രവര്‍ത്തിക്കാനാണു സുരേന്ദ്രന്റെ താല്‍പര്യം. സംസ്ഥാന വക്താവ് വി.വി. രാജേഷ് നെടുമങ്ങാട് മണ്ഡലത്തില്‍ മത്സരിക്കാനാണു സാധ്യത. നിയമസഭാ ഉപതെരഞ്ഞെടുപ്പിലും തദ്ദേശ തെരഞ്ഞെടുപ്പിലും നെടുമങ്ങാട്ടുണ്ടായ മുന്നേറ്റം മുതലാക്കാനാകുമെന്ന് നേതൃത്വം പ്രതീക്ഷിക്കുന്നു.

രാജേഷിനെ വട്ടിയൂര്‍ക്കാവ് മണ്ഡലത്തിലേക്കും പരിഗണിക്കുന്നുണ്ട്. കാട്ടാക്കട മണ്ഡലത്തില്‍ പി.കെ. കൃഷ്ണദാസാണു പരിഗണനയില്‍. ന്യൂനപക്ഷ വോട്ടുകള്‍ കണക്കിലെടുത്ത് കാട്ടാക്കട, പാറശാല എന്നിവിടങ്ങളില്‍ വി.എസ്.ഡി.പി. ഉള്‍പ്പെടെയുള്ള സമുദായ സംഘടനാ പ്രതിനിധികളെ സ്ഥാനാര്‍ഥികളാക്കണമെന്ന നിര്‍ദേശവും നേതൃത്വത്തിനു മുമ്പിലുണ്ട്. 

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha