ക്ഷേത്രോത്സവത്തിന്റെ വെടിക്കെട്ടിനായി എത്തിച്ച പടക്കങ്ങള് പൊട്ടിത്തെറിച്ച സ്ഥലത്തെ പോലീസ് പരിശോധനയില് കണ്ടെത്തിയത് കഞ്ചാവ്
![](https://www.malayalivartha.com/assets/coverphotos/w657/305109_1707750624.jpg)
തൃപ്പുണിത്തുറ പുതിയകാവ് ക്ഷേത്രോത്സവത്തിന്റെ വെടിക്കെട്ടിനായി എത്തിച്ച പടക്കങ്ങള് പൊട്ടിത്തെറിച്ച സ്ഥലത്തെ പോലീസ് പരിശോധനയില് കണ്ടെത്തിയത് കഞ്ചാവ്. തൃപ്പൂണിത്തുറയില് പടക്കം പൊട്ടിക്കുന്നതിന് കരാര് എടുത്തിട്ടുള്ള ശാസ്തവട്ടം സ്വദേശി ആദര്ശന്റെ ഗോഡൗണില് പോത്തന്കോട് പൊലീസിന്റെ നേതൃത്വത്തിലാണ് പരിശോധന നടന്നത്. പോത്തന്കോട് ശാസ്തവട്ടം മടവൂര്പാറയിലെ ഗോഡൗണില് നടത്തിയ പരിശോധനയില് കഞ്ചാവ് പിടികൂടി. ഗോഡൗണിന് സമീപത്തെ ആളൊഴിഞ്ഞ പുരിയിടത്തില് വലിയ ഗുണ്ടുകളും പൊലീസ് കണ്ടെത്തിയിട്ടുണ്ട്.
ഗോഡൗണിലെ പരിശോധനയ്ക്ക പുറമെ ആദര്ശ് വാടകക്കെടുത്ത കാട്ടായികോണത്തെ മറ്റൊരു വീട്ടിലും വലിയ രീതിയില് സ്ഫോടക വസ്തുക്കളുടെ ശേഖരം പൊലീസ് കണ്ടെത്തി. പൊട്ടിത്തെറി നടന്ന ഉടന് ഗോഡൗല്ണില് നിന്നും വലിയ തോതില് സാധനങ്ങള് മാറ്റിയിരുന്നതായും പൊലീസ് പറഞ്ഞു. ഇതിനിടെ, തൃപ്പൂണിത്തുറയില് പടക്ക സംഭരണശാലയിലുണ്ടായ വന് സ്ഫോടനത്തില് പൊലീസ് കേസെടുത്തു. സംഭവുമായി ബന്ധപ്പെട്ട് കേസെടുത്ത തൃപ്പൂണിത്തുറ പൊലീസ് പുതിയകാവ് അമ്പല കമ്മിറ്റി ഭാരവാഹികളായ നാലു പേരെ കസ്റ്റഡിയിലെടുത്ത് ചോദ്യം ചെയ്തുവരുകയാണ്.
പുതിയകാവ് ക്ഷേത്രോത്സവത്തിന്റെ നടത്തിപ്പുകാരായ വടക്കുംപുറം കരയോഗത്തിലെയും തെക്കുംപുറം കരയോഗത്തിലെയും അമ്പല കമ്മിറ്റി ഭാരവാഹികള്ക്കെതിരെയാണ് പൊലീസ് മനപൂര്വം അല്ലാത്ത നരഹത്യയ്ക്ക് പൊലീസ് കേസെടുത്തിരിക്കുന്നത്. പുതിയകാവ് ക്ഷേത്രോത്സവത്തിന് വെടിക്കെട്ട് നടത്തുന്നതിന് അമ്പലക്കമ്മിറ്റിക്ക് അനുമതി നല്കിയിരുന്നില്ലെന്നും അനധികൃതമായാണ് സ്ഫോടക വസ്തുക്കള് സൂക്ഷിച്ചിരുന്നതെന്നുമാണ് പൊലീസ് വ്യക്തമാക്കിയത്. വെടിക്കെട്ട് നടത്തരുതെന്ന് അമ്പല കമ്മിറ്റിക്കും പടക്ക കരാറുകാര്ക്കും നിര്ദേശം നല്കിയിരുന്നു. വെടിക്കെട്ടിന് അനുമതിയും നല്കിയിരുന്നില്ല.
അതേസമയം പടക്ക സംഭരണശാലയില് ഉണ്ടായ സ്ഫോടനത്തില് ഒരാള് മരിച്ചു. ഗുരുതരമായി പരിക്കേറ്റ വിഷ്ണു എന്നയാളാണ് മരിച്ചത്. 16 പേര്ക്ക് പരിക്കേറ്റെന്നാണ് വിവരം. പരിക്കേറ്റവരെ തൃപ്പൂണിത്തറ ജനറല് ആശുപത്രിയില് പ്രവേശിപ്പിച്ചിരിക്കുകയാണ്. ഇതില് നാല് പേരുടെ നില ഗുരുതരമാണ്. ഇവരെ മെഡിക്കല് കോളേജിലേക്ക് മാറ്റി. രാവിലെ പത്തരയോടെ പാലക്കാട്ട് നിന്നും തെക്കുംഭാഗത്തെ പടക്ക സംഭരണശാലയിലേക്ക് എത്തിച്ച പടക്കങ്ങളാണ് പൊട്ടിത്തെറിച്ചത്. ഒരു കിലോമീറ്റര് അകലെവരെ പൊട്ടിത്തറിയുടെ പ്രകമ്പനമുണ്ടായി. സമീപത്തെ 45 ഓളം വീടുകള്ക്കും കേടുപാടുകളുണ്ടായിട്ടുണ്ട്.
https://www.facebook.com/Malayalivartha