പേരാമ്പ്രയിലെ അനു കൊലക്കേസ് പ്രതി മുജീബ് റഹ്മാനെതിരെ മുത്തേരി ബലാത്സംഗക്കേസ് അതിജീവിത രംഗത്ത്. തന്നെ ബലാത്സംഗം ചെയ്ത ശേഷം പ്രതിയ്ക്ക് ശിക്ഷ ഉറപ്പാക്കിയിരുന്നെങ്കില്‍ അനു കൊല്ലപ്പെടില്ലായിരുന്നു. താന്‍ നേരിട്ടത് ക്രൂരമായ ബലാത്സംഗമായിരുന്നു. മുഖത്ത് എന്തോ മണപ്പിച്ച് ബോധം കെടുത്തിയ ശേഷമാണ് ബലാത്സംഗം ചെയ്തതെന്ന മൊഴി കുറ്റപത്രത്തില്‍ ഉണ്ടായിരുന്നില്ല.അന്ന് അതേക്കുറിച്ച് ചോദിച്ചപ്പോള്‍ അത് പറയേണ്ടെന്ന് പ്രോസിക്യൂട്ടര്‍ പറഞ്ഞു. തനിക്ക് നീതി ലഭിച്ചില്ല. മുജീബ് റഹ്മാനെ ഇനിയെങ്കിലും തൂക്കിക്കൊല്ലുകയാണ് വേണ്ടതെന്നും അതിജീവിത ആവശ്യപ്പെട്ടു. ബലാത്സംഗം, മോഷണം ഉള്‍പ്പെടെ അന്‍പതിലധികം കേസുകളില്‍ പ്രതിയാണ് മുജീബ് റഹ്മാന്‍.

2020 ജൂലൈയിലായിരുന്നു മുക്കം മുത്തേരിയില്‍ വയോധികയെ കെട്ടിയിട്ട് ബലാത്സംഗം ചെയ്ത് പണം കവര്‍ന്ന സംഭവം നടന്നത്. അന്ന് മോഷ്ടടിച്ച ഓട്ടോയിലെത്തിയ മുജീബ് റഹ്മാന്‍ ഹോട്ടല്‍ തൊഴിലാളിയായിരുന്ന വയോധികയെ വാഹനത്തില്‍ കയറ്റിക്കൊണ്ടുപോയി ആക്രമിക്കുകയായിരുന്നു. ഇവരെ കെട്ടിയിട്ട് ബലാത്സംഗം ചെയ്യുകയും പണം കവരുകയും ചെയ്തു. അന്ന് അറസ്റ്റിലായ മുജീബ് പൊലീസിനെ കബളിപ്പിച്ച് രക്ഷപ്പെട്ടു. പിന്നീട് കൂത്തുപറമ്പില്‍ വെച്ച് പിടിയിലായി. റിമാന്‍ഡില്‍ പോയ പ്രതിക്ക് വിചാരണ വൈകിയതിനാല്‍ കോടതി ജാമ്യം നല്‍കിയിരുന്നു.

ഇതിനിടെ വാളൂര്‍ സ്വദേശി അനുവിനെ മുജീബ് റഹ്മാന്‍ വെറും പത്ത് മിനിട്ടു കൊണ്ടാണ് കൊലപ്പെടുത്തി സ്ഥലംവിട്ടതെന്ന ഞെട്ടിക്കുന്ന വിവരങ്ങളും പുറത്തുവന്നു. ഈ ചെറിയ സമയം കൊണ്ട് ഇയാള്‍ അനുവിനെ ബൈക്കില്‍ കയറ്റി കൃത്യം നടത്തിയ സ്ഥലത്തെത്തി തോട്ടില്‍ തള്ളിയിട്ട് ആഭരണങ്ങള്‍ ഊരി രക്ഷപ്പെട്ടു. കൊലയ്ക്ക് മുമ്പ് ഇയാള്‍ പലതവണ പ്രദേശത്ത് കറങ്ങി. ഇതിന്റെ തെളിവ് പൊലീസിന് ലഭിച്ചിട്ടുണ്ട്. കൊലപാതകം നടത്തിയ അതേ റോഡിലാണ് സംഭവദിവസം മുജീബ് പല തവണ കടന്നുപോയത്. മോഷണം നടത്തണമെന്ന ലക്ഷ്യത്തോടെയാണ് ഇയാള്‍ ഇടറോഡിലേക്ക് കയറി നിരീക്ഷിച്ചത്. ഇതിനിടെയാണ് അനുവിനെ കാണുന്നതും കൊലപാതകം നടത്തുന്നതും.

സംഭവ ദിവസം രാവിലെ മോഷ്ടിച്ച ബൈക്കില്‍ മട്ടന്നൂരില്‍ നിന്നും പേരാമ്പ്ര വഴി മലപ്പുറത്തേക്ക് വരുകയായിരുന്ന പ്രതി. ഇയാള്‍ പ്രധാന റോഡില്‍ നിന്നും അധികമാരും സഞ്ചരിക്കാത്ത ഇട റോഡിലേക്ക് കയറി. ഈ റോഡില്‍ പലതവണ കറങ്ങി. വലിയ വാഹനങ്ങള്‍ പോകാത്തതാണ് മുളിയങ്ങള്‍- വാളൂര്‍ അമ്പലം റോഡ്. ഇവിടെ മാത്രം രാവിലെ ഒമ്പത് മണിക്ക് ശേഷം പ്രതി മൂന്ന് തവണ കറങ്ങി. ഇതിനിടെ ഭര്‍ത്താവിനെ ആശുപത്രിയില്‍ കൊണ്ടുപോകാനായി തിടുക്കത്തില്‍ നടന്നുവരുന്ന അനുവിനെ കാണുകയായിരുന്നു.

അടുത്ത ജംക്ഷനില്‍ നില്‍ക്കുന്ന ഭര്‍ത്താവിന് സമീപം എത്തിക്കാമെന്ന് പറഞ്ഞതാണ് ഇയാള്‍ അനുവിനെ ബൈക്കില്‍ കയറ്റിയത്. യുവതി ഇത് വിശ്വസിച്ച് ബൈക്കില്‍ കയറിയെങ്കിലും അല്ലിയോറയിലെത്തിയപ്പോള്‍ പ്രതി തോട്ടില്‍ തള്ളിയിട്ട് കൊലപ്പെടുത്തി സ്വര്‍ണവുമായി കടന്നുകളയുകയായിരുന്നു. കൃത്യത്തിന് ശേഷം ഹെല്‍മെറ്റ് ധരിച്ചാണ് ഇയാള്‍ സ്ഥലം വിട്ടത്. പത്ത് മണിയോടെ ഉള്ളിയേരി ഭാഗത്തേക്കാണ് ഇയാള്‍ പോയത്. സിസിടിവി ദൃശ്യങ്ങളും പ്രതിയുടെ മൊബൈല്‍ ഫോണ്‍ രേഖകളും അടക്കം ശേഖരിച്ചായിരുന്നു പൊലീസ് നീക്കം. സംഭവ സമയത്ത് ഉപയോഗിച്ചെന്ന് കരുതുന്ന പ്രതിയുടെ ബൈക്കും എടവണ്ണപ്പാറയില്‍ നിന്ന് പൊലീസ് കസ്റ്റഡിയിലെടുത്തിട്ടുണ്ട്.