ഒന്നിച്ച് നിന്ന് തെരഞ്ഞെടുപ്പിനെ നേരിട്ടിട്ടും ബിജെപിയെ അകറ്റിയ ശിവസേനയ്ക്ക് വീണ്ടും വീണ്ടും പണി വരികയാണ്. രാജ് താക്കറെയുടെ നേതൃത്വത്തിലുള്ള മഹാരാഷ്ട്ര നവനിര്‍മാണ്‍ സേനയെ ഏക്‌നാഥ് ഷിന്‍ഡെയുടെ നേതൃത്വത്തിലുള്ള ശിവസേനയില്‍ ലയിപ്പിക്കാനുള്ള നീക്കം ബിജെപി ഊര്‍ജിതമാക്കി. എന്നാല്‍, ലയനത്തെയും പുതിയ പാര്‍ട്ടിയുടെ നേതൃത്വത്തില്‍ രാജ് താക്കറെയെ അവരോധിക്കുന്നതിനെയും മുഖ്യമന്ത്രി ഷിന്‍ഡെ ശക്തിയായി എതിര്‍ക്കുകയാണ്.

മുഖ്യമന്ത്രിക്കസേരയും ശിവസേനയുടെ നേതൃത്വവും അടിയറവയ്ക്കാന്‍ അദ്ദേഹം തയാറായിട്ടില്ല. രാജിനെ മുന്നില്‍ നിര്‍ത്തി 'പുതിയ ശിവസേന'യ്ക്ക് രൂപം കൊടുത്താല്‍ കോണ്‍ഗ്രസ് സഖ്യത്തിലുള്ള ഉദ്ധവ് താക്കറെയുടെ അടിത്തറ ഇളക്കാമെന്നാണ് ബിജെപിയുടെ കണക്കുകൂട്ടല്‍. ശിവസേനാ സ്ഥാപകനായ ബാല്‍ താക്കറെയുടെ സഹോദരന്റെ മകനാണ് രാജ്.

ബാല്‍ താക്കറെ മകന്‍ ഉദ്ധവിനെ പിന്‍ഗാമിയാക്കിയപ്പോഴാണ് അദ്ദേഹം ശിവസേന വിട്ട് പുതിയ പാര്‍ട്ടി രൂപീകരിച്ചത്. താക്കറെയുടെ ശരീരഭാഷയും പ്രസംഗ ശൈലിയും രാജിനുണ്ട്. ഇതും മുതലെടുക്കാനാണ് ബിജെപി പദ്ധതി.

ഷിന്‍ഡെ കടുത്ത നിലപാട് സ്വീകരിച്ചതോടെ 6 മാസത്തിനകം നടക്കുന്ന നിയമസഭാ തിരഞ്ഞെടുപ്പിനു മുന്‍പ് വരെ ലയനം നീട്ടിവച്ചേക്കും. ശക്തികേന്ദ്രമായ താനെയ്ക്കപ്പുറം ഷിന്‍ഡെയ്ക്ക് കാര്യമായ ചലനമുണ്ടാക്കാന്‍ കഴിയില്ലെന്നാണ് വിലയിരുത്തല്‍. ശിവസേന, എന്‍സിപി പാര്‍ട്ടികളെ പിളര്‍ത്തി പ്രബലരെ പാളയത്തില്‍ എത്തിച്ചെങ്കിലും മുന്നണി ശക്തമല്ലെന്നു ബിജെപി കരുതുന്നു.

തിരഞ്ഞെടുപ്പ് പടിവാതില്‍ക്കല്‍ എത്തിയിട്ടും കോണ്‍ഗ്രസ്എന്‍സിപി (ശരദ് പവാര്‍) ഉദ്ധവ് ശിവസേന പാര്‍ട്ടികള്‍ തമ്മില്‍ സീറ്റ് തര്‍ക്കം തുടരുന്നു. സാംഗ്ലി, ഭിവണ്ടി സീറ്റുകളെ ചൊല്ലിയാണ് പ്രധാനമായും തര്‍ക്കം നടക്കുന്നത്. പതിവായി കോണ്‍ഗ്രസ് മത്സരിച്ചിരുന്ന സാംഗ്ലിക്കായി ഉദ്ധവ് പക്ഷവും ഭിവണ്ടിക്കായി എന്‍സിപിയും ശക്തമായ അവകാശവാദങ്ങളാണ് ഉന്നയിക്കുന്നത്. കഴിഞ്ഞ ദിവസം ശിവസേനാ നേതാവ് ഉദ്ധവ് താക്കറെയുടെ വസതിയില്‍ ചേര്‍ന്ന യോഗത്തില്‍ നിന്ന് കോണ്‍ഗ്രസ് നേതാക്കള്‍ വിട്ടു നിന്നിരുന്നു. തര്‍ക്കം പരിഹരിക്കാന്‍ കോണ്‍ഗ്രസ് ഹൈക്കമാന്‍ഡിന്റെ ഇടപെടലാണ് ശരദ് പവാറും ഉദ്ധവ് താക്കറെയും പ്രതീക്ഷിക്കുന്നത്.

അതേസമയം ഏഷ്യയിലെ ശതകോടീശ്വരന്മാരുടെ ആസ്ഥാനമായി മുംബൈ നഗരം. ചൈനീസ് തലസ്ഥാനമായ ബെയ്ജിങ്ങിനെ പിന്തള്ളിയാണ് മുംബൈയുടെ നേട്ടം. ഹോങ്കോങ് കേന്ദ്രമായി പ്രവര്‍ത്തിക്കുന്ന ഹുറൂണ്‍ റിസര്‍ച്ച് ഇന്‍സ്റ്റിറ്റ്യൂട്ടിന്റെ 2024 ഹുറൂണ്‍ ആഗോള അതിസമ്പന്ന പട്ടികയിലാണ് ഇക്കാര്യം സൂചിപ്പിക്കുന്നത്. റിപ്പോര്‍ട്ടുപ്രകാരം മുംബൈയില്‍ 92 ശതകോടീശ്വരന്മാരാണുള്ളത്. ബെയ്ജിങ്ങില്‍ 91 എണ്ണവും. ആഗോളതലത്തില്‍ ന്യൂയോര്‍ക്കിനും ലണ്ടനും പിന്നില്‍ മൂന്നാം സ്ഥാനത്തെത്താനും മുംബൈയ്ക്കായി. 26 പുതിയ ശതകോടീശ്വരമാരാണ് മുംബൈയില്‍നിന്ന് പട്ടികയിലെത്തിയത്. ശതകോടീശ്വരന്മാരുടെ എണ്ണത്തില്‍ അതിവേഗ വളര്‍ച്ചയാണ് മുംബൈ കാഴ്ചവെച്ചത്. ന്യൂഡല്‍ഹി പട്ടികയില്‍ പത്താം സ്ഥാനത്തെത്തി.

ആഗോളതലത്തില്‍ ശതകോടീശ്വരന്മാരുടെ എണ്ണത്തില്‍ ജര്‍മനിയെ പിന്തള്ളി ഇന്ത്യ മൂന്നാം സ്ഥാനത്തേക്കു കുതിച്ചു.- 271 പേര്‍. 814 പേരുമായി ചൈന ഒന്നാമതും 800 പേരുമായി യു.എസ്. രണ്ടാമതുമാണ്. ചൈനയില്‍ 55 പേരും അമേരിക്കയില്‍ 132 പേരും പുതുതായി പട്ടികയിലെത്തി.

ഇന്ത്യയില്‍നിന്ന് 94 പേരാണ് പുതുതായി പട്ടികയുടെ ഭാഗമായത്. അമേരിക്ക കഴിഞ്ഞാല്‍ ഏറ്റവും കൂടുതല്‍ പുതിയ ശതകോടീശ്വര്‍മാര്‍ വന്നത് ഇന്ത്യയില്‍നിന്നാണ്. 2013 -നു ശേഷം ഇത്രയധികം പേര്‍ പട്ടികയിലേക്കെത്തുന്നതും ആദ്യമാണെന്ന് ഇന്‍സ്റ്റിറ്റ്യൂട്ട് ചെയര്‍മാന്‍ റൂപര്‍ട്ട് ഹൂഗന്‍വെര്‍ഫ് പറഞ്ഞു.

ഇന്ത്യന്‍ ശതകോടീശ്വരന്മാരുടെ ആകെ ആസ്തി ഒരു ലക്ഷം കോടി ഡോളറായി കൂടി. ആഗോളതലത്തില്‍ അതിസമ്പന്നരുടെ ആസ്തിയുടെ ഏഴു ശതമാനം വരുമിത്. സ്റ്റാര്‍ട്ടപ്പുകളുടെ കടന്നുവരവാണ് ഇന്ത്യയില്‍ അതിസമ്പന്നരുടെ എണ്ണം പെട്ടെന്ന് ഉയരാന്‍ കാരണമായതെന്നും റിപ്പോര്‍ട്ടില്‍ സൂചിപ്പിക്കുന്നു.