വി.ഡി സതീശനെതിരായ 150 കോടിയുടെ തെളിവില്ലാത്ത അഴിമതി ആരോപണത്തില് കോടതി പരാതിക്കാരനെ രൂക്ഷമായി വിമര്ശിച്ചു... ആരോപണങ്ങള് സാധൂകരിക്കുന്ന തെളിവുകള് ഹാജരാക്കാത്ത കഴമ്പില്ലാത്ത ഹര്ജിയെന്ന നിരീക്ഷണത്തോടെ പരാതിക്കാരനെ വിമര്ശിച്ചത്
വി.ഡി സതീശനെതിരായ 150 കോടിയുടെ തെളിവില്ലാത്ത അഴിമതി ആരോപണത്തില് കോടതി പരാതിക്കാരനെ രൂക്ഷമായി വിമര്ശിച്ചു. തിരുവനന്തപുരം പ്രത്യേക വിജിലന്സ് കോടതി ജഡ്ജി രാജകുമാരയാണ് ആരോപണങ്ങള് സാധൂകരിക്കുന്ന തെളിവുകള് ഹാജരാക്കാത്ത കഴമ്പില്ലാത്ത ഹര്ജിയെന്ന നിരീക്ഷണത്തോടെ പരാതിക്കാരനെ വിമര്ശിച്ചത്.
പ്രതിപക്ഷ നേതാവ് വി.ഡി സതീശനെതിരെ പി.വി അന്വര് എം.എല്.എ ഉയര്ത്തിയ 150 കോടിയുടെ അഴിമതിയാരോപണത്തില് തെളിവ് ആവശ്യപ്പെട്ടു കൊണ്ടാണ് കോടതി വിമര്ശനം. അതേ സമയം ആരോപണത്തില് സ്വീകരിച്ച നടപടി അറിയിക്കാന് വിജിലന്സിനു കോടതി നിര്ദേശം നല്കി. ആരോപണത്തിനു കൃത്യമായ തെളിവ് വേണമെന്നും വെറുതെ ആരോപണം ഉന്നയിച്ചിട്ട് കാര്യമില്ലെന്നും കോടതി വ്യക്തമാക്കി.
സംസ്ഥാന സര്ക്കാരിന്റെ കെ-റെയില് പദ്ധതി അട്ടിമറിക്കാന് പ്രതിപക്ഷ നേതാവ് 150 കോടി രൂപ വാങ്ങിയെന്നായിരുന്നു പി.വി അന്വര് നിയമസഭയില് ആരോപിച്ചത്. ആരോപണത്തില് സതീശനെതിരെ കേസെടുക്കണമെന്ന് ആവശ്യപ്പെട്ട് കേരളാ കോണ്ഗ്രസ് എം നേതാവ് എ.എച്ച് ഹഫീസ് വിജിലന്സ് കോടതിയെ സമീപിക്കുകയായിരുന്നു.
നേരത്തെ കേസില് പ്രാഥമികാന്വേഷണത്തിന് വിജിലന്സ് ഡയറക്ടര് ഉത്തരവിട്ടിരുന്നെങ്കിലും ഇത് പോരെന്ന് ചൂണ്ടിക്കാട്ടിയാണ് ഹഫീസ് ഹരജി നല്കിയത്. ഹര്ജി പരിഗണിച്ച കോടതി പരാതിയിന്മേല് സ്വീകരിച്ച നടപടി അറിയിക്കാന് വിജിലന്സിന് നിര്ദേശം നല്കുകയായിരുന്നു. ആരോപണത്തിന് വ്യക്തമായ തെളിവ് വേണമെന്ന് കോടതി ചൂണ്ടിക്കാട്ടി. വെറുതെ ആരോപണം ഉന്നയിച്ചിട്ട് കാര്യമില്ല. ലഭിച്ച പരാതിയുടെ നിജസ്ഥിതി അറിയിക്കണമെന്നും വിജിലന്സിനോട് കോടതി നിര്ദേശിച്ചിട്ടുണ്ട്. ഹര്ജി ഏപ്രില് ഒന്നിനു കോടതി വീണ്ടും പരിഗണിക്കും.
https://www.facebook.com/Malayalivartha