കാത്തിരുന്ന് കാണാം... മത്സരിക്കുന്നില്ലെന്ന് പറഞ്ഞ കെ സുധാകരനെ നിര്ബന്ധിപ്പിച്ച് പ്രസിഡന്റ് സ്ഥാനം ഒഴിപ്പിച്ച് മത്സരിപ്പിച്ചു; തെരഞ്ഞെടുപ്പ് കഴിഞ്ഞപ്പോള് കിട്ടിയ അവസരം മുതലാക്കി എതിരാളികള്; തത്ക്കാലം തണുത്ത് സുധാകരന്; ധൃതിയോ അതൃപ്തിയോ ഇല്ല, കെസിയെ അനാവശ്യമായി വലിച്ചിഴയ്ക്കുന്നുവെന്ന് കെ സുധാകരന്
കെ സുധാകരനെ സംബന്ധിച്ച് നിര്ണായകമാണ് ഈ തെരഞ്ഞെടുപ്പ്. മത്സരിക്കുന്നില്ലെന്ന് പറഞ്ഞ കെ സുധാകരനെ നിര്ബന്ധിപ്പിച്ച് പ്രസിഡന്റ് സ്ഥാനം ഒഴിപ്പിച്ച് മത്സരിപ്പിച്ചു. അവസാനം പ്രസിഡന്റ് സ്ഥാനം തുലാസില്. നിരന്തരം വിവാദത്തിലാകുന്ന സുധാകരനെ തത്ക്കാലം വേണ്ടെന്ന നിലപാടിലാണ് എതിര് പക്ഷം.
അതിനാല് തന്നെ കണ്ണൂരില് സുധാകരനെ തോല്പ്പിക്കുമോയെന്ന സംശയം ബാക്കിയാണ്. മാത്രമല്ല കഴിഞ്ഞ തവണത്തെ സീറ്റ് കോണ്ഗ്രസിന് കിട്ടുകയുമില്ല. ഇതോടെ ആ പേര് പറഞ്ഞ് എന്നെന്നും മാറ്റി നിര്ത്താനാണ് അണിയറ നീക്കം.
കണ്ണൂരില് മത്സരിക്കുന്നതിനായി താല്ക്കാലികമായി എം.എം ഹസന് കൈമാറിയ കെ.പി.സി.സി അധ്യക്ഷ സ്ഥാനം കെ. സുധാകരന് തിരികെ ലഭിച്ചില്ല. ശനിയാഴ്ച ചേര്ന്ന നേതൃയോഗത്തില് സുധാകരന് ചുമതല തിരിച്ചുനല്കാനുള്ള തീരുമാനം ഉണ്ടാകേണ്ടതായിരുന്നു. അതുണ്ടായില്ലെന്ന് മാത്രമല്ല, തല്ക്കാലം തുടരാന് ഹസനോട് എ.ഐ.സി.സി ജനറല് സെക്രട്ടറി ദീപാദാസ് മുന്ഷി നിര്ദേശിക്കുകയും ചെയ്തു. ഇതില് കെ. സുധാകരന് കടുത്ത അതൃപ്തിയിലാണെന്ന് വിവരം. കെ.പി.സി.സി യോഗത്തില് അതു പ്രകടിപ്പിക്കുകയും ചെയ്തു.
വോട്ടെടുപ്പ് കഴിഞ്ഞ സാഹചര്യത്തില് പദവി കൈമാറാന് വൈകേണ്ട കാര്യമെന്താണെന്നാണ് കെ. സുധാകരന്റെ ചോദ്യത്തിന് എ.ഐ.സി.സി നേതൃത്വം കൃത്യമായ മറുപടി നല്കിയതുമില്ല. ഫലപ്രഖ്യാപനത്തിന് പിന്നാലെതന്നെ മാറ്റാന് നീക്കം നടക്കുന്നതായി സംശയിക്കുന്ന സുധാകരന്, പദവി തിരിച്ചുനല്കാത്തത് അതിന്റെ ഭാഗമായാണ് കണക്കാക്കുന്നത്. തെരഞ്ഞെടുപ്പ് കഴിയുന്നതുവരെയാണ് തനിക്ക് ചുമതല കൈമാറിയതെന്നും വോട്ടെണ്ണല് നടക്കുന്ന ജൂണ് നാലുവരെയാണ് അതിന്റെ കാലാവധിയെന്നും എം.എം. ഹസന് പറഞ്ഞു. എ.ഐ.സി.സി നിര്ദേശം ലഭിച്ചാല് അപ്പോള്തന്നെ പദവി കൈമാറുമെന്നും അദ്ദേഹം സൂചിപ്പിക്കുന്നു.
കഴിഞ്ഞ നിയമസഭ തെരഞ്ഞെടുപ്പിലെ കനത്തതിരിച്ചടിക്ക് പിന്നാലെയാണ് കെ. സുധാകരന് കെ.പി.സി.സിയുടെ അമരത്ത് എത്തിയത്. നന്നായി തുടങ്ങിയ കെ. സുധാകരന് പ്രവര്ത്തകരില് ഉണര്ത്തിയ ആവേശം പക്ഷേ, നിലനിര്ത്താനായില്ല. മോണ്സണ് മാവുങ്കല് കേസ് ഉള്പ്പെടെ വിവാദങ്ങള് പലപ്പോഴും പാര്ട്ടിക്ക് തലവേദനയായി. ആര്.എസ്.എസ് ശാഖക്ക് കാവല്നിന്നുവെന്ന പരാമര്ശം യു.ഡി.എഫ് ഘടകകക്ഷികളെ പോലും ചൊടിപ്പിച്ചു.
നെഹ്റുവിരുദ്ധ പരാമര്ശം ഹൈകമാന്ഡിന്റെ അതൃപ്തിക്കും കാരണമായി. പ്രതിപക്ഷ നേതാവ് വി.ഡി. സതീശനുമായി കെ. സുധാകരന് നല്ല ബന്ധത്തില് അല്ലെന്നത് സമരാഗ്നി യാത്രക്കിടെ പരസ്യമാവുകയും ചെയ്തു. സുധാകരന്റെ ആരോഗ്യപ്രശ്നങ്ങള് കൂടി ഉയര്ത്തിക്കാട്ടി ലോക്സഭാ തെരഞ്ഞെടുപ്പിന് മുമ്പ് നേതൃമാറ്റത്തിനുള്ള നീക്കത്തിന് പാര്ട്ടിയില് ഒരു വിഭാഗം തുടക്കമിട്ടിരുന്നു. തെരഞ്ഞെടുപ്പിന് തൊട്ടുമുമ്പ് അധ്യക്ഷനെ മാറ്റുന്നത് തെറ്റായ സന്ദേശം നല്കുമെന്നതിനാലാണ് അതു ഫലം കാണാതെ പോയത്.
മത്സരിക്കാനായി മാറിനിന്ന സാഹചര്യം മുതലെടുത്ത് കെ. സുധാകരനെ നീക്കാനാണ് എതിര്വിഭാഗം ചരടുവലിക്കുന്നത്. അതുകൊണ്ടുതന്നെ കണ്ണൂരിലെ തെരഞ്ഞെടുപ്പ് ഫലം കെ. സുധാകരന് നിര്ണായകമാണ്. കണ്ണൂരില് ജയിക്കാനും19 സീറ്റ് നേട്ടം ആവര്ത്തിക്കാനുമായില്ലെങ്കില് സുധാകരനെതിരായ നീക്കം ശക്തിയാര്ജിക്കും.
അതേസമയം സുധാകരന് തത്ക്കാലം തണുത്ത മട്ടാണ്. കെപിസിസി പ്രസിഡന്റ് സ്ഥാനം സംബന്ധിച്ചുയരുന്ന അഭ്യൂഹങ്ങളോട് പ്രതികരിച്ച് കെ സുധാകരന്. ലോക്സഭാ തെരഞ്ഞെടുപ്പില് സ്ഥാനാര്ത്ഥിയായതിനെ തുടര്ന്ന് ഇലക്ഷന് കാലഘട്ടത്തില് കെപിസിസി അധ്യക്ഷന്റെ ചുമതലയില് നിന്ന് താത്കാലികമായി മാറിനില്ക്കാമെന്നുള്ള തീരുമാനം ഞാനുള്പ്പെടെയുള്ള നേതൃത്വം കൂട്ടായെടുത്തതായിരുന്നുവെന്ന് സുധാകരന് പറഞ്ഞു. അതിന് കോണ്ഗ്രസ് ഹൈക്കമാന്ഡ് അംഗീകാരം നല്കുകയും എം എം ഹസ്സന് ഇലക്ഷന് കാലം വരെ ആക്ടിങ് പ്രസിഡന്റായി ചുമതലയേല്ക്കുകയും ചെയ്തു. ഇപ്പോള് ഇതുമായി ബന്ധപ്പെട്ട് വിവിധ മാധ്യമങ്ങളില് വരുന്നത് വാസ്തവ വിരുദ്ധമായ വാര്ത്തകളാണ് എന്നാണ് സുധാകരന് പറയുന്നത്.
https://www.facebook.com/Malayalivartha