മാന്നാര് കല കൊലക്കേസില് പ്രതിഭാഗം അഭിഭാഷകന് വക്കാലത്ത് ഒഴിഞ്ഞു
മാന്നാര് കല കൊലക്കേസില് പ്രതിഭാഗം അഭിഭാഷകന് സുരേഷ് മത്തായി വക്കാലത്ത് ഒഴിഞ്ഞതായി വിവരം. പാര്ട്ടി നിര്ദേശപ്രകാരമാണ് വക്കാലത്ത് ഒഴിഞ്ഞത്. ബുധനൂര് ലോക്കല് കമ്മിറ്റി സെക്രട്ടറിയാണ് അഡ്വ സുരേഷ് മത്തായി. അതേസമയം, മാന്നാര് കല കൊലപാതകക്കേസില് ഒന്നാംപ്രതി അനിലിനെ ഇസ്രയേലില് നിന്ന് നാട്ടിലെത്തിച്ച ശേഷം ഒന്നിച്ച് തെളിവെടുപ്പ് നടത്തിയാല് മതിയെന്ന തീരുമാനത്തിലാണ് അന്വേഷണസംഘം. അതിനാല് പ്രതികളുടെ കസ്റ്റഡി കാലാവധി നീട്ടി നല്കണമെന്നായിരുന്നു അന്വേഷണ സംഘത്തിന്റെ ആവശ്യം. ഒന്നാം പ്രതിക്കായി ഇന്റര് പോള് മുഖേന ബ്ലൂ കോര്ണര് നോട്ടീസ് പുറപ്പെടുവിക്കാന് ഒരുങ്ങുകയാണ് പൊലീസ്. ഇതിനായി പ്രതിയുടെ അറസ്റ്റ് വാറണ്ട് വിവരങ്ങള് നോഡല് ഏജന്സിയായ സിബിഐക്ക് കൈമാറി.
അനിലിനെ എത്രയും വേഗം നാട്ടില് എത്തിച്ചെങ്കില് മാത്രമേ കേസ് അന്വേഷണത്തിലെ നിര്ണായക വിവരങ്ങള് ലഭ്യമാകൂ. കൊലപാതകത്തില് കൂടുതല് വെളിപ്പെടുത്തലുമായി സാക്ഷികള് രംഗത്തെത്തിയിരുന്നു. കലയുടെ മൃതദേഹവുമായി മൂന്ന് പേര് തന്നെ സമീപിച്ചിരുന്നതായി മാന്നാര് സ്വദേശിയായ സോമന് വെളിപ്പെടുത്തി. കേസിലെ സാക്ഷി സുരേഷ് കുമാര് കൊലപാതകത്തെ കുറിച്ച് തന്നോട് പറഞ്ഞിരുന്നതായി മുരളീധരന് എന്നയാളും പറയുന്നു. എന്നാല് കൊലപാതകവിവരം അറിഞ്ഞിട്ടും ഇവര് എന്തുകൊണ്ട് ഇത്രയും കാലം മറച്ചു വെച്ചുവെന്നും ഇപ്പോഴത്തെ വെളിപ്പെടുത്തലിലെ സത്യാവസ്ഥ എന്തെന്നും പൊലീസ് പരിശോധിക്കുന്നുണ്ട്.
15 വര്ഷം മുന്പ് നടന്ന കൊലപാതകത്തില് കൂടുതല് സാക്ഷികള് രംഗത്തെത്തുന്നത് കേസ് അന്വേഷണത്തില് ഗുണം ചെയ്യുമെന്നാണ് പൊലീസിന്റെ കണക്ക് കൂട്ടല്. കലയുടെ മൃതദേഹവുമായി മൂന്ന് പേര് തന്നെ സമീപിച്ചെന്നും ഒപ്പം കേസിലെ പ്രതികളായ ജിനുവും പ്രമോദും ഉണ്ടായിരുന്നതായും മാന്നാര് സ്വദേശി സോമന് പറയുന്നു. നിലവില് കേസിലെ സാക്ഷിയായ സുരേഷ് കൊലപാതക വിവരം തന്നോട് പറഞ്ഞതായി മുരളീധരന് എന്നയാളും വെളിപ്പെടുത്തി. മുരളീധരനും സോമനും എസ്എന്ഡിപിയുടെ മുന് പ്രസിഡന്റുമാരാണ്. മാന്നാര് എസ്എന്ഡിപി ശാഖാ യോഗവുമായി ബന്ധപ്പെട്ട് നിലനിന്നിരുന്ന ചില പ്രശ്നങ്ങളാണ് ഈ കേസിന് തുമ്പ് ഉണ്ടാക്കിയതെന്ന സൂചനയും പുറത്ത് വരുന്നുണ്ട്. അതിനാല് ഇപ്പോഴത്തെ വെളിപ്പെടുത്തലിന് പിന്നില് മറ്റെന്തെങ്കിലും ഉദ്ദേശമുണ്ടോ എന്നും പൊലീസ് പരിശോധിക്കുന്നുണ്ട്.
https://www.facebook.com/Malayalivartha
