മാലിന്യം ശേഖരിച്ച് പൊതുസ്ഥലത്ത് തള്ളുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് മന്ത്രി എം.ബി. രാജേഷ്
മാലിന്യം ശേഖരിച്ച് പൊതുസ്ഥലത്ത് തള്ളുന്നവര്‍ക്കെതിരെ സംസ്ഥാന വ്യാപകമായി കര്‍ശന നടപടി സ്വീകരിക്കുമെന്ന് മന്ത്രി എം.ബി. രാജേഷ് അറിയിച്ചു. തിരുവനന്തപുരത്ത് അനധികൃതമായി മാലിന്യം ശേഖരിക്കുന്ന ഇത്തരക്കാരെ യുദ്ധകാലാടിസ്ഥാനത്തില്‍ പിടികൂടാന്‍ മുഖ്യമന്ത്രിയുടെ നേതൃത്വത്തില്‍ ചേര്‍ന്ന ഉന്നതതല യോഗം തീരുമാനിച്ചതായും മന്ത്രി വ്യക്തമാക്കി.
വന്‍തോതില്‍ മാലിന്യം സൃഷ്ടിക്കുന്ന സ്ഥാപനങ്ങളെ പ്രത്യേകം നിരീക്ഷിക്കും. പൊലീസിന്റെ സഹകരണം കൂടി ഉറപ്പാക്കി കൊണ്ടായിരിക്കും നടപടികള്‍. തിരുവനന്തപുരത്ത് രാത്രിയിലുള്‍പ്പെടെ നഗരസഭയുടെയും പൊലീസിന്റെയും പ്രത്യേക സംഘങ്ങള്‍ പട്രോളിംഗ് നടത്തും. മാലിന്യ പ്രശ്‌നത്തിലെ കേസുകളില്‍ ഒരു വിട്ടുവീഴ്ചയും കാട്ടില്ലെന്നും ഒരു സമ്മര്‍ദ്ദത്തിനും വഴങ്ങില്ലെന്നും മന്ത്രി അറിയിച്ചു.
ഇന്നലെ രാത്രി തിരുവനന്തപുരത്ത് ആമയിഴഞ്ചാന്‍ തോട്ടില്‍ മാലിന്യം നിക്ഷേപിക്കാന്‍ ശ്രമിച്ച ഒമ്പത് വാഹനങ്ങള്‍ വനിതാ ഹെല്‍ത്ത് സ്‌ക്വാഡ് പിടികൂടി. കേരള മുനിസിപ്പാലിറ്റി നിയമം/ കേരള പഞ്ചായത്തിരാജ് നിയമപ്രകാരം ജലാശയങ്ങളില്‍ മാലിന്യം നിക്ഷേപിക്കുന്നത് ആറുമാസത്തില്‍ കുറയാത്തതും ഒരു വര്‍ഷത്തില്‍ കവിയാത്തതുമായ തടവുശിക്ഷയുള്ള ജാമ്യം ലഭിക്കാത്ത കുറ്റകൃത്യമാണ്. ഇതിന് പുറമേ ജലസംരക്ഷണ നിയമം അനുസരിച്ചും നടപടി സ്വീകരിക്കാം. ഈ നടപടികള്‍ക്കായി പൊലീസിന് പരാതി നല്‍കാന്‍ നഗരസഭയ്ക്ക് മന്ത്രി നിര്‍ദ്ദേശം നല്‍കി.
ആമയിഴഞ്ചാന്‍ തോട് ഉള്‍പ്പെടെയുള്ള ജലാശയങ്ങളിലേക്ക് മാലിന്യം ഒഴുക്കി വിടാന്‍ പല സ്ഥാപനങ്ങളും പൈപ്പ് സ്ഥാപിച്ചതും ശ്രദ്ധയില്‍പ്പെട്ടിട്ടുണ്ട്. ഇവര്‍ക്കെതിരെയും സമാനമായ നടപടി സ്വീകരിക്കും. ഇതിന് പുറമേ ആമയിഴഞ്ചാന്‍ തോട്ടില്‍ മാലിന്യം നിക്ഷേപിച്ച ഒമ്പതുപേരെ പിടികൂടുകയും ഇവര്‍ക്ക് 45090 രൂപ പിഴ ചുമത്തുകയും ചെയ്തിട്ടുണ്ട്. അനധികൃത ഏജന്‍സികള്‍ക്ക് മാലിന്യം കൈമാറുന്നവരെയും നഗരസഭ തിരിച്ചറിഞ്ഞിട്ടുണ്ട്. ഇവര്‍ക്കെതിരെയും ശക്തമായ നിയമനടപടി സ്വീകരിക്കുമെന്ന് മന്ത്രി അറിയിച്ചു.
https://www.facebook.com/Malayalivartha
