മഴകുറഞ്ഞ സാഹചര്യത്തില്‍ കുറുവാദ്വീപിലേക്കുള്ള പ്രവേശന നിയന്ത്രണം പിന്‍വലിച്ച് ജില്ലാ ദുരന്തനിവാരണ അതോറിറ്റി ചെയര്‍പേഴ്‌സണ്‍ കളക്ടര്‍ ഡി.ആര്‍. മേഘശ്രീ ഉത്തരവിട്ടു.

കുറുവാദ്വീപില്‍ എല്ലാവിധ സുരക്ഷാക്രമീകരണങ്ങളും നിയമങ്ങളും പാലിച്ച് മാത്രമേ പ്രവേശനം അനുവദിക്കുകയുള്ളൂ. യന്ത്രസഹായത്തോടെ മണ്ണെടുക്കുന്നതിനുള്ള നിയന്ത്രണം പിന്‍വലിച്ചു.

യന്ത്രങ്ങള്‍ ഉപയോഗിച്ച് മണ്ണെടുക്കുന്നതില്‍ സുരക്ഷാമാനദണ്ഡങ്ങളും നിയമങ്ങളും പാലിച്ചാല്‍ മാത്രമേ ബന്ധപ്പെട്ട വകുപ്പുകള്‍ അനുമതി നല്‍കുകയുള്ളൂയെന്നും ഉത്തരവിലുണ്ട്. നീര്‍ച്ചാലുകള്‍, തണ്ണീര്‍ത്തട സംരക്ഷണനിയമം അനുശാസിക്കുന്ന പ്രദേശങ്ങളില്‍ മണ്ണ് നിക്ഷേപിച്ചാല്‍ നടപടി സ്വീകരിക്കുന്നതാണ്.

മണ്ണ് നീക്കം ചെയ്ത് അപകടമുണ്ടായാല്‍ അനുമതി നല്‍കുന്ന വകുപ്പിനായിരിക്കും പൂര്‍ണ ഉത്തരവാദിത്വമുള്ളത്. കേന്ദ്ര കാലാവസ്ഥാവകുപ്പ് ഓറഞ്ച്, ചുവപ്പ് ജാഗ്രതാനിര്‍ദേശങ്ങള്‍ പുറപ്പെടുവിക്കുമ്പോഴും ശക്തമായ മഴ പെയ്യുന്ന സാഹചര്യങ്ങളിലും യന്ത്രസഹായത്തോടെയുള്ള മണ്ണെടുപ്പ് നിര്‍ത്തിവെയ്ക്കുകയും വേണം.