കേസില്പെടുത്തിയാല് തന്നെ കൊല്ലണം. ഉപദ്രവിച്ച് വിട്ടാല് ഒരുപാട് അഴിമതിക്കഥകള് പുറത്തുവരും: ബിജു രമേശ്
ബാര്കോഴയില് സര്ക്കാര് എഡിറ്റ് ചെയ്ത ശബ്ദരേഖകള് പുറത്തുവിടുന്നെന്ന് ബിജു രമേശ്. ഇപ്പോള് പുറത്തു വരുന്ന ശബ്ദരേഖകല് സര്ക്കാര് എഡിറ്റ് ചെയ്തതതാണ്. ഭരണകക്ഷികളില്പെട്ടവര്ക്ക് കോഴ കൊടുത്തുവെന്നു പറയുന്ന സംഭാഷണശകലങ്ങള് നീക്കം ചെയ്തതാണ് പുതിയ ശബ്ദരേഖകള്. ധൈര്യമുണ്ടെങ്കില് എഡിറ്റ് ചെയ്യാത്ത ശബ്ദരേഖ സര്ക്കാര് പുറത്തുവിടട്ടേയെന്നും ബിജു വെല്ലുവിളിച്ചു.
ഉപദ്രവിക്കരുതെന്ന് രമേശ് ചെന്നിത്തലയും ശിവകുമാറും തന്നോട് ആവശ്യപ്പെട്ടെന്നും ബിജു വാര്ത്താസമ്മേളനത്തില് പറഞ്ഞു. ക്രൈംബ്രാഞ്ച് കേസില്പെടുത്തിയാല് തന്നെ കൊല്ലണം. ഉപദ്രവിച്ച് വിട്ടാല് ഒരുപാട് അഴിമതിക്കഥകള് പുറത്തുവരും. ഇപ്പോള് പുറത്തുവന്നത് അഴിമതിയുടെ ഒരംശം മാത്രമാണെന്നും ബിജു പറഞ്ഞു.
ബാര് കോഴക്കേസില് മന്ത്രി കെ. ബാബുവിന്റെ പേര് പറയാന് നിര്ബന്ധിച്ചത് ഒരു മന്ത്രിയാണെന്ന് ബിജു രമേശ്. ഗൂഢാലോചന കേസില് ഇതും ഉള്പ്പെടുത്തി അന്വേഷിക്കണം. കൂടുതല് ദ്രോഹിച്ചാല് മന്ത്രിയുടെ പേരു വെളിപ്പെടുത്തുമെന്നും ബിജു രമേശ് പറഞ്ഞു. ഇനിയും ദ്രോഹിച്ചാല് മന്ത്രിമാരുടെ വടക്കേ ഇന്ത്യയിലുള്ള നിക്ഷേപങ്ങളെക്കുറിച്ച് വെളിപ്പെടുത്തും. താനും സുകേശനുമായി ഗൂഢാലോചന നടത്തിയിട്ടില്ല. പണം വാങ്ങിയ മറ്റുമന്ത്രിമാരുടെ പേരുകളും വെളിപ്പെടുത്താമെന്ന് താന് സുകേശനോട് പറഞ്ഞിരുന്നു. എന്നാല് ഇക്കാര്യങ്ങള് അന്വേഷണത്തിന്റെ പരിധിയില് വരില്ലെന്നായിരുന്നു സുകേശന് പറഞ്ഞത്. വേണമെങ്കില് മാധ്യമങ്ങളോട് പറയാമെന്നും അദ്ദേഹം പറഞ്ഞു. 300 പേര് ചേര്ന്നാണോ സര്ക്കാരിനെതിരെ ഗൂഢാലോചന നടത്തുന്നത്. എപ്പോള് അറസ്റ്റ് ചെയ്താലും നല്കാനുള്ള തെളിവുകള് കൈവശമുണ്ട്. തന്നെ ഭീഷണിപ്പെടുത്താന് ശ്രമിക്കുന്നത് അവരുടെ നാശത്തിനാണെന്നും ബിജു രമേശ് മുന്നറിയിപ്പ് നല്കി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
