പുതിയതെരു സ്വദേശിയായ തോട്ടം ഉടമയെ വിരാജ്‌പേട്ട ബി ഷെട്ടിഗേരിയില്‍ കൊലപ്പെടുത്തിയത് കഴുത്തില്‍ കയറോ ബെല്‍ട്ടോ പോലുള്ള വസ്തു മുറുക്കിയാണെന്ന് ഗോണിക്കുപ്പ പോലീസ്.

കണ്ണൂരിലെ കൊയിലി ആശുപത്രി സ്ഥാപകന്‍ പരേതനായ കൊയിലി ഭാസ്‌കരന്റെ മകന്‍ പ്രദീപ് കൊയിലി (49) ആണ് കാപ്പിത്തോട്ടത്തിനുള്ളിലെ മുറിയില്‍ കൊല്ലപ്പെട്ടത്. ബുധനാഴ്ച വൈകുന്നേരമാണ് മൃതദേഹം കണ്ടത്.

പ്രദീപിന് കുടകിലെ ശ്രീമംഗല ഷെട്ടിഗിരിയില്‍ 32 ഏക്കര്‍ കാപ്പിത്തോട്ടമുണ്ട്. ഇത് വില്‍ക്കാനുള്ള ശ്രമത്തിലായിരുന്നു. വര്‍ഷങ്ങളായി വിരാജ്‌പേട്ട കേന്ദ്രീകരിച്ച് കൃഷിയുമായി കഴിയുകയാണ് പ്രദീപ്. സ്ഥലം വില്‍പ്പനയുമായി ബന്ധപ്പെട്ട തര്‍ക്കമാണോ കൊലയ്ക്ക് പിന്നിലെന്ന് പോലീസിന് സംശയം. കൂത്തുപറമ്പ് സ്വദേശിയായ ഒരാളാണ് തോട്ടത്തില്‍ പ്രദീപിന്റെ സഹായിയായി ജോലിചെയ്യുന്നത്. ബുധനാഴ്ച ഉച്ചയ്ക്ക് രണ്ടോടെ ഇയാള്‍ പ്രദീപിന്റെ താമസസ്ഥലത്തെ കോളിങ് ബെല്‍ അമര്‍ത്തി.

എന്നാല്‍, പ്രതികരണമൊന്നും ഉണ്ടായില്ല. വീടിന്റെ വാതില്‍ പുറത്തുനിന്ന് പൂട്ടി താക്കോലുമായാണ് കൊലയാളികള്‍ രക്ഷപ്പെട്ടത്. വീടിന്റെ മറ്റൊരു താക്കോല്‍ സഹായിയുടെ കൈവശമായിരുന്നു. വൈകുന്നേരം ഈ താക്കോലുമായി തിരിച്ചെത്തി വീട് തുറന്നപ്പോഴാണ് കിടക്കവിരിയില്‍ കെട്ടിവെച്ചനിലയില്‍ പ്രദീപിന്റെ മൃതദേഹം കണ്ടത്.മുറിയിലെ സിസിടിവിയില്‍ രാവിലെ പത്തിന് മൂന്ന് ചെറുപ്പക്കാര്‍ ഇവിടെയെത്തിയതിന്റെ ദൃശ്യം പോലീസിന് ലഭിച്ചിട്ടുണ്ട്.

സിസിടിവി ക്യാമറ കേടുവരുത്തിയിട്ടുണ്ട്. പ്രദീപിന്റെ കഴുത്തിലുണ്ടായിരുന്ന മൂന്നുപവനിലേറെ തൂക്കംവരുന്ന സ്വര്‍ണമാല, മൊബൈല്‍ എന്നിവ കാണാതായിട്ടുണ്ട്. ഒരു ബാഗും നഷ്ടപ്പെട്ടു.പോസ്റ്റ്‌മോര്‍ട്ടത്തിനുശേഷം മൃതദേഹം വ്യാഴാഴ്ച രാത്രി കണ്ണൂരിലെത്തിച്ചു. വെള്ളിയാഴ്ച രാവിലെ ഒന്‍പതുമുതല്‍ പത്തുവരെ കൊയിലി ആശുപത്രി പരിസരത്തും തുടര്‍ന്ന് തെരു മണ്ഡപത്തിനടുത്തുള്ള വീട്ടിലും പൊതുദര്‍ശനത്തിനു വെക്കും. 11.30-ന് പയ്യാമ്പലത്ത് സംസ്‌കാരം നടക്കും.