രാഹുല് മാങ്കൂട്ടത്തിലിനെ ഒളിവില് കഴിയാന് സഹായിച്ച രണ്ടുപേര് അറസ്റ്റില്
രാഹുല് മാങ്കൂട്ടത്തില് എംഎല്എയെ ഒളിവില് കഴിയാന് സഹായിച്ച രണ്ടുപേരെ പൊലീസ് അറസ്റ്റ് ചെയ്തു. ബംഗളൂരുവില് രാഹുലിനെ ഒളിവില് കഴിയാന് സഹായിച്ച ജോസ്, റെക്സ് എന്നിവരെയാണ് അറസ്റ്റ് ചെയ്തത്. കര്ണാടക തമിഴ്നാട് അതിര്ത്തിയിലെ ബാഗല്ലൂരിലെ ഒളിവ് സങ്കേതത്തില് നിന്ന് ബംഗളൂരുവിലേക്ക് രാഹുലിനെ എത്തിച്ചത് ഇവരാണെന്ന് പൊലീസ് പറയുന്നു. രക്ഷപ്പെടാന് ഇവര് ഉപയോഗിച്ച ഫോര്ച്യൂണര് കാറും പൊലീസ് പിടിച്ചെടുത്തു. ഇരുവരെയും ചോദ്യം ചെയ്തശേഷം അറസ്റ്റ് രേഖപ്പെടുത്തി വിട്ടച്ചു.
കേസില് രാഹുല് മാങ്കൂട്ടത്തില് ഇപ്പോഴും ഒളിവിലാണ്. രാഹുലിനെ കണ്ടെത്താന് പുതിയ അന്വേഷണസംഘത്തെ ക്രൈംബ്രാഞ്ച് നിയോഗിച്ചിട്ടുണ്ട്. ആദ്യ സംഘത്തില് നിന്ന് അന്വേഷണ വിവരങ്ങള് രാഹുലിന് ചോരുന്നുവെന്ന നിഗമനത്തിന്റെ അടിസ്ഥാനത്തിലാണ് പുതിയ നീക്കം. ആദ്യപരാതിയില് കേസ് രജിസ്റ്റര് ചെയ്തതിനുപിന്നാലെ രാഹുല് ഒളിവില് പോകുകയായിരുന്നു. ബംഗളൂരുവില് ഒളിവില് കഴിയുകയാണെന്നാണ് ആദ്യം ലഭിച്ച വിവരം.
കഴിഞ്ഞ 11 ദിവസമായി അതിവിദഗ്ധമായാണ് രാഹുല് പൊലീസിന്റെ കൈയില്പ്പെടാതെ രക്ഷപ്പെട്ടത്. പ്രമുഖരടക്കമുള്ളവര് രാഹുലിനെ സഹായിച്ചിട്ടുണ്ടെന്നാണ് പൊലീസ് നിഗമനം. കഴിഞ്ഞ വ്യാഴാഴ്ച യുവതി പരാതിയുമായി മുഖ്യമന്ത്രിയ്ക്ക് മുന്നില് എത്തിയ ഉടന് രാഹുല് പാലക്കാട് നിന്ന് മുങ്ങിയിരുന്നു. സിസിടിവി ക്യാമറകളുള്ള റോഡുകള് പരമാവധി ഒഴിവാക്കിയായിരുന്നു യാത്ര.
സുഹൃത്തായ യുവ നടിയുടെ ചുവന്ന പോളോ കാറില് പൊള്ളാച്ചി വരെ എത്തി. അവിടെ നിന്ന് മറ്റൊരു കാറില് കോയമ്പത്തൂരിലേക്ക്. അവിടെ നിന്ന് തമിഴ്നാട് കര്ണാടക അതിര്ത്തിയിലേക്ക്. ബാഗല്ലൂരിലെ റിസോര്ട്ടില് ഞായറാഴ്ച മുതല് ഒളിവില് കഴിഞ്ഞ രാഹുല് അന്വേഷണ സംഘം എത്തുന്നതറിഞ്ഞ് രാവിലെ ഇവിടെ നിന്ന് മുങ്ങുകയായിരുന്നു. പിന്നീട് ബാഗല്ലൂരിലെ ഒരു വീട്ടിലേക്കും മാറിയിരുന്നു.
https://www.facebook.com/Malayalivartha
