അന്തരിച്ച നടനും മിമിക്രി കലാകാരനുമായ കൊല്ലം സുധിയുടെ ഭാര്യയാണ് രേണു സുധി. കൊല്ലം സുധിയുടെ മരണത്തിനുശേഷം കലാരംഗത്ത് സജീവമായ രേണുവിന് വലിയ വിമര്‍ശനങ്ങള്‍ നേരിടേണ്ടി വന്നിരുന്നു. പിന്നീട് മലയാളികള്‍ കണ്ടത് രേണു സുധിയുടെ അമ്പരപ്പിക്കുന്ന വളര്‍ച്ചയായിരുന്നു. ഇപ്പോഴിതാ നടനും സംവിധായകനുമായ ആലപ്പി അഷ്‌റഫ് രേണു സുധിയുടെ ചില തെറ്റുകള്‍ തന്റെ യൂട്യൂബിലൂടെ തുറന്നുപറഞ്ഞിരിക്കുകയാണ്.

'മലയാളികള്‍ ഇന്നും മറക്കാത്ത ഹാസ്യനടനാണ് കൊല്ലം സുധി. അദ്ദേഹത്തിന്റെ മരണവും പെട്ടന്നുണ്ടായതായിരുന്നു. ഇതോടെ ജീവിതത്തില്‍ പകച്ചുപോയ രേണു സുധിയെയും മക്കളെയും നാം കണ്ടതാണ്. പലരും അവര്‍ക്ക് സഹായങ്ങളുമായെത്തി. പലരും ജോലി വാഗ്ദാനം ചെയ്തിട്ടും രേണു സുധി സന്നദ്ധത പ്രകടിപ്പിച്ചില്ല. പിന്നീടാണ് അവര്‍ അഭിനയരംഗത്തേക്ക് കടന്നുവന്നത്. വിമര്‍ശനങ്ങള്‍ ഒരുപാട് നേരിട്ടിട്ടും രേണു സുധി തളരാതെ മുന്നോട്ടുപോയി.

പിന്നീടാണ് അവര്‍ ബിഗ്‌ബോസിലേക്കുപോയത്. അവിടെയും അവര്‍ക്ക് കടുത്ത വിമര്‍ശനങ്ങളാണ് നേരിടേണ്ടിവന്നത്. സെപ്റ്റിക് ടാങ്കെന്നും ഡാഗിനിയെന്നൊക്കെ ചിലര്‍ രേണുവിനെ വിളിച്ചു. അതിലൊന്നും പ്രതികരിക്കാതെ താനൊരു അമ്മയല്ലേയെന്നും വിധവയല്ലേയെന്നും പറഞ്ഞ് രേണു സുധി കരഞ്ഞു. അത് മലയാളികള്‍ ഒന്നടങ്കം ഏറ്റെടുക്കുകയായിരുന്നു. ബിഗ്‌ബോസില്‍ നിന്ന് പുറത്തിറങ്ങിയ രേണുവിന് പിന്നീട് വളര്‍ച്ചയുടെ ദിവസങ്ങളായിരുന്നു.

സുധിയുടെ മരണശേഷം അദ്ദേഹത്തിന്റെ സ്വന്തമായൊരു വീടെന്ന മോഹം സാദ്ധ്യമാക്കാന്‍ സഹായിച്ചവരാണ് ബിഷപ്പ് നോബിള്‍ ഫിലിപ്പും സന്നദ്ധ സംഘടനകളും. നോബിള്‍ ഫിലിപ്പ് തന്റെ കുടുംബസ്വത്തില്‍ നിന്നാണ് ഏഴ് സെന്റ് പുരയിടം നല്‍കിയത്. എന്നാല്‍ ഇന്നവര്‍ ഗുണ്ടകളുടെ ഭീഷണി ഭയപ്പെടുന്ന ഘട്ടത്തിലാണ്. അവര്‍ ജീവന് ഭീഷണിയുണ്ടെന്ന് വിലപിക്കുന്ന കാഴ്ചയാണ് നാം കാണുന്നത്.

തനിക്കെന്തെങ്കിലും സംഭവിച്ചാല്‍ അതിന്റെ പൂര്‍ണ ഉത്തരവാദിത്തം രേണു സുധിക്കായിരിക്കുമെന്ന് നോബിള്‍ ഫിലിപ്പ് പറഞ്ഞിട്ടുണ്ട്. തന്റെ വീട്ടിലേക്ക് അപരിചിതരായ രണ്ട് ഗുണ്ടകള്‍ വന്ന് ഫോട്ടെയെടുത്തിട്ട് നിന്നെ പിന്നെ കണ്ടോളാമെന്ന ഭീഷണി മുഴക്കി പോയെന്നും നോബിള്‍ ഫിലിപ്പ് പറഞ്ഞു. തന്നെ കൊലപ്പെടുത്താന്‍ വീട്ടില്‍ ആളുകള്‍ വന്നെന്നും പൊലീസിനും മുഖ്യമന്ത്രിക്കും പരാതി നല്‍കിയിട്ടുണ്ടെന്നും ബിഷപ്പ് പറയുന്നു.

ഒരു സ്ത്രീയെന്ന നിലയില്‍ ഒറ്റയ്ക്ക് ജീവിക്കാന്‍ മനക്കരുത്തും തന്റേടവും ആവശ്യമുണ്ട്. പക്ഷെ അഹങ്കാരവും ഗുണ്ടകളുടെയും ആവശ്യമുണ്ടോ? നിര്‍ദ്ധനരായവരുടെ കഞ്ഞിയിലാണ് രേണു പാറ്റയിട്ടത്. രേണു സുധിക്ക് തെറ്റുകള്‍ തിരുത്താന്‍ ഇനിയും സമയമുണ്ട്. ഇപ്പോള്‍ രേണു സുധി വേദനിപ്പിച്ചയെല്ലാവരും നല്ല മനസുകളുടെ ഉടമകളാണ്' ആലപ്പി അഷ്‌റഫ് പറഞ്ഞു.