സജി ചെറിയാന്റെ വിവാദ പരാമര്‍ശത്തിന് ശക്തമായ ഭാഷയില്‍ മറുപടിയുമായി മലപ്പുറം ജില്ലാ പഞ്ചായത്ത് വൈസ് പ്രസിഡന്റ് എ പി സ്മിജി. മുസ്ലിം ലീഗിനുമേലുള്ള നിങ്ങളുടെ വര്‍ഗീയത ആരോപണം വെറും പൂരപ്പറമ്പിലെ സീസണ്‍ കച്ചവടം പോലെയാണ്. തരാ തരം മുസ്ലിം ലീഗിനെ വിമര്‍ശിച്ച് താങ്കളെ പോലുള്ളവര്‍ പറഞ്ഞു കൊണ്ടേയിരിക്കുക. ഞങ്ങളെ മലപ്പുറം ഭാഷയില്‍ പറഞ്ഞാല്‍, അതൊക്കെ ഓത്തിച്ചാലിലെ അഴുക്കു വെള്ളം പോലെ ഒഴുകിപ്പോകും, അതൊന്നും ആരും ഗൗനിക്കില്ലെന്നാണ് മുസ്ലിം ലീഗിന്റെ യുവ നേതാവ് എ പി സ്മിജി ഫേസ്ബുക്ക് കുറിപ്പില്‍ വിശദമാക്കുന്നത്.

തലമുറകളിലൂടെ ഞങ്ങള്‍ അനുഭവിച്ച ജീവിത യാഥാര്‍ത്ഥ്യമാണ് മുസ്ലിം ലീഗിന്റെ മതേതരത്വം. മലപ്പുറം ജില്ലാ പഞ്ചായത്ത് യുഡിഎഫ് ക്യാന്‍ഡിഡേറ്റ് ലിസ്റ്റ് കണ്ണട വെച്ച് നോക്കുന്നത് നന്നാവും അപ്പോഴേ കാണാത്തത് കാണൂ. കണ്ടിട്ടും കാണാത്തത് പോലെ നടിക്കുന്നവര്‍ക്ക് ഇവിടെ മരുന്നില്ല. അവര്‍ വര്‍ഗ്ഗീയത പറഞ്ഞു നടക്കുമെന്നും എ പി സ്മിജി കുറിക്കുന്നു. മലപ്പുറം ജില്ലാ പഞ്ചായത്ത് യുഡിഎഫ് ക്യാന്‍ഡിഡേറ്റ് ലിസ്റ്റ് കണ്ണട വെച്ച് നോക്കുന്നത് നന്നാവും അപ്പോഴേ കണ്ണാത്തത് കണ്ണൂ……. കണ്ടിട്ടും കണ്ണാത്തത് പോലെ നടിക്കുന്നവര്‍ക്ക് ഇവിടെ മരുന്നില്ല…….. അവര്‍ വര്‍ഗ്ഗീയത പറഞ്ഞു നടക്കും. 'നിങ്ങള്‍ കാസര്‍കോട് നഗരസഭ റിസള്‍ട്ട് പരിശോധിച്ചാല്‍ മതി ആര്‍ക്കെല്ലാം എവിടെയെല്ലാം ഭൂരിപക്ഷമുണ്ടോ ആ സമുദായത്തില്‍ പെട്ടവരേ ജയിക്കൂ.

അങ്ങനെ കേരളം പോണോ? ഇന്ത്യയിലെ പല സംസ്ഥാനങ്ങളിലും അതല്ലേ സംഭവിക്കുന്നത്. മലപ്പുറം ജില്ലാ പഞ്ചായത്തില്‍ ജയിച്ചു വന്നവരുടെ പേരെടുത്ത് വായിച്ചുനോക്ക്. എന്താണ് നമ്മുടെ രാജ്യത്തിന്റെ സ്ഥിതി. നിങ്ങളിത് ഉത്തര്‍ പ്രദേശും മധ്യപ്രദേശുമാക്കാന്‍ നില്‍ക്കരുത്.' എന്നായിരുന്നു സജി ചെറിയാന്‍ നടത്തിയ വിവാദ പരാമര്‍ശം.

എ പി സ്മിജിയുടെ ഫേസ്ബുക്ക് കുറിപ്പിന്റെ പൂര്‍ണരൂപം

സി.പി.എമ്മില്‍ നിന്നും ബി.ജെ.പിയിലേക്കുള്ള ഒഴുക്ക് തടയാനാണോ സജി ചെറിയാന്‍ മുസ്ലിം വിരുദ്ധ പ്രസ്താവന നടത്തുന്നത് എന്ന് തോന്നിപ്പോവുന്നു..

ബഹുമാനപ്പെട്ട സജി ചെറിയാന്‍,

ഇത്തരം മുറിവൈദ്യം കൊണ്ടൊന്നും ചികിത്സിച്ച് ഭേദമാക്കാന്‍ കഴിയുന്ന രോഗമല്ല സി.പി.എമ്മിനെ ബാധിച്ചിട്ടുള്ളത്..

തദ്ദേശ തെരഞെടുപ്പിന് ശേഷവും അത് മനസ്സിലാവാത്തത് താങ്കളുടെ അടിമ മനസ്സിന്റെ കുഴപ്പമാണ്..

പിന്നെ,

മുസ്ലിം ലീഗിനുമേലുള്ള നിങ്ങളുടെ വര്‍ഗീയത ആരോപണം വെറും പൂരപ്പറമ്പിലെ സീസണ്‍ കച്ചവടം പോലെയാണ്.

തരാ തരം മുസ്ലിം ലീഗിനെ വിമര്‍ശിച്ച് താങ്കളെ പോലുള്ളവര്‍ പറഞ്ഞു കൊണ്ടേയിരിക്കുക..

ഞങ്ങളെ മലപ്പുറം ഭാഷയില്‍ പറഞ്ഞാല്‍

അതൊക്കെ ഓത്തിച്ചാലിലെ അഴുക്കു വെള്ളം പോലെ ഒഴുകിപ്പോഴും അതൊന്നും ആരും ഗൗനിക്കില്ല,

ഞാന്‍ പറയുന്നത്

വെറും വാക്കല്ല,

തലമുറകളിലൂടെ ഞങ്ങള്‍ അനുഭവിച്ച ജീവിത യാഥാര്‍ത്ഥ്യമാണ് മുസ്ലിം ലീഗിന്റെ മതേതരത്വം..

മലപ്പുറം ജില്ലാ പഞ്ചായത്തിന്റെ ജനറല്‍ സീറ്റായ വൈസ് പ്രസിഡണ്ട് പദവിയില്‍ ഇരുന്നു കൊണ്ട് അഭിമാനത്തോടെ ഞാന്‍ പറയുന്നു:

ബഹുമാനപ്പെട്ട സജി ചെറിയാന്‍,

താങ്കളുടെ വാക്ക്

വെറും ഓത്തിച്ചാലിലെ അഴുക്കു വെള്ളം മാത്രം..

അത് ഒഴുകി വന്ന താങ്കളുടെ ഹൃദയത്തെ ശുദ്ധീകരിക്കണം,

ഇല്ലെങ്കില്‍ വൈകാതെ മതേതര കേരളം താങ്കള്‍ക്കുള്ള ചികിത്സാ കുറിപ്പടി എഴുതിത്തരും..