തുണച്ചത് 'മാവോയിസ്റ്റ് ' ഉപകരണം
കൊലയാളി അമിഉള്‍ ഇസ്‌ലാമിന്റെ ഫോണ്‍വിവരങ്ങള്‍ കണ്ടെത്താന്‍ പൊലീസിന് തുണയായത് മാവോയിസ്റ്റുകളുടെ ഫോണ്‍ ചോര്‍ത്താനും വിവരങ്ങള്‍ ശേഖരിക്കാനുമായി വാങ്ങിയ ഉപകരണം. ജിഷയുടെ വീടിനടുത്തെ ടവറിലെ ഫോണ്‍കാളുകള്‍ വേര്‍തിരിച്ച് സമാനമായ പാറ്റേണിലുള്ള കാളുകളുടെ വിവരങ്ങള്‍ മിനിട്ടുകള്‍ക്കകം ഈ യന്ത്രം നല്‍കി. കൊലയ്ക്കുശേഷം സ്വിച്ച് ഓഫ് ചെയ്യുകയോ ഉപേക്ഷിക്കുകയോ ചെയ്ത നമ്പരുകള്‍ തെരഞ്ഞപ്പോഴാണ് അമിഉള്‍ ഇസ്‌ലാമിന്റെ നമ്പര്‍ കണ്ടെത്തിയത്. മലപ്പുറത്തുനിന്ന് ഈ യന്ത്രവും കമ്പ്യൂട്ടറും കൊച്ചിയിലെത്തിക്കുകയായിരുന്നു.
20 ലക്ഷത്തിലേറെ ഫോണ്‍കാളുകളില്‍ നിന്ന് അമിഉള്‍ ഇസ്‌ലാമിന്റെ ഫോണ്‍വിവരങ്ങള്‍ കണ്ടെത്തിയത് സൈബര്‍സെല്ലിലെ പത്തംഗസംഘമാണ്. ടി.പി. ചന്ദ്രശേഖരന്‍ വധക്കേസില്‍ പ്രതികളെ കുടുക്കിയതും ഈ പത്തംഗസംഘമായിരുന്നു. നാല് ജില്ലകളില്‍ നിന്നുള്ള സൈബര്‍വിദഗ്ദ്ധരാണ് ഈ സംഘത്തിലുള്ളത്.
കാഞ്ചീപുരത്ത് നിന്നെത്തിയ വിളി പിടിവള്ളിയായി
അമിയൂര്‍ ഉല്‍ ഇസ്ലാമിനെക്കുറിച്ചു സൂചനകിട്ടിയ പോലീസിന് ഇയാളെവിടെയെന്ന് കണ്ടെത്തുന്നത് വലിയവെല്ലുവിളിയായിരുന്നു. ഇയാള്‍ ഉപയോഗിച്ചിരുന്ന മൊബൈല്‍ ഫോണിന്റെ ഐ.എം. ഇ.ഐ നമ്പര്‍ കേന്ദ്രീകരിച്ച് സൈബര്‍ സെല്ലിന്റെ സഹായത്തോടെ നടത്തിയ അന്വേഷണത്തില്‍ അമിയൂറും ജിഷയും ഫോണില്‍ ബന്ധപ്പെട്ടിരുന്നതിന്റെ വിവരങ്ങളുണ്ടായിരുന്നു. എന്നാല്‍ ജിഷ മരിച്ചശേഷം ഇയാളുടെ ഫോണില്‍ നിന്ന് കോളുകളൊന്നും പോയിരുന്നില്ല. കൊലപാതകശേഷം അസമിലേക്ക് കടന്ന അമിയൂര്‍ സിം കാര്‍ഡ് ഉപേക്ഷിക്കുകയായിരുന്നു. എന്നാല്‍ ഫോണ്‍ കൈയില്‍ സൂക്ഷിച്ചു. ദിവസങ്ങള്‍ക്കുശേഷം സുഹൃത്തുക്കളുടെ സഹായത്തോടെ കാഞ്ചീപുരത്തെത്തി കൊറിയന്‍ കമ്പനിയില്‍ കരാര്‍ ജോലിക്ക് കയറിയശേഷമാണ് പുതിയ സിം കാര്‍ഡ് ഇട്ട് ഫോണ്‍ ഓണാക്കിയത്. ഇതോടെ സൈബര്‍ സെല്‍ ഫോണിന്റെ ലൊക്കേഷന്‍ കണ്ടെത്തുകയും പ്രതി അന്വേഷണ സംഘത്തിന്റെ നിരീക്ഷണത്തിലാകുകയുമായിരുന്നു. കാഞ്ചീപുരത്തുനിന്ന് ഇയാള്‍ ഫോണില്‍ ബന്ധപ്പെട്ട പെരുമ്പാവൂരിലെ സുഹൃത്തുക്കളെ കസ്റ്റഡിയിലെടുത്ത് ചോദ്യം ചെയ്തതോടെ അന്വേഷണവുമായി സഹകരിക്കാന്‍ ഇവര്‍ തയാറായി. സുഹൃത്തുക്കളുടെ സഹായത്തോടെ ഇയാള്‍ ജോലി ചെയ്യുന്ന സ്ഥലം ഉള്‍പ്പെടെയുള്ള വിവരങ്ങള്‍ ശേഖരിച്ച ശേഷമാണ് ഡിവൈ.എസ്.പി സുദര്‍ശന്റെ നേതൃത്വത്തിലുള്ള സ്‌ക്വാഡ് കാഞ്ചീപുരത്തേക്ക് തിരിച്ചത്. ജോലി കഴിഞ്ഞിറങ്ങിയ അമിയൂറിനെ പോലീസ് വളഞ്ഞതോടെ പ്രതിരോധമൊന്നുമില്ലാതെ കീഴടങ്ങി.
കൊലപാതകം നടക്കുന്നതിന് രണ്ടാഴ്ച മുമ്പ് അമിയൂറിനൊപ്പം ജിഷ സ്റ്റുഡിയോയില്‍ ഫോട്ടോ എടുക്കാന്‍ എത്തിയിരുന്നുവെന്ന വിവരവും ജിഷയുടെ മൊബൈല്‍ ഫോണില്‍നിന്നു ലഭിച്ച മൂന്നു പേരുടെ ചിത്രങ്ങളിലൊന്ന് അമിയൂറിന്റേതായിരുന്നുവെന്നുമുള്ള വിവരവും അന്വേഷണത്തില്‍ തുണയായി.
https://www.facebook.com/Malayalivartha
