കാള പെറ്റെന്നു കേള്‍ക്കുമ്പോള്‍ കയറെടുക്കുന്ന ഏഷ്യാനെറ്റിനോട് നമ്മള്‍ പ്രേക്ഷകര്‍ക്ക് ക്ഷമിക്കാം. രാജ്യം നന്നാക്കാന്‍ തീട്ടൂരം വാങ്ങിയിരിക്കുന്ന ഏഷ്യാനെറ്റ് സൗമ്യാവധക്കേസ് ഉത്തരവ് പുറത്തു വരുമ്പോള്‍ കാണിച്ച മറിമായങ്ങള്‍ക്കും ചാഞ്ചാട്ടങ്ങള്‍ക്കും കൈയും കണക്കുമില്ല. 

സൗമ്യയുടെ ഘാതകന് 7 വര്‍ഷം മാത്രം തടവ് എന്ന വാര്‍ത്ത ആദ്യം പുറത്തു വിട്ടത് ഏഷ്യാനെറ്റാണ്. തുടര്‍ന്ന് കേരളത്തിലെ മുഴുവന്‍ ചാനലുകളും അത് കോപ്പിയടിച്ചു. വൈകിട്ട് വരെ 7 വര്‍ഷം എന്ന ധാരണയില്‍ ചര്‍ച്ചകള്‍ നയിച്ചു. പിണറായി വിജയനും രമേശ് ചെന്നിത്തലയുമൊക്കെ കയറിന്റെ വാലില്‍ പിടിച്ചു. സന്ധ്യാവാര്‍ത്തയില്‍ ഏഷ്യാനെറ്റ് മലക്കം മറിഞ്ഞു. ഇപ്പോള്‍ കിട്ടിയത് എന്ന മട്ടില്‍ ഗോവിന്ദച്ചാമിക്ക് വധശിക്ഷ എന്ന വാര്‍ത്ത പുറത്തു വിട്ടു. ഒന്നുകില്‍ സുപ്രീം കോടതി ഉത്തരവ് വായിക്കാതെ കാണിച്ച മണ്ടത്തരമാകാം. ഇല്ലെങ്കില്‍ വായിച്ചിട്ട് മനസിലാകാത്തതുമാകാം. 

ഇത്തരത്തിലാണ് കേരളത്തിലെ മാധ്യമങ്ങളുടെ അവസ്ഥ. കാള പെറ്റെന്നു കേള്‍ക്കുമ്പോള്‍ കയറെടുക്കുന്നവരാണ് എല്ലാവരും, മാധ്യമങ്ങള്‍ പുറത്തു വിടുന്ന കാര്യങ്ങള്‍ എന്നും ഇങ്ങനെയാണ്. അഴിമതി ആരോപണങ്ങള്‍ റിപ്പോര്‍ട്ട് ചെയ്യുന്നതും ഇങ്ങനെയാണ്. ആരോപണം തെറ്റാണെന്നു കണ്ടാല്‍ ആരും ക്ഷമ പറയാറില്ല. മാധ്യമങ്ങള്‍ കരുതുന്നത് തങ്ങള്‍ക്കാണ് അപ്രമാദിത്വം എന്നാണ്. അവരെ ചോദ്യം ചെയ്യുന്നത് അവര്‍ക്കിഷ്ടമല്ല. ആരെങ്കിലും ചോദ്യം ചെയ്താല്‍ അവരുടെ ജീവനെടുക്കും. 

മാധ്യമപ്രവര്‍ത്തകര്‍ ശരിയാണോ എന്നു ചോദിച്ചാല്‍ ശരിയാണെന്ന് സ്വയം പറയും. എന്നാല്‍ ഒരിക്കലും അവര്‍ ശരിയായിരുന്നില്ല. സ്വന്തം നേട്ടങ്ങള്‍ മാത്രമാണ് അവര്‍ ശ്രദ്ധിക്കാറുള്ളത്. സ്വന്തം നേട്ടം കഴിഞ്ഞാല്‍ ജോലിചെയ്യുന്ന സ്ഥാപനങ്ങളുടെ നേട്ടങ്ങളെ കുറിച്ച് മാത്രം ആലോചിക്കും. അതു കൊണ്ടാണ് മന്ത്രിസഭായോഗം കഴിഞ്ഞുള്ള പത്ര സമ്മേളനങ്ങള്‍ പോലും വേണ്ടെന്നു വയ്ക്കാന്‍ പിണറായി തീരുമാനിച്ചത്.