പൂഴിത്തോട് ഉള്‍വനത്തില്‍ ശക്തമായ ഉരുള്‍പൊട്ടലിനെ തുടര്‍ന്നുണ്ടായ മലവെള്ളപ്പാച്ചിലില്‍ മരിച്ചവരുടെ എണ്ണം മൂന്നായി. ഞായറാഴ്ച രാത്രി 12.30ഓടെ അവസാനിപ്പിച്ച തെരച്ചില്‍ ഇന്ന് പുലര്‍ച്ചെ 6.30 ഓടെ വീണ്ടും തുടങ്ങി. കക്കുഴിയുള്ളകുന്നുമ്മല്‍ ശശിയുടെ മകന്‍ ഷജിന്‍ ശശി, പാറയുള്ളപറമ്പത്ത് രാജീവന്റെ മകന്‍ അക്ഷയ്‌രാജ് എന്നിവരുടെ മൃതദേഹങ്ങളാണ് ഇന്ന് രാവിലെ കണ്ടെത്തിയത്. ഷജിന്‍ ശശിയുടെ മൃതദേഹം പൂഴിത്തോട് ഭാഗത്ത് നിന്നും അക്ഷയ്‌യുടെ മൃതദേഹം ചെമ്പനോട കുറച്ചിപ്പാറ സെന്‍ട്രല്‍ മുക്കിന് സമീപം നിന്നുമാണ് കണ്ടെത്തിയത്. തൊട്ടില്‍പ്പാലം പാറക്കല്‍ രാമകൃഷ്ണന്റെ മകന്‍ രജീഷിന്റെ മൃതദേഹം ഞായറാഴ്ച രാത്രി തന്നെ കണ്ടെത്തിയിരുന്നു.
ആറ് പേരെയാണ് കാണാതായിരുന്നത്. മൂന്ന് പേര്‍ക്ക് വേണ്ടിയുള്ള തെരച്ചില്‍ പുരോഗമിക്കുകയാണ്. മൃതദേഹങ്ങള്‍ അപകട സ്ഥലത്ത് നിന്നും ഒരു കിലോമീറ്റര്‍ അകലെ നിന്നാണ് കണ്ടെത്തിയത്. കുറ്റിയാടി താലൂക്ക് ആശുപത്രിയില്‍ പോസ്റ്റ്‌മോര്‍ട്ടം നടത്തിയ ശേഷം മൃതദേഹങ്ങള്‍ ബന്ധുക്കള്‍ക്ക് വിട്ടുനല്‍കും.
ഞായറാഴ്ച വൈകുന്നേരം 4.30 ഓടെയാണ് മലവെള്ളപ്പാച്ചിലില്‍ ആറു പേരെ കാണാതായത്. ഒമ്പത് പേരടങ്ങുന്ന സംഘമാണ് പൂഴിത്തോട് ജലവൈദ്യുത പദ്ധതിക്കടുത്ത കനാലിന്റെ അടുത്തുള്ള പശുക്കടവ് കടന്തറപുഴയില്‍ കുളിക്കാനെത്തിയിരുന്നത്. ഇതില്‍ മൂന്ന് പേര്‍ നീന്തി രക്ഷപ്പെട്ടിരുന്നു. പേരാമ്പ്ര നിയോജക മണ്ഡലത്തിലെ ചക്കിട്ടപാറ ഗ്രാമ പഞ്ചായത്തില്‍ പെട്ട ഭാഗങ്ങളാണ് പൂഴിത്തോട് ചെമ്പനോട മേഖലകള്‍. നാദാപുരം നിയോജക മണ്ഡലത്തില്‍പ്പെട്ട എക്കല്‍ ഭാഗത്തെയും ബന്ധിപ്പിച്ചാണ് കടന്തറ പുഴ ഒഴുകുന്നത്. പുഴയിലിറങ്ങിയ സംഘത്തില്‍ പെട്ടവര്‍ ഇരുഭാഗത്തേക്കുമായി ഓടി മാറിയാണ് രക്ഷപ്പെടാന്‍ ശ്രമിച്ചത്. രണ്ടുപേര്‍ ചക്കിട്ടപാറ ഗ്രാമ പഞ്ചായത്തിലെ പൂഴിത്തോട് ഭാഗത്താണ് രക്ഷപ്പെട്ടെത്തിയത്.
മലവെള്ളപ്പാച്ചില്‍ സംഭവിക്കുമ്പോള്‍ പൂഴിത്തോട് ചെമ്പനോട എക്കല്‍ മേഖലകളില്‍ മഴയില്ലായിരുന്നു. ഈ സാഹചര്യത്തില്‍ പുഴയെ ചുമപ്പിച്ചു പാഞ്ഞെത്തി നിറഞ്ഞു കവിഞ്ഞ ജലം കണ്ട്് പുഴയോരവാസികള്‍ അമ്പരന്നു. മഴയില്ലാത്ത ഉരുള്‍പൊട്ടലിനു പിന്നിലെ കാരണമെന്താണെന്ന് ഇതുവരെ വ്യക്തമായിട്ടില്ല.
അതേസമയം ഞായറാഴ്ച രാത്രി വൈകിയും നടത്തിയ രക്ഷാപ്രവര്‍ത്തനത്തിന് കനത്ത മഴവെള്ളപ്പാച്ചിലും പാറക്കെട്ടുകളും തടസമായി. ചേലക്കാട് നിന്നുള്ള ഫയര്‍ഫോഴ്‌സും കുറ്റിയാടി, തൊട്ടില്‍പാലം പോലീസ് സ്‌റ്റേഷനുകളില്‍ നിന്നുള്ള പോലീസ് സംഘവുമാണ് രക്ഷാപ്രവര്‍ത്തനത്തിന് നേതൃത്വം നല്‍കിയത്. പുഴയോരത്തോടു ചേര്‍ന്നുള്ള പലഭാഗത്തും വെളിച്ചമില്ലാത്തത് രക്ഷാപ്രവര്‍ത്തനത്തെ ബാധിച്ചു.