ബി.ജെ.പി സമ്മേളനത്തിനുശേഷമുള്ള കോഴിക്കോട് കടപ്പുറത്തെ മാലിന്യ ദൃശ്യങ്ങള്‍ സോഷ്യല്‍ മീഡിയകള്‍ വഴി പ്രചരിപ്പിച്ച യുവാവിന് സംഘപരിവാര്‍ ഭീഷണി. കോഴിക്കോട് എം.ബി.എല്‍ മീഡിയ സ്‌കൂള്‍ വിദ്യാര്‍ഥി ഷമീര്‍ കാസിമിനുനേരെയാണ് ഭീഷണി.
നിലമ്പൂര്‍ പൂക്കോട്ടുപാടത്ത് ചൊവ്വാഴ്ച രാത്രി ബി.ജെ.പിയുടെ നേതൃത്വത്തില്‍ ഷമീറിനെതിരെ പ്രതിഷേധ ജാഥ നടത്തിയിരുന്നു. 'കയ്യുവെട്ടും കാലുവെട്ടും' എന്നിങ്ങനെയുള്ള പരസ്യമായ ഭീഷണി മുഴക്കിക്കൊണ്ടായിരുന്നു ജാഥയെന്ന് ഷമീര്‍ പറഞ്ഞു.
തന്റെ ചിത്രത്തിനൊപ്പം 'ഇവന്‍ നിലമ്പൂരാണ്. നിലമ്പൂര്‍ എവിടെക്കണ്ടാലും ശരിയാക്കിക്കൊള്ളൂ' എന്ന കുറിപ്പും ചേര്‍ത്ത് പല ഫേസ്ബുക്ക്, വാട്‌സ്ആപ്പു ഗ്രൂപ്പുകളും വഴി പ്രചരിപ്പിക്കുകയാണെന്ന് ഷമീര്‍ ഡൂള്‍ന്യൂസിനോടു പറഞ്ഞു. ഇതു ശ്രദ്ധയില്‍പ്പെട്ട തന്റെ സുഹൃത്തുക്കളാണ് തന്നെ ഇക്കാര്യം അറിയിച്ചതെന്നും അദ്ദേഹം പറയുന്നു.
പ്രധാനമന്ത്രി നരേന്ദ്രമോദിയുടെ പ്രസംഗത്തിനുശേഷമുള്ള കോഴിക്കോട് കടപ്പുറത്തിന്റെ ദൃശ്യം പകര്‍ത്തിയാണ് ഷമീര്‍ ഫെയ്‌സ്ബുക്കില്‍ പോസ്റ്റു ചെയ്തത്. 'സ്വച്ഛ്ഭാരത് കാമ്പയിന്റെ പിതാവ് നരേന്ദ്രമോദി വന്നതിനുശേഷം കോഴിക്കോട് കടപ്പുറം' എന്ന വിശേഷണത്തോടെയിട്ട ഈ വീഡിയോ ദൃശ്യങ്ങള്‍ സോഷ്യല്‍ മീഡിയകളില്‍ വൈറലായിരുന്നു. ഇതോടെയാണ് ഭീഷണിയുണ്ടായതെന്ന് ഷമീര്‍ പറഞ്ഞു.
ആദ്യ പോസ്റ്റിനുശേഷം ഫേസ്ബുക്ക് വഴി ഭീഷണി സന്ദേശങ്ങള്‍ വന്നിരുന്നു. 'ഞ്ഞ് വല്ലാതെ തുള്ളണ്ട' എന്ന തരത്തില്‍ കുറച്ചുമയത്തിലായിരുന്നു അത്. എന്നാല്‍ ഈ വീഡിയോ പുറത്തുവിട്ടതുപിന്നാലെ ബി.ജെ.പി പ്രവര്‍ത്തകരും ടൂറിസം വകുപ്പിലെ ശുചീകരണ തൊഴിലാളികളും കോഴിക്കോട് കടപ്പുറം വൃത്തിയാക്കിയിരുന്നു. അക്കാര്യം പരിശോധിച്ചശേഷം ഞാന്‍ അതുസംബന്ധിച്ച് ഒരു പോസ്റ്റിട്ടിരുന്നു. ഇതിനു താഴെ 'ബാപ്പ, ഉമ്മ, പെങ്ങള്‍ എന്നിങ്ങനെ കുടുംബത്തിലുള്ളവരെ പച്ചക്ക് തെറിവിളിക്കുന്ന കമന്റുകളാണ് വന്നത്.' ഷമീര്‍ പറയുന്നു.
ശനിയാഴ്ച പരിപാടി നടന്ന വേദിയിലെ മാലിന്യത്തിന്റെ ദൃശ്യങ്ങള്‍ ഞായറാഴ്ച രാവിലെയാണ് പകര്‍ത്തിയത്. ക്ലീനാക്കുമെന്ന് കരുതി ഞായറാഴ്ച ഉച്ചവരെ കാത്തിരുന്നു. എന്നിട്ടും വൃത്തിയാക്കാതായതോടെയാണ് ഫേസ്ബുക്കില്‍ പോസ്റ്റിട്ടതെന്നും അദ്ദേഹം പറയുന്നു.
ഈ സംഭവത്തിനുശേഷം തന്റെ ഒരു പൊളിറ്റിക്കല്‍ വ്യൂവില്‍ ബ്രാന്റ് ചെയ്യാനാണ് ശ്രമിക്കുന്നത്. ഒരു ജേണലിസ്റ്റ് വിദ്യാര്‍ഥിയെന്ന നിലയില്‍ മാത്രമാണ് താന്‍ ആ പോസ്റ്റിട്ടതെന്നും ഷമീര്‍ വ്യക്തമാക്കി. മോദിയുടെ സ്ഥാനത്ത് മറ്റേത് പാര്‍ട്ടിയുടെ നേതാവായിരുന്നെങ്കിലും താനിതു ചെയ്യുമായിരുന്നെന്നും അദ്ദേഹം പറഞ്ഞു.