സ്വാശ്രയ പ്രശ്‌നത്തില്‍ നിയമസഭയ്ക്ക് മുന്നില്‍ ഏഴ് ദിവസമായി നിരാഹാര സമരത്തിലായിരുന്ന എംഎല്‍എമാരായ ഷാഫി പറമ്പില്‍, ഹൈബി ഈഡന്‍ എന്നിവരെ ആശുപത്രിയിലേക്ക് മാറ്റി. ആരോഗ്യസ്ഥിതി വളരെ മോശമാണെന്നും ആശുപത്രിയിലേക്ക് മാറ്റണമെന്നും ഡോക്ടര്‍മാര്‍ കര്‍ശന നിലപാടെടുത്തതോടെയാണ് നേതൃത്വം ഇടപെട്ട് ഇവരെ മെഡിക്കല്‍ കോളജില്‍ പ്രവേശിപ്പിച്ചത്.

ഇവര്‍ക്ക് പകരം വി.ടി.ബല്‍റാം, റോജി എം. ജോണ്‍ എന്നിവര്‍ അനിശ്ചിതകാല നിരാഹാര സമരം തുടങ്ങി. മുസ്ലിം ലീഗ് എംഎല്‍എമാരായ ടി.വി.ഇബ്രാഹിം, പി.ഉബൈദുള്ള എന്നിവര്‍ അനുഭാവ സത്യാഗ്രഹവും ആരംഭിച്ചിട്ടുണ്ട്. സ്വാശ്രയ പ്രശ്‌നത്തില്‍ ഇന്ന് നടന്ന മാരത്തോണ്‍ ചര്‍ച്ചകളെല്ലാം പരാജയപ്പെട്ടതോടെയാണ് സമരം കൂടുതല്‍ ശക്തമാക്കാന്‍ യുഡിഎഫ് തീരുമാനിച്ചത്.

മുഖ്യമന്ത്രിയുടെ മര്‍ക്കടമുഷ്ടിയാണ് പ്രശ്‌നം കൂടുതല്‍ സങ്കീര്‍ണമാക്കിയതെന്ന് പ്രതിപക്ഷ നേതാവ് രമേശ് ചെന്നിത്തല കുറ്റപ്പെടുത്തി. ഫീസ് കുറയ്ക്കാന്‍ മാനേജ് മെന്റുകള്‍ സ്വയം സന്നദ്ധരായി മുന്നോട്ടുവന്നു. എന്നാല്‍ മുഖ്യമന്ത്രി ഇത് അനുവദിച്ചില്ല. മുഖ്യമന്ത്രി മാനേജ്‌മെന്റ് അസോസിയേഷന്‍ പ്രസിഡന്റിനെ പോലെയാണ് പ്രവര്‍ത്തിക്കുന്നത്. വളരെ നിഷേധാത്മകമായ സമീപനമാണ് മുഖ്യമന്ത്രിയുടേത്. മുഖ്യമന്ത്രിയാണ് ഇന്ന് നടന്ന ചര്‍ച്ചകളെല്ലാം പരാജയപ്പെടുത്തിയത്. ഇത്രയും ധിക്കാരപരമായ സമീപനം ഒരു മുഖ്യമന്ത്രിയും സ്വീകരിച്ചിട്ടില്ലെന്നും സമരവുമായി ശക്തമായി മുന്നോട്ടുപോകുമെന്നും രമേശ് ചെന്നിത്തല വ്യക്തമാക്കി.