ഭാര്യയുമായി സ്ഥിരം ഫേസ്ബുക്കില്‍ ചാറ്റ് ചെയ്തിരുന്നത് തന്റെ കൂട്ടുകാരനാണെന്നറിഞ്ഞ യുവാവ് കൂട്ടുകാരനെ ആക്രമിച്ചു. മലപ്പുറത്താണ് സംഭവം. ഫേസ്ബുക്കില്‍ ഭാര്യയുമായി ചാറ്റ് ചെയ്‌തെന്നാരോപിച്ച് യുവാവിനെ മര്‍ദിച്ച് കാലും കൈയും തല്ലിയൊടിച്ച കേസില്‍ ഭര്‍ത്താവുള്‍പ്പെടെ മൂന്നുപേരെ പോലീസ് അറസ്റ്റ് ചെയ്തിട്ടുണ്ട്.
പെരിന്തല്‍മണ്ണയിലെ ചാറ്റിംഗിന്റെ പേരിലെ കാലൊടിക്കലില്‍ അങ്ങാടിപ്പുറം പുത്തനങ്ങാടി സ്വദേശി ആലിക്കല്‍ ആസിഫ് (23), വലമ്പൂര്‍ ആലങ്ങാടന്‍ മുഹമ്മദ് മുഹ്‌സിന്‍ (22), തിരൂര്‍ക്കാട് അമ്പലക്കുത്ത് ഫാജിസ് മുഹമ്മദ് (24) എന്നിവരെയാണ് പൊലീസ് അറസ്റ്റുചെയ്തത്. കഴിഞ്ഞ 18ന് നടന്ന സംഭവത്തെക്കുറിച്ച് പൊലീസ് പറയുന്നത്. ഒന്നാംപ്രതിയായ ആസിഫിന്റെ ഭാര്യയുമായി ഫേസ്ബുക്കില്‍ ചാറ്റ് ചെയ്തതായി ആരോപിച്ച് ആസിഫിന്റെ സുഹൃത്തായ തിരൂര്‍ക്കാട് സ്വദേശി സബീലിനെയാണ് മര്‍ദിച്ചത്.
രാത്രി ഒന്‍പതോടെ പ്രതികള്‍ സബീലിനെ കാറില്‍ കയറ്റി പരിയാപുരം പള്ളിക്കുസമീപത്തെ വെട്ടുകല്ല് ക്വാറിയില്‍ കൊണ്ടുപോയി ഇരുമ്പുവടികൊണ്ട് കാലുകളുടെ മുട്ടിനുതാഴെയും ഇടതുകൈയിലും മര്‍ദിക്കുകയായിരുന്നു. അവശനായ സബീലിനെ പ്രതികളില്‍ ചിലര്‍ചേര്‍ന്ന് ടെറസില്‍നിന്ന് വീണതാണെന്നുപറഞ്ഞ് പെരിന്തല്‍മണ്ണയിലെ സ്വകാര്യാശുപത്രിയില്‍ പ്രവേശിപ്പിച്ചു.
പൊലീസിനോടുപറഞ്ഞാല്‍ കൊല്ലുമെന്ന് ഭീഷണിപ്പെടുത്തിയതിനാല്‍ സബീല്‍ വിവരം ആരോടും പറഞ്ഞില്ല. സബീലിന്റെ മൊഴിയില്‍ സംശയംതോന്നിയ വീട്ടുകാര്‍ കൂടുതല്‍ ചോദിച്ചപ്പോഴാണ് സംഭവം പുറത്തറിയുന്നത്. സബീലിന്റെ ഇരുകാലുകളും ഇടതുകൈയും പൊട്ടിയിരുന്നു. തുടര്‍ന്ന് കേസെടുത്ത് നടത്തിയ അന്വേഷണത്തിലാണ് പ്രതികള്‍ പിടിയിലായത്.
സോഷ്യല്‍ മീഡിയയിലെ ഇടപെടലുകളും മറ്റും സാമൂഹിക പ്രശ്‌നമായി മാറുന്നതിന്റെ തെളിവാണ് ഈ കേസ്. ഇത്തരം കേസുകള്‍ കേരളത്തിലുടനീളം കൂടുന്നതായി പൊലീസും വിലയിരുത്തുന്നു. ചാറ്റിംഗിലെ സൗഹൃദത്തിലൂടെ ചതിയും മറ്റും ചര്‍ച്ചയാകുന്നതിനിടെയാണ് സംശയത്തിന്റേതുള്‍പ്പെടെയുള്ള പ്രശ്‌നങ്ങളുടെ പേരില്‍ സോഷ്യല്‍ മീഡിയ ഇടപെടലുകള്‍ സംഘര്‍ഷത്തിലേക്ക് എത്തുന്നത്.