റെയില്‍വേ ട്രാക്കിലിരുന്ന് മദ്യപിച്ച മൂന്നംഗ സംഘത്തിലെ ഒരാള്‍ ട്രെയിന്‍ തട്ടി മരിച്ചു. രണ്ടു പേര്‍ ട്രെയിനിന്റെ ശക്തമായ കാറ്റേറ്റ് തെറിച്ച് സമീപത്തെ കുഴിയില്‍ വീണ് അബോധാവസ്ഥയിലായി. മരിച്ച തമിഴ്‌നാട് സ്വദേശിയെ തിരിച്ചറിഞ്ഞിട്ടില്ല.

ട്രാക്കിലിരുന്നവരെ ട്രെയിന്‍ തട്ടിയ വിവരം ലോക്കോ പൈലറ്റ് അറിയിച്ചതിനെ തുടര്‍ന്ന് സംഭവ സ്ഥലത്തെത്തിയ മെഡിക്കല്‍ കോളജ് പോലീസ് ഏറെ നേരം തെരച്ചില്‍ നടത്തിയെങ്കിലും കനത്ത ഇരുട്ടു മൂലം ആരെയും കണ്ടെത്താനായില്ല. പിന്നീട് രാത്രി 12ന് പോയ മറ്റൊരു ട്രെയിന്റെ വെളിച്ചത്തില്‍ മൃതദേഹം കണ്ടെത്തുകയായിരുന്നു.

ഈ സമയം താഴെ കുഴിയില്‍ വീണ രണ്ടുപേരും സുഖമായി കിടന്നുറങ്ങുകയായിരുന്നു. പിന്നീട് പോലീസ് ഇവരെ കണ്ടെത്തിയപ്പോഴാണ് കൂടെ മദ്യപിക്കാനുണ്ടായിരുന്ന ആള്‍ മരിച്ച വിവരം ഇവര്‍ അറിയുന്നത്.

വെളപ്പായ ബിവറേജിസിന്റെ ഷോപ്പില്‍ നിന്നും മദ്യം വാങ്ങിയെത്തി റെയില്‍വേ പാളത്തിലിരുന്ന് കഴിക്കുന്‌പോഴാണ് അപകടം ഉണ്ടായത്. തമിഴ്‌നാട് സ്വദേശിയായ 46 വയസുകാരനാണ് മരിച്ചത്. മൂന്നുപേരും ആക്രി സാധനങ്ങള്‍ പെറുക്കി വില്‍പ്പന നടത്തി ജീവിക്കുന്നവരാണ്. മെഡിക്കല്‍ കോളജ് പോലീസ് മേല്‍ നടപടികള്‍ സ്വീകരിച്ചു.