ഒടുവില്‍ രണ്ടു പക്ഷങ്ങളും ഒരുമിച്ചു . പകര്‍ച്ചപ്പനി പടരുന്ന സാഹചര്യത്തില്‍ വിമര്‍ശനങ്ങള്‍ അവസാനിപ്പിച്ച് പിണറായി സര്‍ക്കാരിന് പൂര്‍ണ പിന്തുണ പ്രഖ്യാപിച്ച് രംഗത്തെത്തിയിരിക്കുകയാണ് പ്രതിപക്ഷ നേതാവ് രമേശ് ചെന്നിത്തല.

പകര്‍ച്ചപ്പനി വ്യാപിക്കുന്നത് തടയുന്നതിന് സംസ്ഥാനത്തെങ്ങും മൂന്ന് ദിവസത്തെ ശുചീകരണ പ്രവര്‍ത്തനങ്ങള്‍ നടത്താനുള്ള സര്‍ക്കാര്‍ തീരുമാനത്തെ പ്രതിപക്ഷ നേതാവ് സ്വാഗതം ചെയ്തു. ഇക്കാര്യത്തില്‍ സര്‍ക്കാരിന് പൂര്‍ണ പിന്തുണ നല്‍കുമെന്ന് ചെന്നിത്തലപറഞ്ഞു. വാര്‍ത്ത കുറിപ്പിലാണ് അദ്ദേഹം ഇക്കാര്യം വ്യക്തമാക്കിയത്.

ഞായറാഴ്ച മുഖ്യമന്ത്രിക്ക് നല്‍കിയ നിവേദനത്തിലെ പ്രധാന ആവശ്യം ശുചീകരണ യജ്ഞം ആയിരുന്നുവെന്നും അത് മുഖ്യമന്ത്രി സ്വീകരിച്ചതില്‍ സന്തോഷമുണ്ടെന്നും ചെന്നിത്തല വ്യക്തമാക്കി. യുഡിഎഫ് എംഎല്‍എമംാര്‍ അവരവരുടെ മണ്ഡലത്തില്‍ ശുചീകരണ പ്രവര്‍ത്തനങ്ങള്‍ ആരംഭിച്ച് കഴിഞ്ഞതായി അദ്ദേഹം പറഞ്ഞു.

ഹരിപ്പാട് മണ്ഡലത്തിലെ ശുചീകരണ പ്രവര്‍ത്തനങ്ങള്‍ക്ക് താന്‍ നേതൃത്വം നല്‍കിയതായും അദ്ദേഹം വ്യക്തമാക്കി. പനി നിയന്ത്രിക്കുവാനായി ശുചീകരണ പ്രവര്‍ത്തനങ്ങള്‍ നേരത്തെ തന്നെ ആരംഭിക്കേണ്ടിയിരുന്നുവെന്നും കുറച്ച് വൈകിയെങ്കിലും സര്‍ക്കാര്‍ ഇപ്പോള്‍ നടപടി സ്വീകരിച്ചത് നന്നായി എന്നും അദ്ദേഹം പറഞ്ഞു.

കേരളത്തില്‍ പകര്‍ച്ചപ്പനി പടര്‍ന്നു പിടിക്കുന്നതില്‍ സര്‍ക്കാരിനെയും ആരോഗ്യ വകുപ്പിനെയും ചെന്നിത്തല കുറ്റപ്പെടുത്തിയിരുന്നു. എന്നാല്‍ ഈ സമയത്ത് എല്ലാവരും ഒറ്റക്കെട്ടായി നില്‍ക്കുകയാണ് വേണ്ടതെന്നും രാഷ്ട്രീയ മുതലെടുപ്പ് നടത്തരുതെന്നും ആരോഗ്യ മന്ത്രി പറഞ്ഞിരുന്നു.