നൊന്ത് പ്രസവിച്ച മകളെ പെറ്റമ്മ മൂന്ന് ലക്ഷം രൂപക്ക് വിറ്റു. കാട്ടാക്കട അഞ്ചുതെങ്ങിന്‍മൂട് മണ്ണാംകോണം കിഴക്കേക്കര വീട്ടില്‍ അനുപമ (27) ആണ് പ്രസവിച്ചു രണ്ടാം ദിവസം പെണ്‍കുഞ്ഞിനെ തമിഴ്‌നാട് സ്വദേശികള്‍ക്ക് വിറ്റത്. ഇക്കഴിഞ്ഞ ഒന്‍പതാം തീയതി പെണ്‍കുഞ്ഞിന് ജന്മം നല്‍കിയ അനുപമ തമിഴ്‌നാടുള്ള സുഹൃത്തു വഴി പതിനൊന്നാം തീയതി കുഞ്ഞിനെ വില്‍ക്കുകയായിരുന്നു. കുഞ്ഞിനെ വാങ്ങിയവര്‍ ചെന്നൈയിലുള്ള മറ്റാര്‍ക്കോ കുട്ടിയെ നല്‍കിയതായും സൂചനയുണ്ട്.

തമിഴ്‌നാട്ടില്‍ വിവാഹം കഴിച്ചു അയച്ച ഇവര്‍ ഭര്‍ത്താവുമായി അകന്നു കഴിയുന്നതിനിടെയാണ് മൂന്നാമത്തെ കുട്ടിക്ക് ജന്മം നല്‍കിയത്. മുഖ്യമന്ത്രിക്കു ഇമെയില്‍ വഴി ലഭിച്ച പരാതിയുടെ അടിസ്ഥാനത്തില്‍ അന്വേഷണം ആരംഭിച്ചതോടെയാണ് സംഭവം പുറത്തറിഞ്ഞത്. പ്രസവത്തില്‍ കുട്ടി മരിച്ചതായാണ് അയല്‍വാസികളോട് അനുപമ പറഞ്ഞിരുന്നത്.

ഇന്നലെ വൈകിട്ട് സംഭവം അന്വേഷിക്കാന്‍ വീട്ടിലെത്തിയ കാട്ടാക്കട ഗ്രാമപഞ്ചായത്ത് പ്രസിഡന്റ് അജിത, ആരോഗ്യ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ സുനിത എന്നിവരോടാണ് കുട്ടിയെ കോട്ടാര്‍ സ്വദേശികളായ ശരത്മാളു ദമ്പതികള്‍ക്ക് വളര്‍ത്താന്‍ നല്‍കിയതായി അനുപമ സമ്മതിച്ചത്. ആറ് വര്‍ഷം മുന്‍പാണ് മൊബൈല്‍ ഷോപ് ഉടമയായ ശരത്തിനെ അനുപമ പരിചയപ്പെടുന്നത്. കുട്ടികള്‍ ഇല്ലാതിരുന്ന ഇവര്‍ക്ക് മുന്‍പരിചയം പുതുക്കി അനുപമ കുട്ടിയെ വില്‍ക്കുകയായിരുന്നു. ഇതുമായി ബന്ധപ്പെട്ട് അനുപമ നല്‍കിയ നമ്പറില്‍ ബന്ധപ്പെട്ടപ്പോള്‍ ശരത് കുട്ടിയെ വാങ്ങിയ കാര്യം സ്ഥിരീകരിച്ചു. എസ്.എ.ടി ആശുപത്രിയുടെ പുറത്തു വെച്ചു കുട്ടിയെ കൈമാറികുയായിരുന്നുവെന്ന് ശരത് പറഞ്ഞു. അറുപതിനയിരം രൂപയും ആസ്പത്രി ചിലവും കുട്ടിക്കായി ശരത് നല്‍കി.
അനുപമയ്ക്കും മാതാവിനും മറ്റു രണ്ടു കുട്ടികള്‍ക്കും വസ്ത്രങ്ങളും ശരത് വാങ്ങി നല്‍കി. എന്നാല്‍ കുട്ടിയെ മൂന്ന് ലക്ഷം രൂപക്കാണ് ശരതിന് നല്‍കിയതെന്ന് അനുപമയുടെ മാതാവ് ശ്രീദേവി സമ്മതിച്ചു. തന്റെ മകള്‍ക്കു മൂന്നു കുട്ടികള്‍ ആയെന്നും സാമ്പത്തിക പരാധീനതയാണ് തന്നെയും മകളേയും കുട്ടിയെ മറ്റൊരാള്‍ക്ക് നല്‍കാന്‍ പ്രേരിപ്പിച്ചതെന്നുമാണ് ഇവര്‍ പറയുന്നത്.