റവന്യം മന്ത്രിയുടെ സ്വദേശത്തിനു സമീപം ചെമ്പനോട വില്ലേജ് ഓഫീസിന്‍ മുന്നില്‍ കര്‍ഷകന്‍ തൂങ്ങി മരിച്ചത് കഴിഞ്ഞ ദിവസം. തിരുവനന്തപുരം താലൂക്ക് ഓഫീസില്‍ മണ്ണെണ്ണ ഒഴിച്ച് ഒരാള്‍ ആത്മഹത്യക്ക് ശ്രമിച്ചത് ഒരു മാസം മുമ്പ്. വെളളറട വില്ലേജ് ഓഫീസ് കത്തിച്ചത് ഒരു വര്‍ഷം മുമ്പ്.

ഇടതു സര്‍ക്കാര്‍ അധികാരത്തിലെത്തിയപ്പോഴെങ്കിലും റവന്യു വകുപ്പില്‍ അഴിമതി അവസാനിക്കുമെന്ന് എല്ലാവരും കരുതിയതാണ്. ചന്ദ്രശേഖരനെ പോലെ സംശുദ്ധ രാഷ്ട്രീയത്തിന്റെ വിരലടയാളമുള്ള ഒരാള്‍ റവന്യുമന്ത്രിയായപ്പോള്‍ പഴയ ഇ.ചന്ദ്രശേഖരന്‍ നായരുടെയും പി.എസ് ശ്രീനിവാസന്റെയും പാരമ്പര്യം അദ്ദേഹം കാത്തു സൂക്ഷിക്കുമെന്ന് എല്ലാവരും കരുതി. അത് ശരിയാവുകയും ചെയ്തു.

മുന്നാര്‍, ദേവികുളം വിഷയങ്ങളില്‍ റവന്യ മന്ത്രി സ്വീകരിച്ച നിലപാടുകള്‍ പരക്കെ പ്രശംസിക്കപ്പെട്ടു. മുഖ്യമന്ത്രിയുമായി കൊമ്പുകോര്‍ക്കുന്ന സ്ഥിതി വിശേഷം വരെ വന്നെത്തി. അതേ സമയം സി.പി.ഐ ടാറ്റാ കമ്പനിയെ സഹായിക്കുന്നു എന്ന മുന്നണിയിലെ ആക്ഷേപത്തിന്റെ മുനയൊടിക്കാന്‍ മന്ത്രിക്കായില്ല. അച്ചുതാനന്ദന്‍ സര്‍ക്കാരിനാല്‍ നിയമിതയായ സര്‍ക്കാര്‍ അഭിഭാഷക സുശീലാ ഭട്ടിനെ മാറ്റിയത് മന്ത്രി ചന്ദ്രശേഖരന്റെ പാര്‍ട്ടിയാണ്. ടാറ്റായുടെ കൈവശമിരിക്കുന്ന അനധികൃത ഭൂമി പിടിച്ചെടുക്കാന്‍ സുശീലാ ഭട്ട് നടത്തിയ പരിശ്രമങ്ങള്‍ പ്രസിദ്ധമാണ്.

മന്ത്രി ചന്ദ്രശേഖരന്റെ കാലത്ത് തുടങ്ങിയതല്ല വില്ലേജ് ഓഫീസിലെ അഴിമതി. സാധാരണക്കാരെ നേരിട്ട് ബാധിക്കുന്ന അഴിമതിയാണിത്. ഇതിന് അറുതി വരുത്താന്‍ മന്ത്രി ചന്ദ്രശേഖരന് കഴിഞ്ഞില്ലെങ്കില്‍ ഇനിയാര്‍ക്കും കഴിയണമെന്നില്ല. കാരണം ഇടതുമുന്നണിയില്‍ സി.പി.ഐക്കാണ് സ്വതന്ത്രമായി പെരുമാറാന്‍ കഴിയുന്നത്. അവര്‍ക്ക് കെട്ടുപാടുകള്‍ കുറവാണ്.

വില്ലേജ് ഓഫീസുകള്‍ അഴിമതിമുക്തമാക്കാന്‍ ആവശ്യം ശക്തവും ധീരവുമായ നടപടികളാണ്. ഭയന്നിരുന്നിട്ട് ഇവിടെ ഒന്നും സംഭവിക്കാന്‍ പോകുന്നില്ല. സര്‍വീസ് സംഘടനകളെ പേടിച്ചിട്ടും കാര്യമില്ല.

വന്‍കിട കൈയേറ്റങ്ങള്‍ ഒഴിപ്പിക്കാന്‍ നടത്തുന്ന താത്പര്യം സ്വന്തം വകുപ്പിലെ അഴിമതിക്കാരെ പിടികൂടാനും കാണിക്കണം.

വില്ലേജ് ഓഫീസില്‍ ഭൂനികുതി അടയ്ക്കാനെത്തിയ കഴിഞ്ഞ ദിവസം കര്‍ഷകനാണ് ആത്മഹത്യ ചെയ്തത്. കഴിഞ്ഞ വര്‍ഷം ഇതിനെതിരെ അദ്ദേഹം വില്ലേജ് ഓഫീസിന് മുന്നില്‍ സത്യഗ്രഹം നടത്തിയിരുന്നു. അന്ന് നികുതി അടയ്ക്കാന്‍ അനുവദിച്ചു. ഇന്ന് അടയ്ക്കാന്‍ അനുവദിച്ചില്ല. അങ്ങനെയാണ് അദ്ദേഹം മരിച്ചത്. വിഷയം കൈമടക്കാണെങ്കില്‍ അത് കണ്ടെത്തി പിടിക്കപ്പെടുന്നവരെ പിരിച്ചുവിട്ടാല്‍ തീരാവുന്നതേയുള്ളു അഴിമതി.

അതല്ലാതെ ചാനല്‍ കാമറക്കും പത്രത്തിനും മുന്നില്‍ ആളായിട്ട് ഒരു കാര്യവുമില്ല.