ക്ഷേത്രങ്ങളിലെ ഉത്സവങ്ങളില്‍ നിറ സാന്നിധ്യമായിരുന്ന ഗജകുല പ്രജാപതി എന്ന് കീര്‍ത്തികേട്ട ആറന്മുള പാര്‍ഥന്‍ ചരിഞ്ഞു. ഇതോടെ വലിയ ബാലകൃഷ്ണനില്‍ തുടങ്ങിയ ആറന്മുള ക്ഷേത്രത്തിലെ ആന പാരമ്പര്യത്തിന്റെ തലയെടുപ്പ് അവസാനിച്ചു. പോസ്റ്റുമോര്‍ട്ടവും സംസ്‌കാരവും ഇന്ന് ആറന്മുള തറയില്‍ മുക്കിലുള്ള ആനപ്പറമ്പില്‍ നടക്കും.

ഇന്നലെ വൈകിട്ട് 3.30 ന് അവശനായി വീഴുകയും 3.45 ഓടെ ചരിയുകയുമായിരുന്നു. മുന്നോട്ട് ആഞ്ഞ് കൊമ്പു കുത്തിയാണ് വീണത്. രാവിലെ മുതല്‍ തീറ്റയെടുക്കാതെ അവശനായി രണ്ടു തവണ വീണെങ്കിലും പാപ്പാന്റേയും മറ്റുള്ളവരുടെയും ശ്രമഫലമായി എഴുന്നേറ്റിരുന്നു. വിവരം ദേവസ്വം ഉദ്യോഗസ്ഥരെയും മൃഗഡോക്ടറെയും അറിയിച്ചു.

എന്നാല്‍ വളരെ വൈകിയാണ് ഇവരൊക്കെ സ്ഥലത്തെത്തിയതെന്ന് നാട്ടുകാര്‍ പറയുന്നു. 11 ന് മൂന്ന് ഡ്രിപ്പുകള്‍ ഇട്ടെങ്കിലും ക്ഷീണത്തിന് മാറ്റമുണ്ടായില്ല. 48 വയസുള്ള പാര്‍ഥനെ ആറാം വയസില്‍ കോന്നി സ്വദേശി ഇപ്പോള്‍ കൊല്ലത്ത് സ്ഥിരമാക്കിയിരിക്കുന്ന എം.എസ്. നാരായണ പിള്ളയാണ് നടയ്ക്കിരുത്തിയത്.

കഴിഞ്ഞ 42 വര്‍ഷമായി ദേവസ്വം ബോര്‍ഡ് ക്ഷേത്രങ്ങളിലെ ഉത്സവങ്ങളില്‍ തലയെടുപ്പോടെ പാര്‍ഥന്‍ നിന്നു. ഇക്കഴിഞ്ഞ ആറന്മുള ക്ഷേത്രത്തിലെ പുഷ്പാഭിഷേകത്തിനാണ് പാര്‍ഥനെ അവസാനമായി എഴുന്നെള്ളിച്ചത്. കഴിഞ്ഞ ദിവസം മദപ്പാട് ലക്ഷണങ്ങളും പ്രകടമായിരുന്നു. ഗജരാജന്‍ രഘുനാഥന് സമമായ തുമ്പിക്കൈകളും കൊമ്പും മസ്തകവും കൊണ്ട് ഉത്തമനായിരുന്നു പാര്‍ഥന്‍.

2015 ല്‍ പൂഴിക്കുന്ന് ക്ഷേത്രത്തില്‍ വെച്ച് ഗജകുല പ്രജാപതി പട്ടം നല്കിയ പാര്‍ഥന് കഴിഞ്ഞ വര്‍ഷമാണ് അഴകിയ കര്‍മ്മ ദേവ പ്രിയന്‍ പട്ടവും ലഭിച്ചത്. പാര്‍ഥന്‍ തീറ്റയും വെള്ളവും കിട്ടാതെ പട്ടിണിയിലായ വിവരം അറിഞ്ഞ് ആന പ്രേമി സംഘം തീറ്റയും വെള്ളവും നല്‍കി സംരക്ഷിക്കാന്‍ ശ്രമിച്ചിരുന്നു. പാപ്പാന്മാരുടെ പീഡനവും ദേവസ്വം ഉദ്യോഗസ്ഥരുടെ അനാസ്ഥയും മൂലം പാര്‍ഥന്‍ കുറെ വര്‍ഷങ്ങളായി ചികിത്സയിലായിരുന്നു.

പാര്‍ഥന്റെ സംരക്ഷണത്തിന് ആളില്ലാതായതോടെ ഒന്നാം പാപ്പാനെ നിയമിക്കണമെന്ന നാട്ടുകാരുടെയും ആന പ്രേമികളുടെയും ആവശ്യം ദേവസ്വം ബോര്‍ഡ് നിരാകരിച്ചിരുന്നു. ദേവസ്വം ഉദ്യോഗസ്ഥരുടെ ശ്രദ്ധയില്‍പ്പെടുത്തിയിട്ടും സംരക്ഷണത്തിന് നടപടികളൊന്നും സ്വീകരിച്ചിട്ടില്ല. പാര്‍ഥന്

എഴുന്നേറ്റു നില്‍ക്കാന്‍ കഴിയാത്ത അവസ്ഥയില്‍ ക്രയിന്‍ ഉപയോഗിച്ച് എഴുന്നേല്‍പ്പിക്കുകയും ചികിത്സ ചെയ്ത് ഭാഗികമായി ആരോഗ്യം വീണ്ടെടുക്കുകയുമായിരുന്നു.