തമിഴ്‌നാട്ടില്‍ അക്രമം നടത്തിയ ഗോരക്ഷാ പ്രവര്‍ത്തകരെ ലാത്തികൊണ്ട് നേരിട്ട് തമിഴ്‌നാട് പൊലീസ്. നിയമപരമായി പശുക്കളെ കൊണ്ടു വരികയായിരുന്ന വ്യവസായിയെ കശാപ്പിനായി പശുവിനെക്കടത്തുന്നെന്നാരോപിച്ചായിരുന്നു ദിണ്ടിഗലില്‍ വെച്ച് ഗോ രാക്ഷാ പ്രവര്‍ത്തകര്‍ അക്രമിച്ചത്.
എന്നാല്‍ സംഭവം അറിഞ്ഞയുടന്‍ സ്ഥലത്തെത്തിയ പൊലീസ് അക്രമികള്‍ക്കെതിരെ കര്‍ശന നടപടി സ്വീകരിച്ചപ്പോള്‍ അലറി വിളിച്ചോടുകയായിരുന്നു അതുവരെ ഭീകരാന്തരീക്ഷം സൃഷ്ടിച്ച ഗോരക്ഷാ പ്രവര്‍ത്തകര്‍. നിയമപരമായി പൊളളാച്ചിയിലേക്ക് പശുക്കളെ കൊണ്ടുവരികയായിരുന്ന വ്യവസായിയെയാണ് ഗോരക്ഷാ പ്രവര്‍ത്തകര്‍ പഴനിയില്‍ വെച്ച് അക്രമിച്ചത്.
വ്യവസായിയെ ചോദ്യം ചെയ്ത ഗോരക്ഷാ പ്രവര്‍ത്തകര്‍ വാഹനത്തിന് കല്ലെറിഞ്ഞ് ആക്രമണം അഴിച്ചുവിടുകയായിരുന്നു. വലിയൊരു സംഘം പ്രവര്‍ത്തകര്‍ തന്നെയുണ്ടായിരുന്നു അക്രമത്തിനും വാഹനം തടഞ്ഞു വെക്കാനും. വ്യവസായിയെ മര്‍ദ്ദിച്ച ഇവര്‍ വാഹനം അടിച്ച് തകര്‍ക്കുകയും ചെയ്തു.
വിവരമറിഞ്ഞ് സ്ഥലത്തെത്തിയ പൊലീസ് ലാത്തിച്ചാര്‍ജ്ജ് തുടങ്ങിയ ഉടനെ അക്രമികള്‍ പലഭാഗത്തൂടെ ഓടി രക്ഷപ്പെടാന്‍ ശ്രമിക്കുകയായിരുന്നു. ഇവരെ പൊലീസ് ഓടിച്ചിട്ട് പിടികൂടുകയും ചെയ്തു.
ലാത്തിക്ക് മുന്നില്‍ നിലവിളിച്ചോടിയ ഗോരക്ഷാ പ്രവര്‍ത്തകര്‍ സമീപത്തെ അമ്പലത്തിലും മറ്റ് കെട്ടിടങ്ങളിലും ഓടി കയറി രക്ഷപ്പെടാന്‍ ശ്രമിച്ചെങ്കിലും പിന്തുടര്‍ന്നെത്തിയ പൊലീസ് ഇവരെ പിടികൂടി. അക്രമത്തില്‍ മറ്റു ചില വാഹനങ്ങള്‍ക്കും കേടുപാടുകള്‍ സംഭവിച്ചിട്ടുണ്ട്.