ബിവറേജസ് കോര്‍പറേഷന്‍ ജീവനക്കാര്‍ക്ക് ഓണത്തിനു 85,000 രൂപ തന്നെ ബോണസായി ലഭിക്കും. നേരത്തേയെടുത്ത തീരുമാനം മാറ്റേണ്ടെന്ന് മുഖ്യമന്ത്രി പിണറായി വിജയന്റെ നിലപാട്. എന്നാല്‍ ബെവ്‌കോയില്‍ ഡെപ്യൂട്ടേഷനായി വന്നവര്‍ക്ക് അടുത്ത വര്‍ഷം മുതല്‍ ബോണസ് നല്‍കില്ല. ഇവര്‍ക്ക് മാതൃ സ്ഥാപനങ്ങളില്‍ നിന്ന് ലഭിക്കുന്ന ബോണസാണ് ലഭിക്കുക. 

ശമ്പളത്തിന്റെ രണ്ടുമടങ്ങിലേറെ തുകയാണ് ഇത്തവണ ബെവ്‌കോയില്‍ മിക്ക ജീവനക്കാര്‍ക്കും ലഭിക്കുക. 19.25 ശതമാനം എക്‌സ്‌ഗ്രേഷ്യയും 10.25 ശതമാനം പെര്‍ഫോമന്‍സ് അലവന്‍സും ചേര്‍ത്ത് 29.50 ശതമാനം ബോണസാണ് ഇത്തവണ അനുവദിച്ചത്. വന്‍തുക ബോണസ് നല്‍കുന്നതിനെതിരെ ധനമന്ത്രി ഡോ. തോമസ് ഐസക് മുഖ്യമന്ത്രി പിണറായി വിജയന് കത്ത് നല്‍കിയിരുന്നു. 85,000 രൂപ വരെ ബോണസ് നല്‍കുന്നതു ധനപരമായ നിരുത്തരവാദിത്തമാണെന്നും ഇതു നിയന്ത്രിക്കണമെന്നുമായിരുന്നു മന്ത്രിയുടെ ആവശ്യം. കെ.എസ്.എഫ്.ഇ ജീവനക്കാരുടെ ഇന്‍സന്റെിവ് ഒമ്പതില്‍നിന്ന് ഏഴേമുക്കാല്‍ ശതമാനമായി വെട്ടികുറക്കുകയും ചെയ്ത മാതൃകയില്‍ ബെവ്‌കോ ജീവനക്കാരുടെയും ഇന്‍സെന്റിവ് വെട്ടിക്കുറക്കണമെന്നാണ് ധനവകുപ്പിന്റെ ആവശ്യം.

സര്‍ക്കാറിന് കീഴിലെ സ്ഥാപനത്തില്‍ ഇത്ര ഉയര്‍ന്ന ബോണസ് നല്‍കുന്നതിലെ വിയോജിപ്പാണ് ധനകവകുപ്പ് പ്രകടിപ്പിച്ചത്. വന്‍ തുക ഇന്‍സെന്റിവ് ലഭിക്കുന്നതിനെ തുടര്‍ന്ന് ബെവ്‌കോയിലേക്ക് ഡെപ്യൂട്ടേഷന്‍ വാങ്ങുന്നതിനായി ജീവനക്കാര്‍ മത്സരിക്കുന്നതായി റിപ്പോര്‍ട്ടുണ്ടായിരുന്നു. തങ്ങളുടെ ജോലിയുടെ പ്രത്യേകതയും ജോലി സമയവും കണക്കാക്കിയാണ് ബോണസെന്നാണ് ജീവനക്കാര്‍ പറയുന്നത്. തങ്ങളുടെ ബോണസിനെതിരെ വിമര്‍ശനം വന്ന സാഹചര്യത്തില്‍ കെ.എസ്.എഫ്.ഇയിലെ വന്‍ ഇന്‍സന്റെിവാണ് ബെവ്‌കോ ജീവനക്കാര്‍ ഉയര്‍ത്തിക്കാണിച്ചിരുന്നത്. കെ.എസ്.എഫ്.ഇ ജീവനക്കാരുടെ ഇന്‍സന്റെിവ് ഒമ്പതില്‍നിന്ന് ഏഴേമുക്കാലായി കുറക്കുകയായിരുന്നു.

ഉയര്‍ന്ന ഉദ്യോഗസ്ഥര്‍ക്ക് ഓണക്കാലത്ത് ഒന്നേകാല്‍ലക്ഷം രൂപ വരെ ഇന്‍സന്റെിവ് ലഭിച്ചിരുന്നു. ഇതു കുറച്ചതോടെ ഉയര്‍ന്ന ബോണസ് 75,000 രൂപയായി. സമാന പരിധി ബെവ്‌കോയിലും വേണമെന്നാണ് ധനവകുപ്പ് ആവശ്യം.