കേന്ദ്രമന്ത്രി അല്‍ഫോണ്‍സ് കണ്ണന്താനത്തിന്റെ പ്രവര്‍ത്തനം ന്യൂനപക്ഷങ്ങള്‍ക്ക് വേണ്ടി മാത്രമാണെങ്കില്‍ എതിര്‍ക്കുമെന്ന് ഹിന്ദുഐക്യവേദി നേതാവ് കെപി ശശികല. കേന്ദ്രമന്ത്രിയാകാന്‍ യോഗ്യരായവര്‍ ധാരാളമുണ്ടെന്നും താനും കേരളത്തിലെ ഓരോരുത്തരും മന്ത്രിയാകാന്‍ യോഗ്യരെന്നും ശശികല പറഞ്ഞു. സംസ്ഥാന െ്രെകസ്തവവിഭാഗങ്ങള്‍ക്കും ബിജെപിക്കും ഇടയില്‍ പാലമായി പ്രവര്‍ത്തിക്കുമെന്ന് കണ്ണന്താനം മന്ത്രിയായതിന് ശേഷം പറഞ്ഞിരുന്നു. ഇതിനെതിരെയാണ് ഇപ്പോള്‍ ശശികല രംഗത്തെത്തിയിരിക്കുന്നത്.
കണ്ണന്താനത്തിന്റെ പ്രവര്‍ത്തനങ്ങള്‍ ന്യൂനപക്ഷങ്ങള്‍ക്ക് വേണ്ടി മാത്രമാണെങ്കില്‍ ഒരു സംശയവും വേണ്ട ഹിന്ദുഐക്യവേദി അതിനെ എതിര്‍ത്തിരിക്കും. അഞ്ചുമന്ത്രി അല്ലെങ്കില്‍ ആറ് മന്ത്രിമാര്‍ അവരുടെ പ്രവര്‍ത്തനങ്ങള്‍ അവരുടെ സ്വന്തം മതത്തിന് വേണ്ടിയായാല്‍ അതിനെ എതിര്‍ക്കുക തന്നെ ചെയ്യും. അബ്ദുള്‍ കലാം പ്രസിഡന്റായപ്പോള്‍ മുസ്ലീം പ്രസിഡന്റായേ, മുസ്ലീം പ്രസിഡന്റായേ എന്ന് പറഞ്ഞ് ഒരു ഹൈന്ദവ സംഘടനകളും പുറത്തിറങ്ങിയിട്ടില്ല. കാരണം നിഷ്പക്ഷമായ നയം നടത്തുന്നവരുടെ പേരെന്തെന്നോ അവര്‍ മാമോദീസ മുങ്ങിയവരാണോ സുന്നത്ത് നടത്തിയവരാണോ എന്നൊന്നും വിഷയമല്ല. അവരുടെ പ്രവര്‍ത്തനമാണ് വിഷയം.
കെപി ശശികല

കണ്ണന്താനത്തില്‍ നിന്ന് ഞങ്ങള്‍ മതേതരമായ നീക്കം പ്രതീക്ഷിക്കുന്നുവെന്നും അങ്ങനെ തന്നെനടക്കുമെന്ന് തന്നെയാണ് ഞങ്ങളുടെ വിശ്വാസമെന്നും ശശികല കൂട്ടിച്ചേര്‍ത്തു. അതുപോലെ പറവൂര്‍ പ്രസംഗത്തിന്റെ പേരില്‍ കേസെടുക്കേണ്ടത് വിഡി സതീശനെതിരെയാണെന്നും വി.ഡി സതീശന്റേത് വോട്ടിന് വേണ്ടിയുള്ള നാടകമാണെന്നും ശശികല പ്രതികരിച്ചു. കേന്ദ്രമന്ത്രിസഭാ പുനസംഘടനയില്‍ കേരളത്തിന്റെ പ്രതിനിധിയായി ആര്‍എസ്എസ് സംസ്ഥാനനേതൃത്വം നിര്‍ദ്ദേശിച്ചത് കുമ്മനം രാജശേഖരനെയായിരുന്നു. എന്നാല്‍ ഇത് അവഗണിച്ച് കൊണ്ടാണ് ബിജെപി കേന്ദ്രനേതൃത്വം ഇടതുപക്ഷത്ത് നിന്ന് പാര്‍ട്ടിയിലെത്തിയ അല്‍ഫോണ്‍സ് കണ്ണന്താനത്തെ മന്ത്രിയാക്കിയത്. ഇതിലുള്ള സംഘപരിവാറിന്റെ അതൃപ്തി മറനീക്കി പുറത്ത് വരുന്നതാണ് ഹിന്ദു ഐക്യവേദി പ്രസിഡന്റ് കെപി ശശികലയുടെ പ്രസ്താവന.
കണ്ണന്താനത്തെ പൂര്‍ണ്ണമായും പിന്തുണക്കാന്‍ സംസ്ഥാനത്തെ സംഘപരിവാര്‍ സംഘനടകള്‍ തയ്യാറല്ലെന്ന് വ്യക്തമാക്കുന്നതാണ് ശശികലയുടെ പ്രതികരണം. നിലപാടുകളും നയങ്ങളും യോജിക്കുന്നതല്ലെങ്കില്‍ എതിര്‍ക്കുമെന്ന മുന്നറിയിപ്പ് കൂടിയാണ് ഹിന്ദു ഐക്യവേദി നല്‍കുന്നത്. മന്ത്രിയായ ശേഷം ആദ്യമായി നാട്ടിലെത്തിയ കണ്ണന്താനത്തിന് കേന്ദ്രനേതൃത്വത്തിന്റ നിര്‍ദ്ദേശപ്രകാരം നല്‍കിയ സ്വീകരണത്തിലും പല പ്രമുഖനേതാക്കളും വിട്ട് നിന്നിരുന്നു. ഇതിന് പിന്നാലെയാണ് ഹിന്ദുഐക്യവേദിയുടെ മുന്നറിയിപ്പ്.