രാഷ്ട്രീയക്കാരന്‍ എന്ന നിലയില്‍ രമേഷ് പിഷാരടിയെ എങ്ങനെ വിലയിരുത്തുന്നു, രാഷ്ട്രീയത്തിലിറങ്ങാന്‍ താത്പര്യമുണ്ടോ തുടങ്ങിയ ചോദ്യങ്ങള്‍ക്ക് മറുപടിയുമായി നടന്‍ കുഞ്ചാക്കോ ബോബന്‍. പിഷു നല്ല ജനപ്രതിനിധിയാകാന്‍ യോഗ്യതയുള്ള ആളാണെന്ന് കുഞ്ചാക്കോ ബോബന്‍ പറഞ്ഞു. പിഷുവിനെ നല്ല തമാശ പറയുന്നയാള്‍ എന്ന നിലയ്ക്കാണ് മലയാളികള്‍ക്ക് കൂടുതല്‍ പരിചയം. അതിനപ്പുറമുള്ള രമേഷ് പിഷാരടി ലോകത്തെ പറ്റി അറിവുള്ള , സമൂഹത്തെപ്പറ്റി അറിയാന്‍ ആഗ്രഹമുള്ള ഒരാളാണെന്ന് കുഞ്ചാക്കോ ബോബന്‍ പറയുന്നു. തന്റെ ഭാര്യ പ്രിയയുമായി പിഷാരടി പൊളിറ്റിക്‌സ് സംസാരിക്കും. ഇവര്‍ തമ്മിലുള്ള സംവാദം നല്ല രസമാണെന്ന് കുഞ്ചാക്കോ ബോബന്‍ പറയുന്നു. കലാകാരന്‍ എന്ന ലേബലില്‍ ഇലക്ഷന് ഇറങ്ങിയ ആളല്ല പിഷാരടി. തന്റെ പ്രചാരണത്തിന് വരണമെന്ന് താന്‍ നിര്‍ബന്ധം പിടിക്കില്ലെന്നും പിഷാരടി പറഞ്ഞിരുന്നുവെന്ന് കുഞ്ചാക്കോ ബോബന്‍

രമേഷ് പിഷാരടിക്ക് ചെറിയ ലൈറ്റടിച്ചാല്‍ പോലും മൈഗ്രെയ്ന്‍ വരുന്നയാളാണ്. അങ്ങനെയൊരാള്‍ പാലക്കാടന്‍ ചൂടില്‍ കുട പോലുമില്ലാതെ പ്രചാരണം നടത്തി. വിളിച്ചപ്പോള്‍ നല്ല തലേവദനയുണ്ടെന്ന് പറഞ്ഞു. ഏത് പാര്‍ട്ടിയോ വിശ്വാസമോ എന്തിനപ്പുറം മനുഷ്യനായി നല്ല കാര്യങ്ങള്‍ ചെയ്യണമെന്ന് വിശ്വസിക്കുന്ന ഒരാളാണ് താനെന്ന് കുഞ്ചാക്കോ ബോബന്‍ പറഞ്ഞു. രാഷ്ട്രീയത്തിലിറങ്ങുമോ എന്ന ചോദ്യത്തിനും കുഞ്ചാക്കോ ബോബന്‍ മറുപടി നല്‍കി 'അതിനുള്ള തയ്യാറെടുപ്പുകള്‍ വേണ്ടിവരും. സിനിമയിലേക്ക് വരണമെന്ന് ആഗ്രഹിച്ച് വന്നയാളല്ല ഞാന്‍. പിന്നീട് സിനിമയ്ക്ക് വേണ്ടിയുള്ള തയ്യാറെടുപ്പുകള്‍ വേണ്ടിവന്നു. രാഷ്ട്രീയത്തിലേക്ക് വരണമെങ്കില്‍ എനിക്ക് അതിനുള്ള ആഗ്രഹം ഉണ്ടാവണം. ഞാനതിന് കേപ്പബിള്‍ ആവണം. അതിനുള്ള തയ്യാറെടുപ്പും അധ്വാനവും ശ്രമവും ആത്മാര്‍ത്ഥമായി ഉണ്ടാവണം. അങ്ങനെയൊരു അവസ്ഥ വന്നാല്‍ ഞാനെന്നല്ല ആരാണെങ്കിലും ചെയ്യും'.

തുടര്‍ഭരണം ആണെങ്കിലും തുടരാത്ത ഭരണമാണെങ്കിലും നല്ല ഭരണം ഉണ്ടാവണമെന്നാണ് വോട്ട് ചെയ്ത് കുഞ്ചാക്കോ ബോബന്‍ പറഞ്ഞത്. വോട്ടവകാശം ഉത്തരവാദിത്വത്തോട് കൂടി നിര്‍വഹിക്കേണ്ടതാണെന്നും കുഞ്ചാക്കോ ബോബന്‍ പറഞ്ഞു. ജയിക്കുന്നവര്‍ക്ക് നാടിനെ നല്ല രീതിയില്‍ സേവിക്കാന്‍ കഴിയണം. കേരളത്തില്‍ നല്ല ഭരണമുണ്ടാവണം. സിനിമ മേഖലയില്‍ നിന്ന് ഒരുപാട് പേര്‍ രാഷ്ട്രീയത്തിലേക്ക് വരുന്നു. രമേഷ് പിഷാരടിക്ക് വ്യക്തിപരമായി വിജയാശംസകള്‍ നേരുന്നുവെന്നും നല്ല വ്യക്തിത്വങ്ങള്‍ ജയിച്ചു വരട്ടെയെന്നും കുഞ്ചാക്കോ ബോബന്‍ പറഞ്ഞിരുന്നു.