സിബിഎസ്ഇ പത്താം ക്ലാസ് പരീക്ഷാ ഫലത്തിൽ ഇത്തവണയും പെൺകുട്ടികൾ കരുത്തറിയിച്ചു. 93.70 ആണ്‌ വിജയശതമാനം. സാധാരണയായി മെയ് പകുതിയോടെ പ്രഖ്യാപിക്കാറുള്ള ഫലം, റെക്കോർഡ് വേഗത്തിൽ മൂല്യനിർണ്ണയം പൂർത്തിയാക്കി ഒരു മാസം മുൻപേ പുറത്തുവിടാൻ ബോർഡിന് കഴിഞ്ഞു.

94.99 ശതമാനം പെൺകുട്ടികൾ വിജയിച്ചപ്പോൾ ആൺകുട്ടികളുടെ വിജയശതമാനം 92.69 ആണ്. ട്രാൻസ്‌ജെൻഡർ വിഭാഗത്തിൽ 87.50 ശതമാനം പേർ വിജയിച്ചു. തിരുവനന്തപുരം മേഖല ഒന്നാമതായി. രാജ്യത്ത് ഏറ്റവും കൂടുതൽ വിജയശതമാനം രേഖപ്പെടുത്തിയത് തിരുവനന്തപുരം, വിജയവാഡ മേഖലകളാണ് (99.79%). 85.32 ശതമാനം വിജയം നേടിയ ഗുവാഹത്തിയാണ് ഏറ്റവും പിന്നിലുള്ളത്.

മികച്ച സ്കോറുകൾ: 55,000-ത്തിലധികം വിദ്യാർത്ഥികൾ 95 ശതമാനത്തിന് മുകളിൽ മാർക്ക് നേടി. 2.20 ലക്ഷം വിദ്യാർത്ഥികൾ 91 ശതമാനത്തിന് മുകളിൽ മാർക്ക് വാങ്ങിയതായും കണക്കുകൾ സൂചിപ്പിക്കുകയും ചെയ്യുന്നു. രണ്ടാം പരീക്ഷയ്ക്കുള്ള അവസരം: പുതിയ വിദ്യാഭ്യാസ നയത്തിന്റെ ഭാഗമായി ഇത്തവണ രണ്ട് ബോർഡ് പരീക്ഷകളാണ് ഏർപ്പെടുത്തിയിട്ടുള്ളത്.
ആദ്യ പരീക്ഷയിൽ മാർക്ക് കുറഞ്ഞവർക്കോ മെച്ചപ്പെടുത്താൻ ആഗ്രഹിക്കുന്നവർക്കോ മെയ് മാസത്തിൽ നടക്കുന്ന രണ്ടാമത്തെ പരീക്ഷ എഴുതാവുന്നതാണ്. ഇതിനായുള്ള അപേക്ഷകൾ സ്കൂളുകൾ വഴി സമർപ്പിക്കേണ്ടതാണ്. റാങ്ക് പട്ടികയില്ല: കുട്ടികൾക്കിടയിലെ അനാവശ്യ സമ്മർദ്ദം ഒഴിവാക്കാനായി ഇത്തവണയും മെറിറ്റ് ലിസ്റ്റോ ഡിവിഷനുകളോ (ഫസ്റ്റ് ക്ലാസ്, സെക്കൻഡ് ക്ലാസ്) ബോർഡ് പ്രഖ്യാപിച്ചിട്ടില്ല.

എന്നാൽ ഓരോ വിഷയത്തിലും ഏറ്റവും ഉയർന്ന മാർക്ക് വാങ്ങുന്ന 0.1 ശതമാനം വിദ്യാർത്ഥികൾക്ക് മെറിറ്റ് സർട്ടിഫിക്കറ്റ് നൽകും.