സംസ്ഥാനത്ത് ഹര്‍ത്താല്‍ പൂര്‍ണമായും ശാന്തമായിരുന്നില്ല. ഹര്‍ത്താല്‍ അനുകൂലികള്‍ സമാധാനമായി നീങ്ങുകയായിരുന്നില്ല. റോഡില്‍ ഓടിയ വാഹനങ്ങള്‍ തടഞ്ഞു നിര്‍ത്തുകയും തുറന്നിരിക്കുന്ന കടകള്‍ അടപ്പിക്കുകയും ചെയ്തു. ഇങ്ങനെ ചെയ്യുന്നത് ഹര്‍ത്താലിന്റെ ഭാഗമാണെങ്കിലും ഇവരുടെ പ്രകടനം കൊള്ളക്കാരെപ്പോലെയാണെന്നു പറയാം. കാരണം പ്രധാനമായി ബൈക്കിലായിരുന്നു ഹര്‍ത്താലനുകൂലികളുടെ യാത്ര.

ഹോണടിച്ചും കൂക്കിവിളിച്ചുമാണ് പ്രകടനം. ഗര്‍ഭിണിയേയും കൊണ്ട് പോയ വാഹനം തടഞ്ഞ് ഹര്‍ത്താല്‍ അനുകൂലികള്‍ അസഭ്യം പറഞ്ഞതായി പരാതി. കൊല്ലം ആറ്റിങ്ങള്‍ സ്വദേശിയായ ശ്യാംജിത്തും ഗര്‍ഭിണിയായ ഭാര്യ ദീപയ്ക്കും നേരെയാണ് ഹര്‍ത്താല അനുകൂലികളുടെ അതിക്രമമുണ്ടായത്. ഹര്‍ത്താലിന്റെ വിളംബര ജാഥ നടത്തുന്നതിനിടെയാണ് കോണ്‍ഗ്രസ് പ്രവര്‍ത്തകരുടെ അതിക്രമം. വാഹനം തടഞ്ഞിട്ട ശേഷം ഗ്ലാസില്‍ അടിക്കുകയും അസഭ്യം പറയുകയും ചെയ്തതായി ശ്യാംജിത്ത് പറഞ്ഞു.

ക്രമത്തില്‍ വാഹനത്തിന്റെ ഇരുവശത്തും പിന്നിലും കേടുപാടുണ്ടായി. ദേശീയപാതയില്‍ ഗതാഗതം പൂര്‍ണ്ണമായും തടസപ്പെടുത്തിയാണ് പ്രകടനം നടത്തിയതെന്ന് തിരുവനന്തപുരം ടെക്‌നോപാര്‍ക്കിലെ ജീവനക്കാരനായ ശ്യാം പറഞ്ഞു. പെട്ടെന്ന് വേദന അനുഭവപ്പെട്ടതിനാല്‍ കൊല്ലം മാടന്‍നടയിലെ ഭാര്യയുടെ വീട്ടില്‍ നിന്ന് തിരുവനന്തപുരത്തെ സ്വകാര്യ ആശുപത്രിയിലേക്ക് പോവുകയായിരുന്നു. പള്ളിമുക്കിലെത്തിയപ്പോഴാണ് പ്രകടനം മൂലം പോകാനാവാത്ത സ്ഥിതിയുണ്ടായത്. അതുവഴി വന്ന ഡി.ജി.പിയുടെ വാഹനത്തിനൊപ്പം പോകാന്‍ സ്ഥലത്തുണ്ടായിരുന്ന പോലീസുകാരന്‍ നിര്‍ദ്ദേശിച്ചപ്പോഴാണ് പിന്നാലെ പോയത്.

എന്നാല്‍, പോലീസ് വാഹനം വിട്ടശേഷം പ്രവര്‍ത്തകര്‍ കാര്‍ തടയുകയായിരുന്നെന്ന് ശ്യാംജിത്ത് പറയുന്നു. അസഭ്യം പറഞ്ഞുകൊണ്ടാണ് പലരും വാഹനം ആക്രമിച്ചത്. കാറിന്റെ ഡാഷ്‌ബോര്‍ഡിലെ ക്യാമറയില്‍ നിന്നുള്ള ദൃശ്യങ്ങളില്‍ ഇതെല്ലാം വ്യക്തമാണ്. സ്ത്രീകളുള്‍പ്പെടെ വാഹനത്തിനുള്ളില്‍ സംസാരിക്കുന്നതു കേള്‍ക്കാം. പ്രകടനക്കാരില്‍ ചിലര്‍ ഇടപെട്ട് വാഹനം കടന്നുപോകുമ്പോഴും വഴിയില്‍ നില്‍ക്കുന്നവര്‍ ചവിട്ടുന്നതിന്റെയും മറ്റും ശബ്ദവും ദൃശ്യങ്ങളില്‍ വ്യക്തമാണ്. ആക്രമണത്തെക്കുറിച്ചുള്ള ശ്യാംജിത്തിന്റെ പരാതിയില്‍ ഇരവിപുരം പോലീസ് കേസെടുത്തിട്ടുണ്ട്.