ചാലക്കുടിയിലെ റിയല്‍ എസ്‌റ്റേറ്റ് ബ്രോക്കര്‍ വി.എ. രാജീവിനെ കൊലപ്പെടുത്തിയ കേസില്‍ ഏഴാം പ്രതിയാക്കാന്‍ ഒരുങ്ങവെ അഡ്വ. സി.പി. ഉദയഭാനുവിന്റെ തൃപ്പൂണിത്തുറയിലെ വീട്ടിലും ഓഫീസിലും പൊലീസ് പരിശോധന നടത്തി.
രാജീവുമായുണ്ടായിരുന്ന ഭൂമിയിടപാടിന്റെ രേഖകള്‍ കണ്ടെത്തുന്നതിന് വേണ്ടിയാണ് പരിശോധന. തൃശൂരില്‍ നിന്നുള്ള പൊലീസ് സംഘമാണ് പരിശോധന നടത്തുന്നത്. രാജീവ് കൊല്ലപ്പെട്ട ദിവസം പ്രതികളും ഉദയഭാനുവും പല തവണ ഫോണില്‍ ബന്ധപ്പെട്ടിരുന്നെന്നും ഇതിനുള്ള തെളിവുകളുണ്ടെന്നും സര്‍ക്കാര്‍ ഹൈക്കോടതിയില്‍ ഇന്നലെ ബോധിപ്പിച്ചിരുന്നു.
അതേസമയം, ഉദയഭാനുവിനെ അറസ്‌റ്റ് ചെയ്യുന്നത് ഹൈക്കോടതി വിലക്കിയിട്ടുണ്ട്. എന്നാല്‍, ക്രിമിനല്‍ നടപടിചട്ടത്തിലെ 41 എ പ്രകാരം മുന്‍കൂര്‍ നോട്ടീസ് നല്‍കി ഉദയഭാനുവിനെ ചോദ്യം ചെയ്യാന്‍ പൊലീസിന് കഴിയും. ഉദയഭാനുവിന്റെ മുന്‍കൂര്‍ ജാമ്യാപേക്ഷ ഒക്ടോബര്‍ 23 ലേക്ക് കോടതി മാറ്റിയിട്ടുണ്ട്.

സെപ്തംബര്‍ 30 നാണ് രാജീവിനെ ചക്കര ജോണിയടക്കമുള്ള പ്രതികള്‍ തട്ടിക്കൊണ്ടുപോയി ശ്വാസം മുട്ടിച്ച് കൊലപ്പെടുത്തിയത്. ഉദയഭാനുവിന് ഇതില്‍ ബന്ധമുണ്ടെന്ന് കേസിന്റെ തുടക്കം മുതല്‍ ആരോപണം ഉയര്‍ന്നിരുന്നു. റിയല്‍ എസ്‌റ്റേറ്റ് ബിസിനസുമായി ബന്ധപ്പെട്ട് രാജീവ് നല്‍കാനുള്ള തുകയ്ക്കുവേണ്ടി പ്രതികള്‍ ഇയാളെ തട്ടിക്കൊണ്ടുപോയി കൊല നടത്തിയെന്നാണ് പ്രോസിക്യൂഷന്‍ കേസ്.

രാജീവ് വധക്കേസില്‍ തനിക്കെതിരെ ആരോപണം ഉയര്‍ന്ന സാഹചര്യത്തിലാണ് ഉദയഭാനു മുന്‍കൂര്‍ ജാമ്യാപേക്ഷ നല്‍കിയത്. ഉദയഭാനുവിന്റെ പങ്കാളിത്തം തെളിയിക്കുന്ന വസ്തുതകള്‍ വ്യക്തമാക്കി മുദ്രവെച്ച കവറില്‍ റിപ്പോര്‍ട്ട് നല്‍കിയിട്ടുണ്ട്.