പിണറായി വിജയന്‍ അനുകരിക്കുന്നത് വി.എസ്. അച്ചുതാനന്ദനെ. വി എസിന്റെ 2006-2011 കാലഘട്ടത്തിലെ ഭരണം അനുകരിക്കാമെങ്കില്‍ തുടര്‍ ഭരണം ലഭിക്കുമെന്ന ഉപദേശത്തിന്റെ അടിസ്ഥാനത്തിലാണ് മുഖ്യമന്ത്രി ഭരണം നടത്തുന്നത്.

2011 ല്‍ അച്യുതാനന്ദന്‍ അധികാരത്തില്‍ വരാതിരിക്കാന്‍ പിണറായിയും സംഘവും കളിച്ചതു കാരണമാണ് മൂന്നു സീറ്റില്‍ അദ്ദേഹത്തിന് ഭരണം പോയത്. ഇതും പിണറായിക്കറിയാം.

മുഖ്യമന്ത്രിയെ ഉപദേശിക്കുന്നത് പ്രൊഫഷണല്‍ ടീമാണ്. അതില്‍ കേരളത്തിന് അകത്തും പുറത്തുമുള്ള മാധ്യമ പ്രവര്‍ത്തകരും രാഷ്ട്രീയ ചിന്തകരും സാംസ്‌കാരിക പ്രവര്‍ത്തകരുമുണ്ട്. നരേന്ദ്ര മോദിക്കും കേന്ദ്രത്തില്‍ ഇത്തരമൊരു സംഘം ഉപദേശകരുണ്ട്. അതേ ലൈന്‍ തന്നെയാണ് പിണറായി പിന്തുടരുന്നത്. സംഘത്തില്‍ സി പി എം വിശ്വാസികള്‍ അല്ലാത്തവരുമുണ്ട്. എന്നാല്‍ എല്ലാവരും പിണറായിക്ക് വിശ്വസ്തര്‍ തന്നെയാണ്.

പിണറായി ഇവരുടെ ഉപദേശമനുസരിച്ചാണ് പ്രവര്‍ത്തിക്കുന്നത്. ഓരോ ദിവസവും ഇവര്‍ അന്ന് വേണ്ട ഉപദേശം നല്‍കും. ചില കാര്യങ്ങളില്‍ മാധ്യമ പ്രവര്‍ത്തകരുടെ ചോദ്യങ്ങളില്‍ നിന്നും ഒഴിഞ്ഞു മാറുന്നത് ഇവരുടെ ഉപദേശത്തിന്റെ അടിസ്ഥാനത്തിലാണ്.

അഴിമതി രഹിത ഭരണമാണ് പിണറായി ലക്ഷ്യമിടുന്നത്. അതിനാണ് ഇന്ന് മാര്‍ക്കറ്റ്. അഴിമതിക്കാരായ നേതാക്കളെ ജനം ചവറ്റുകൊട്ടയിലെറിയും എന്നതിന്റെ ഉദാഹണമാണ് ഉമ്മന്‍ ചാണ്ടി. സോളാര്‍ കേസ് ഇത്രയും കടുപ്പിക്കാന്‍ പിണറായി ആലോചിച്ചതല്ല. എന്നാല്‍ പരമാവധി വിവാദമുണ്ടാക്കണമെന്നാണ് പിണറായിക്ക് ലഭിച്ച ഉപദേശം. എ ഗ്രൂപ്പ് നേതാക്കളെ കൂട്ടത്തോടെ വെള്ളത്തിലാക്കിയതോടെ ഐ ഗ്രൂപ്പിന്റെ പിന്തുണയും അദ്ദേഹം ആഗ്രഹിക്കുന്നു. രമേശ് ചെന്നിത്തലയെ ബി ടീമാക്കാനാണ് പിണറായി ഉദ്ദേശിക്കുന്നത്. എം.പി വീരേന്ദ്രകുമാറിനെ ഒഴികെ മറ്റൊരു ഘടക കക്ഷിയെയും സ്വീകരിക്കാനും പിണറായി ഉദ്ദേശിക്കുന്നില്ല. ഒന്നിലും കോടിയേരി പറയുന്നത് അന്ധമായി സ്വീകരിക്കുന്നില്ല. പകരം തനിക്ക് ലഭിക്കുന്ന ഉപദേശം അനുസരിച്ച് മുന്നോട്ടു പോകുന്നു.

അഴിമതിക്കാരെയും സ്ത്രീപീഡകരെയും ജയിലില്‍ അടയ്ക്കുക എന്നതാണ് പിണറായിയുടെ ലൈന്‍. വി എസിന്റെ ലൈന്‍ തന്നെയാണ് അത്. സരിത മാനഭംഗ കേസില്‍ അന്വേഷണ ഉദ്യോഗസ്ഥര്‍ ഉമ്മന്‍ ചാണ്ടി കുറ്റക്കാരനാണെന്ന് കണ്ടാല്‍ അദ്ദേഹത്തെ അറസ്റ്റ് ചെയ്യും. അതില്‍ പിണറായി ഇടപെടുക പോലുമില്ല. ദിലീപ് വിഷയത്തില്‍ സംഭവിച്ചത് എന്താണോ അതാണ് ഉമ്മന്‍ ചാണ്ടിയുടെ കാര്യത്തിലും സംഭവിക്കുക.

നായനാര്‍ സര്‍ക്കാരില്‍ കുഞ്ഞാലിക്കുട്ടിക്ക് ലഭിച്ചതു പോലെ ഈ പരിഗണനയും ഉമ്മന്‍ ചാണ്ടിക്ക് ലഭിക്കില്ല. അധികാരത്തിലെത്തിയ കാലത്ത് എല്ലാവരോടും മനുഷ്യത്വപരമായാണ് പിണറായി പെരുമാറിയിരുന്നത്. എന്നാല്‍ അതുകൊണ്ടൊന്നും കാര്യമില്ലെന്ന് പിണറായി മനസിലാക്കി. പിണറായി സര്‍ക്കാരിനെ കുറിച്ച് പൊതുജനങ്ങള്‍ക്കിടയിലും ഇപ്പോള്‍ മതിപ്പുണ്ട്. പിണറായിയും ചാണ്ടിയും ചേര്‍ന്ന് എല്ലാം കോംപ്ലിമെന്റാക്കുമെന്നാണ് ജനം കരുതിയിരുന്നത്. അതിനാണ് ഇപ്പോള്‍ അവസാനം ഉണ്ടായിരിക്കുന്നത്.