ആകാക്ഷയോടെ കേരളം... നടിയെ ആക്രമിച്ച കേസിലെ കുറ്റപത്രം ഈ ആഴ്ച സമര്പ്പിക്കും
നടിയെ ആക്രമിച്ച കേസില് നടന് ദിലീപിനെതിരെയായ കുറ്റപത്രം ഈ ആഴ്ച തന്നെ അന്വേഷണ സംഘം കോടതിയില് സമര്പ്പിക്കും. അങ്കമാലി മജിസ്ട്രേറ്റ് കോടതിയിലാണ് കുറ്റപത്രം സമര്പ്പിക്കുന്നത്. പുറം ലോകം കാണാന് പറ്റാത്ത വകുപ്പുകളാണ് കുറ്റപത്രത്തിലുള്ളതെന്നാണ് അറിയാന് കഴിയുന്നത്.
നടി ആക്രമണത്തിന് ഇരയായി എട്ടു മാസം തികയുന്ന ഇന്ന് കുറ്റപത്രം സമര്പ്പിക്കാനാണ് അന്വേഷണ സംഘം തീരുമാനിച്ചതെങ്കിലും മജിസ്ട്രേറ്റ് അവധിയായതിനാല് ദിവസം മാറ്റുകയായിരുന്നു. കുറ്റപത്രം സമര്പ്പിക്കുന്നതിന് മുന്നോടിയായി നിയമവിദഗ്ധരും മുതിര്ന്ന പൊലീസ് ഉദ്യോഗസ്ഥരും പങ്കെടുക്കുന്ന യോഗം ചേരും. ഈ യോഗത്തിന് ശേഷമായിരിക്കും കുറ്റപത്രം സമര്പ്പിക്കുക. കേസില് ദിലീപിന് ജാമ്യം ലഭിച്ചതോടെ കുറ്റപത്രം വൈകുമെന്ന് റിപ്പോര്ട്ടുകള് ഉണ്ടായിരുന്നു. എന്നാല്, കുറ്റപത്രം സമര്പ്പിക്കുന്നത് നീട്ടിക്കൊണ്ട് പോകില്ലെന്നും ഈ ആഴ്ച തന്നെ കോടതിയില് സമര്പ്പിക്കുമെന്നും ആലുവ റൂറല് എസ്.പി എ.വി ജോര്ജ് പറഞ്ഞു.
ഈ മാസം ഏഴിന് കുറ്റപത്രം സമര്പ്പിക്കുമെന്നാണ് ആദ്യം അന്വേഷണ സംഘം വ്യക്തമാക്കിയിരുന്നത്. ഇതിനിടെ, അന്വേഷണ സംഘത്തെ ഞെട്ടിച്ച് ദിലീപിന് ഹൈക്കോടതിയില് നിന്നും ജാമ്യം ലഭിച്ചു. ഇതോടെ, കുറ്റപത്രം തിരക്കിട്ട് സമര്പ്പിക്കേണ്ട സാഹചര്യമില്ലെന്ന നിലപാടിലേക്ക് പൊലീസ് എത്തി. കേസിന്റെ അന്വേഷണച്ചുമതല ഉണ്ടായിരുന്ന എസ്.പി സുദര്ശനെ സോളാര് കേസുമായി ബന്ധപ്പെട്ട പ്രത്യേക അന്വേഷണ സംഘത്തിലുണ്ടായിരുന്ന മറ്റ് ഉദ്യോഗസ്ഥര്ക്കൊപ്പം സ്ഥലം മാറ്റിയതോടെ വീണ്ടും കുറ്റപത്രം വൈകുമെന്ന റിപ്പോര്ട്ടുകള് പുറത്ത് വന്നു. എന്നാല്, ദിലീപിനെതിരായ കുറ്റപത്രം തയ്യാറായ സാഹചര്യത്തില് എത്രയും വേഗത്തില് വിചാരണ കോടതിയില് സമര്പ്പിക്കാമെന്ന തീരുമാനത്തിലേക്ക് അന്വേഷണ സംഘം എത്തുകയായിരുന്നു.
കേസില്, സമഗ്രമായ കുറ്റപത്രം തന്നെയാണ് പൊലീസ് തയ്യാറാക്കിയിട്ടുള്ളത്. ഇതുവരെ അന്വേഷണ സംഘം വെളിപ്പെടുത്താത്ത ചില നിര്ണ്ണായക വിവരങ്ങളും കുറ്റപത്രത്തില് ഉണ്ടെന്നാണ് സൂചന. പ്രതികളുടെ ജാമ്യാപേക്ഷ പരിഗണിക്കുന്ന വേളകളില് മുദ്രവച്ച കവറില് കോടതിയില് നേരിട്ട് സമര്പ്പിച്ചിരുന്ന വിവരങ്ങളാണിത്.
കൂട്ടമാനഭംഗം, ഗൂഢാലോചന, തട്ടിക്കൊണ്ടുപോകല്, തെളിവു നശിപ്പിക്കല്, പ്രതിയെ സംരക്ഷിക്കല്, തൊണ്ടി മുതല് സൂക്ഷിക്കല്, ഭീഷണി, അന്യായമായി തടങ്കലില് വയ്ക്കല് തുടങ്ങിയ വകുപ്പുകള് ദിലീപിനെതിരെ ചുമത്തും. കുറ്റപത്രം സമര്പ്പിച്ചാലും അന്വേഷണം തുടരുമെന്ന് കോടതിയെ അറിയിക്കും. ഇക്കാര്യം കുറ്റപത്രത്തില് അന്വേഷണസംഘം വ്യക്തമാക്കും. ദിലീപിനൊപ്പം നേരത്തെ അറസ്റ്റിലായ രണ്ട് അഭിഭാഷകരെ കൂടി കുറ്റപത്രത്തില് ഉള്പ്പെടുത്തിയേക്കും.
കുറ്റപത്രം സമര്പ്പിക്കുന്നതിന് മുമ്പ് മറ്റു ചില നിര്ണായക നീക്കങ്ങളും പൊലീസ് ആലോചിക്കുന്നുണ്ടെന്നാണ് അറിയുന്നത്. ഇരുപതിലേറെ നിര്ണായക തെളിവുകള് ചൂണ്ടിക്കാട്ടിയിട്ടുണ്ട്. കുറ്റസമ്മത മൊഴികള്, സാക്ഷിമൊഴികള്, കോടതി മുമ്പാകെ നല്കിയ രഹസ്യ മൊഴികള്, ഫോറന്സിക് റിപ്പോര്ട്ടുകള്, സൈബര് തെളിവുകള്, നേരിട്ടുള്ള തെളിവുകള്, സാഹചര്യ ത്തെളിവുകള് എന്നിവ പട്ടികയാക്കി പ്രത്യേക ഫയലുകളാക്കിയാണ് അനുബന്ധ കുറ്റപത്രമായി സമര്പ്പിക്കുന്നത്.
https://www.facebook.com/Malayalivartha
