പിണറായിയുടെ ശബരിമലകയറ്റവും കടകംപള്ളിയുടെ ഗുരുവായൂര് ദര്ശനവും
ക്ഷേത്ര വിശ്വാസങ്ങളില് നിന്നും ആചാരങ്ങളില് നിന്നും അകന്ന് നിന്നിരുന്ന സി.പി.എമ്മും മുഖ്യമന്ത്രി പിണറായി വിജയനും മറ്റ് മന്ത്രിമാരും അടുത്തകാലത്തായി നിലപാട് മറ്റുന്നതെന്തിന്? പാര്ട്ടി പ്രവര്ത്തകരും പൊതുസമൂഹവും ഈ ചോദ്യം ഉന്നയിക്കുന്നുണ്ട്. സംഘപരിവാര് അടക്കമുള്ള ചിലര് ഇതിനെ സ്വാഗതം ചെയ്യുന്നുമുണ്ട്. എന്നാല് പാര്ട്ടി നിലപാടുകളില് നിന്നുള്ള വ്യതിയാനമാണിതെന്ന് അടിയുറച്ച കമ്മ്യൂണിസ്റ്റ് നേതാക്കളും പ്രവര്ത്തകരും ചൂണ്ടിക്കാട്ടുന്നു. മുമ്പ് പാര്ട്ടി നേതാക്കളുടെ മാതാപിതാക്കള് മരിച്ചാല് കര്മങ്ങള് ഉള്പ്പെടെ നടത്താന് പാര്ട്ടി അനുവദിക്കില്ലായിരുന്നു. മാലയിട്ട് ശബരിമല ദര്ശനം നടത്തിയ ലോക്കല് കമ്മിറ്റി സെക്രട്ടറിയോട് വിശദീകരണം തേടിയ പാര്ട്ടിക്ക് വന്ന മാറ്റം നിലനില്പ്പിന്റെ രാഷ്ട്രീയമോ, അതോ മാറിയ രാഷ്ട്രീയ കാലാവസ്ഥയ്ക്ക് അനുസരിച്ചുള്ള തന്ത്രമോ. എങ്ങനെ വേണമെങ്കിലും വ്യഖ്യാനിക്കാം.
കഴിഞ്ഞ തവണ പമ്പയില് അവലോകനയോഗത്തിനെത്തിയ പിണറായി ഇത്തവണ മലകയറി. അടുത്ത തവണ പതിനെട്ടാംപടി കയറി ശ്രീകോവിലില് എത്തിയാലും അത്ഭുതപ്പെടാനില്ല. ബി.ജെ.പിയും സംഘപരിവാറും തീവ്രഹിന്ദുത്വം പറഞ്ഞ് കേരളത്തില് വേരുറപ്പിക്കാന് നടത്തുന്ന ശ്രമങ്ങള് മുളയിലേ പിഴുതെറിയുകയാണ് പുതിയനിലപാടുകളിലൂടെ സി.പി.എം ഉദ്ദേശിക്കുന്നത്. ഹൈന്ദവവികാരം വളര്ത്തി ഹിന്ദുസമുദായത്തെ സി.പി.എമ്മില് നിന്ന് അകറ്റുകയാണ് സംഘപരിവാറിന്റെ അജണ്ട. സി.പി.എമ്മിന്റെ അണികളിലും പ്രവര്ത്തകരിലും ഭൂപിപക്ഷവും പിന്നോക്ക, ദളിത് വിഭാഗങ്ങളില് പെടുന്ന ഹിന്ദുക്കളാണ്. അവരെ അടര്ത്തിയെടുക്കാനാണ് സംഘപരിവാര് ശ്രമിക്കുന്നത്. ബി.ഡി.ജെ.എസ് ഉണ്ടാക്കിയത് അതിന്റെ ഭാഗമായാണ്. എന്നാലത് പാതിവഴിയില് തര്ക്കത്തിലുമായി.
സാധാരണ സി.പി.എം മന്ത്രിമാരോ, നേതാക്കന്മാരോ ക്ഷേത്രാചാരങ്ങളില് പങ്കെടുക്കാറില്ല. പ്രതിപക്ഷനേതാവായിരിക്കെ വി.എസ് മലപ്പുറത്തെ ക്ഷേത്രങ്ങള് സന്ദര്ശിച്ചിട്ടുണ്ടെങ്കിലും ദര്ശനം നടത്തുകയോ, ആചാരങ്ങളോ, വഴിപാടുകളോ നടത്തിയിരുന്നില്ല. എന്നാല് അടുത്തിടെ ഗുരുവായൂര് ദര്ശനം നടത്തിയ ദേവസ്വംമന്ത്രി കടകംപള്ളി സുരേന്ദ്രന് ആചാരങ്ങളില് പങ്കെടുക്കുകയും വഴിപാട് നടത്തുകയും ചെയ്തു. ഇത് വലിയ വിവാദമായെങ്കിലും പാര്ട്ടി അത് തന്ത്രപരമായി ഒതുക്കി തീര്ത്തു. സാധാരണഗതിയില് പാര്ട്ടി ശക്തമായ നിലപാട് സ്വീകരിക്കേണ്ട വിഷയമായിരുന്നു ഇത്.
ക്ഷത്രങ്ങളിലെ പൂജാരിമാര് കോണകം ഉടുക്കുന്നതിനെതിരെ പരസ്യവിമര്ശനം നടത്തിയ മന്ത്രി ജി.സുധാകരനും ധനമന്ത്രി തോമസ് ഐസക്കും ശൃംഗേരി മഠാധിപതിയെ സന്ദര്ശിക്കാന് ഫ്രൂട്ട്സുമായി പോയതും അടുത്തകാലത്താണ്. ഇതേ മഠാധിപതി തിരുവനന്തപുരത്ത് നടന്ന ഒരു പരിപാടിയില് പ്രത്യേക ഇരിപ്പിടം കൊണ്ടുവന്നത് മന്ത്രി കടകംപള്ളി സുരേന്ദ്രന് എടുത്ത് മാറ്റിയത് വിവാദമായിരുന്നു.
https://www.facebook.com/Malayalivartha
