തോമസ് ചാണ്ടി വേമ്പനാട്ടില് മുങ്ങും; രാജിക്കായി സമ്മര്ദ്ദമേറുന്നു
മന്ത്രി തോമസ് ചാണ്ടിയുടെ രാജി ഉടന് ഉണ്ടായേക്കും. എ.കെ.ശശീന്ദ്രന് മന്ത്രിയാകാനും സാധ്യത തെളിയുന്നു. വിവരാവകാശ നിയമപ്രകാരം കളക്ടറുടെ റിപ്പോര്ട്ട് പുറത്തു വന്നതിനു പിന്നാലെ ഹൈക്കോടതിയുടെ രൂക്ഷ വിമര്ശനം ഉണ്ടായതാണ് രാജി നിര്ബന്ധമാക്കിയത്.
രാജി വയ്ക്കുകയാണെങ്കില് എന്സിപി ഇടതു മുന്നണി വിടണമെന്ന ആവശ്യം തോമസ് ചാണ്ടി മുന്നോട്ടു വച്ചെങ്കിലും യു ഡി എഫില് സ്ഥാനം ലഭിക്കാന് ഇടയില്ലാത്തതിനാല് അതിനോട് കേന്ദ്ര നേതൃത്വം യോജിക്കുന്നില്ല. എന്നാല് കേന്ദ്ര നേതൃത്വത്തില് തോമസ് ചാണ്ടി സമ്മര്ദ്ദം തുടരുയാണ്. ഇടതുമുന്നണി വിട്ടില്ലെങ്കില് ശശീന്ദ്രനെ മന്ത്രിയാക്കാതിരിക്കാനുള്ള അടവുകളും അദ്ദേഹം പയറ്റുന്നു. ശശീന്ദ്രന് തന്റെ കസേരയില് ഇരിക്കുന്ന രംഗം അദ്ദേഹത്തിന് സങ്കല്പ്പിക്കാന് പോലും കഴിയുന്നില്ല.
ശശീന്ദ്രന് തന്നെ മന്ത്രിയാക്കണമെന്ന ആവശ്യവുമായി രംഗത്തുണ്ട്. എന്നാല് സി പി എമ്മിന് ഇതില് താത്പര്യമില്ല. കാരണം ശശീന്ദ്രന് കളങ്കിതനായാണ് മന്ത്രിസഭയില് നിന്നും പുറത്തു പോയത്. അങ്ങനെയൊരാളെ രണ്ടാമതും മന്ത്രിയാക്കിയാല് മുമ്പ് രാജിവച്ച ജയരാജനെയും മന്ത്രിയാക്കേണ്ടി വരും. ഇതിനോട് സി പി എം സംസ്ഥാന നേതൃത്വത്തിന് താത്പര്യമില്ല. സി പി എം സംസ്ഥാന നേതൃത്വം കളങ്കിതരെല്ലാം പുറത്തു നില്ക്കട്ടെ എന്ന അഭിപ്രായക്കാരാണ്. ജയരാജനെ മന്ത്രിയാക്കാതിരിക്കാന് ചരടുവലിക്കുന്നത് സാക്ഷാല് കോടിയേരി ബാലകൃഷ്ണനാണ്. പിണറായിക്ക് ഇതില് അനുകൂലമായും പ്രതികൂലമായും അഭിപ്രായമില്ല.
തോമസ് ചാണ്ടി സി പി എമ്മിന് കോടികള് സംഭാവന നല്കുന്ന മന്ത്രിയാണ്. അദ്ദേഹത്തിന് സ്വന്തം നിലയില് പണത്തിന്റെ ആവശ്യമില്ല. എത്ര കിട്ടിയാലും അത് കൃത്യമായി പാര്ട്ടിക്ക് നല്കും.ശശീന്ദ്രനാണെങ്കില് കോഴ വാങ്ങാന് അത്ര വശമില്ല.
അതിനിടെ ശശീന്ദ്രനെ സ്ത്രീ വിഷയത്തില് കുരുക്കിയത് തോമസ് ചാണ്ടിയാണെന്ന് പാര്ട്ടിയില് തന്നെയുള്ള വിഭാഗം ആരോപിക്കുന്നുണ്ട്. ഫോണ് വിവാദം ഉണ്ടാക്കിയവര്ക്ക് തോമസ് ചാണ്ടിക്ക് വേണ്ടിയാണ് കളിച്ചത്. അദ്ദേഹത്തിന്റെ ചരടുവലിയില് പത്രക്കാര് വീണുപോവുകയായിരുന്നുവെന്നാണ് മറുപക്ഷം പറയുന്നത്.
തെറ്റുകാരെ സംരക്ഷിക്കില്ലെന്ന് കോടിയേരി പ്രഖ്യാപിച്ച് കഴിഞ്ഞു. ഇതിനര്ത്ഥം പന്ത് കോടിയേരിയുടെ കോര്ട്ടില് നിന്നും മാറി എന്നാണ്. പിണറായിയെ സംബന്ധിച്ചടത്തോളം ഇനിയും തോമസ് ചാണ്ടിയെ ചുമന്നാല് അത് സര്ക്കാരിന് കനത്ത പ്രഹരമായി മാറും. ഇതിനകം സര്ക്കാര് അഴിമതിക്കാര്ക്കൊപ്പമാണെന്ന തരത്തില് വ്യാപക പ്രചരണം ഉയര്ന്നുകഴിഞ്ഞു. സി പി എം അണികളും ഇക്കാര്യത്തില് ആശങ്കാകുലരാണ്. അഴിമതിക്കെതിരായ ഹൈക്കോടതിയുടെ ഉത്തരവുകളുടെ പിന്ബലത്തില് അധികാരത്തില് വന്ന സര്ക്കാരാണ് ഇത്. കെ.എം.മാണിക്കെതിരെ രാജിക്കായി സമ്മര്ദ്ദം ചെലുത്തിയവര് തന്നെ ഇപ്പോള് നിരാശരായി കൈയും കെട്ടി നില്ക്കുന്ന കാഴ്ച പരമ ദയനീയമാണെന്ന് സി പി എം അണികള് കരുതുന്നു.
https://www.facebook.com/Malayalivartha
