ജീവനും ജോലിയും പ്രശ്നമാകുമോ? ഏറ്റവുമധികം മലയാളികളുള്ള വിദേശ രാജ്യമായ സൗദിയിലെ മലയാളികള് ആശങ്കയില്
അടുത്ത ബന്ധുക്കളായ രാജകുമാരന്മാരെപ്പോലും കല് തുറുങ്കലിലാക്കി വിപ്ലവകരമായ നീക്കങ്ങള് തുടങ്ങിയ കിരീടാവകാശിയായ രാജകുമാരന് മുഹമ്മദ് ബിന് സല്മാന് ലോകത്തെമ്പാടു നിന്നും അഭിനന്ദന പ്രവാഹമാണ്. അതേസമയം പാശ്ചാത്യ ലോകത്തും ഹീറോ ആയി മാറിയിരിക്കുന്ന രാജകുമാരന് അമേരിക്കന് പ്രസിഡന്റ് ട്രംപിന്റെ കൈയിലെ കളിപ്പാവയായി മാറുകയാണോ എന്ന ചോദ്യം വിവിധ തുറകളില് നിന്നും ശക്തമാകുന്നുണ്ട്.
ഇറാന്റെ റോക്കറ്റ് ആക്രമണത്തെ യുദ്ധ പ്രഖ്യാപനമായി കരുതി ഇറാനെതിരെ തിരിച്ചടിക്കാന് സൗദി കോപ്പ് കൂട്ടാന് തുടങ്ങിയതിനെ തുടര്ന്നാണ് രാജകുമാരന് നേരെയുള്ള ഈ ആരോപണം ഉയര്ന്ന് വന്നിരിക്കുന്നത്. ഇതോടെ സൗദിയും ഇറാനും തമ്മിലുള്ള യുദ്ധം ഉണ്ടാകുമെന്ന ആശങ്കയിലായിരിക്കുകയാണ് ലോകം.
യെമനിലെ ഹൂതി വിമതര്ക്ക് റോക്കറ്റും മറ്റ് ഉപകരണങ്ങളും പ്രദാനം ചെയ്തുവെന്ന ആരോപണം ഉന്നയിച്ചാണ് സല്മാന് സൗദിയെ ഇറാനെതിരെയുള്ള യുദ്ധത്തിനായി സജ്ജമാക്കിയിരിക്കുന്നത്. ഇതൊരു എടുത്ത് ചാട്ടമാണെന്നും ഇതിന് പുറകില് ട്രംപിന്റെ കരങ്ങളാണെന്നും ചിലര് മുന്നറിയിപ്പേകാന് തുടങ്ങിയിട്ടുണ്ട്. ഇതിനെ തുടര്ന്ന് സൗദിയിലെയും യുഎഇയിലെയും വിമാനത്താവളങ്ങള്ക്കും തുറമുഖങ്ങള്ക്കും നേരെ കടുത്ത ഭീഷണി ഉയര്ത്തി ഹൂതി വിമതര് രംഗത്തെത്തുകയും ചെയ്തിരുന്നു. തല്ഫലമായി സൗദി യെമനുമായി പങ്കിടുന്ന കര, കടല്, വ്യോമ അതിര്ത്തികള് മുന്കരുതലായി അടയ്ക്കുകയും ചെയ്തിരുന്നു.
സുന്നികള് ഭരിക്കുന്ന സൗദിയും ഷിയകള് ഭരിക്കുന്ന ഇറാനും തമ്മിലുള്ള വളരെക്കാലമായി മിഡില് ഈസ്റ്റില് യുദ്ധ ഭീഷണി നിലനില്ക്കുന്നുണ്ട്. യെമന് പ്രശ്നത്തിന് പുറമെ ഇതിന് മുമ്പ് സിറിയ മുതല് ഖത്തര്, ലെബനണ് പ്രദേശങ്ങളിലെ പ്രശ്നങ്ങളില് വരെ ഇറാനും സൗദിയും വ്യത്യസ്ത നിലപാടുകളുമായി കൊമ്പ് കോര്ത്തിട്ടുണ്ട്. ശനിയാഴ്ച ഇറാന്റെ പിന്തുണയോടെ ഹൂതി വിമതര് സൗദിയിലെ റിയാദിലുള്ള അന്താരാഷ്ട്ര വിമാനത്താവളത്തിന് നേരെ റോക്കറ്റ് അയക്കുകയും അത്ലക്ഷ്യത്തിലെത്തുന്നതിന് മുമ്പ് തന്നെ സൗദി വിദഗ്ധമായി തകര്ത്തെറിയുകയും ചെയ്തതാണ് ഇപ്പോള് യുദ്ധ സാധ്യത മുമ്പില്ലാത്ത വിധത്തില് വര്ധിക്കാന് കാരണമായിരിക്കുന്നത്.
യെമനില് നിന്നും പറന്നുയര്ന്നിരുന്നു രണ്ട് ഹ്യുമാനിറ്റേറിയന് എയ്ഡ് വിമാനങ്ങള് സൗദിയുടെ നേതൃത്വത്തിലുള്ള സഖ്യ സേനകള് തടഞ്ഞുവെന്ന് യുഎന് തിങ്കളാഴ്ച വെളിപ്പെടുത്തിയിരുന്നു. ഹൂതി വിമതര്ക്ക് ഇറാന് മിസൈലുകളും മറ്റ് ആയുധങ്ങളും നല്കുന്നത് ഇറാന് നടത്തുന്ന നേരിട്ടുള്ള ആക്രമണങ്ങള്ക്ക് തുല്യമാണെന്നാണ് സല്മാന് ആരോപിക്കുന്നത്. ബ്രിട്ടീഷ് ഫോറിന് സെക്രട്ടറി ബോറിസ് ജോണ്സനുമായി ടെലിഫോണില് സംസാരിക്കവെയാണ് സല്മാന് ഇത്തരത്തില് പ്രതികരിച്ചതെന്ന് സൗദിപ്രസ് ഏജന്സി വ്യക്തമാക്കുന്നു.
https://www.facebook.com/Malayalivartha
