സോളാര്‍ കമ്മിഷന്‍ റിപ്പോര്‍ട്ടിലെ നിയമോപദേശത്തിന്റെ അടിസ്ഥാനത്തില്‍ മുന്‍ മുഖ്യമന്ത്രി ഉമ്മന്‍ചാണ്ടി അടക്കമുള്ള ഉന്നത നേതാക്കള്‍ക്കും പൊലീസ് ഉദ്യോഗസ്ഥര്‍ക്കുമെതിരേ ക്രിമിനല്‍, വിജിലന്‍സ് കേസെടുത്ത് പ്രാഥമികമായി അന്വേഷിക്കാനുള്ള ഉത്തരവ് ഇറങ്ങി. ഉത്തരമേഖലാ ഡിജി.പി രാജേഷ് ദിവാനാണ് അന്വേഷണ ചുമതല.

സോളര്‍ വിവാദത്തിന്മേലുള്ള ജസ്റ്റിസ് ജി.ശിവരാജന്‍ കമ്മിഷന്‍ റിപ്പോര്‍ട്ടും അതിലുള്ള നടപടി റിപ്പോര്‍ട്ടും ഇന്നു നിയമസഭയില്‍ വയ്ക്കും. അതേസമയം തന്നെ നിയമസഭാസര്‍ക്കാര്‍ വെബ്‌സൈറ്റുകളിലും റിപ്പോര്‍ട്ട് പ്രസിദ്ധീകരിക്കും. രാവിലെ ഒന്‍പതിനാരംഭിക്കുന്ന സഭാ നടപടിക്രമങ്ങളുടെ തല്‍സമയ സംപ്രേഷണവുമുണ്ടാവും.

ആകെ 1073 പേജുള്ള ഇംഗ്ലിഷില്‍ തയാറാക്കിയ റിപ്പോര്‍ട്ട് മലയാളത്തിലേക്കു പരിഭാഷപ്പെടുത്തി. ഈ പരിഭാഷയുടെ കോപ്പി നിയമസഭാംഗങ്ങള്‍ക്കും മാധ്യമങ്ങള്‍ക്കും നല്‍കാനുള്ള തിരക്കിട്ട നടപടികളാണു നടക്കുന്നത്. അതേസമയം മന്ത്രി തോമസ് ചാണ്ടിയുടെ രാജി ആവശ്യപ്പെട്ടു സഭ പ്രക്ഷുബ്ധമാക്കാനുള്ള ആലോചനകളാണു പ്രതിപക്ഷത്ത്.

വ്യാഴാഴ്ച രാവിലെ എട്ടരയ്ക്കു യുഡിഎഫ് നിയമസഭാകക്ഷി യോഗവും വിളിച്ചിട്ടുണ്ട്.  അന്വേഷണ കമ്മിഷന്‍ റിപ്പോര്‍ട്ടിന്റെ അടിസ്ഥാനത്തില്‍ മുന്‍മുഖ്യമന്ത്രി ഉമ്മന്‍ചാണ്ടി അടക്കമുള്ളവര്‍ക്കെതിരെ കേസെടുക്കാന്‍ മന്ത്രിസഭ തീരുമാനിച്ചതോടെ റിപ്പോര്‍ട്ടിലേക്കു കേരളം ഉറ്റുനോക്കുകയാണ്.

മന്ത്രിസഭ തീരുമാനമെടുത്തശേഷം സുപ്രീംകോടതി റിട്ട. ജഡ്ജി അരിജിത് പസായത്തില്‍നിന്നു രണ്ടാമതു നിയമോപദേശം മുഖ്യമന്ത്രി വാങ്ങിയെങ്കിലും നേരത്തേ പ്രഖ്യാപിച്ച തീരുമാനങ്ങളില്‍ എന്തെങ്കിലും പുനരാലോചന ഉണ്ടാകുമെന്ന സൂചനയില്ല.

കരുതലോടെ നീങ്ങേണ്ടതിന്റെ ആവശ്യകത ചൂണ്ടിക്കാണിക്കുന്നുവെങ്കിലും സര്‍ക്കാരിന്റെ ആഗ്രഹത്തിനു തടസ്സമാകുന്ന നിയമോപദേശമല്ല രണ്ടാമത്തേതുമെന്നാണു വിവരം.