പുണ്യാളന്‍മാരി എല്‍.ഡി.എഫിലെത്തുന്ന പലരും പലതരത്തിലുള്ള തട്ടിപ്പുകള്‍ നടത്തുന്നത് മുന്നണിക്ക് തലവേദനായാകുന്നു. മന്ത്രി തോമസ് ചാണ്ടിക്കും എം.എല്‍.എ പി.വി അന്‍വറിനും പിന്നാലെ ജോയിസ് ജോര്‍ജ്ജ് എം.പിയും ഭൂമി തട്ടിപ്പ്് നടത്തി. കൊട്ടക്കാംമ്പൂരില്‍ 20 ഏക്കര്‍ സര്‍ക്കാര്‍ തരിശുഭൂമി കൈയേറിയ ജോയിസ് ജോര്‍ജിന്റെ ഭൂമിയുടെ പട്ടയം ദേവികുളം സബ് കലക്ടര്‍ വി.ആര്‍. പ്രേം കുമാര്‍ റദ്ദാക്കിയതാണ് സര്‍ക്കാരിനും മുന്നണിക്കും പുതിയ തലവേദന സൃഷ്ടിക്കുന്നത്. വ്യാജ രേഖകള്‍ തയ്യാറാക്കിയാണ് ഭൂമി കൈവശപ്പെടുത്തിയത്. ഭൂമിയുടെ ഉടമസ്ഥാവകാശം പാരമ്പര്യമായി ജോയ്‌സ് ജോര്‍ജിന് കിട്ടിയതെന്നായിരുന്നു മുഖ്യമന്ത്രി പിണറായി വിജയന്‍ മുമ്പ് നിയമസഭയില്‍ പറഞ്ഞത്. തോമസ് ചാണ്ടി കായല്‍ കൈയ്യേറിയില്ലെന്നും മുഖ്യമന്ത്രി പിണറായി സഭയില്‍ പറത്തിട്ടുണ്ട്.

പണ്ട് കോണ്‍ഗ്രസ് നേതൃത്വത്തിലുള്ള യുഡിഎഫിനെ കുറിച്ചുള്ള ആക്ഷേപം ഭൂ, വനം, കായല്‍ മാഫിയ എന്നും സ്വര്‍ണ കളളക്കടത്ത് പൊതുമുതല്‍ വരെ കൊള്ളയടിക്കുന്നവരുടെ കൂടാരമെന്നായിരുന്നു. കാലം മാറിയപ്പോള്‍ കൂടാരത്തിലുള്ളവരെല്ലാം പല രൂപത്തിലും ഭാവത്തിലും എല്‍.ഡി.എഫില്‍ ചേക്കേറി. കോണ്‍ഗ്രസുകാര്‍ ചുമന്നു നടന്ന സകല മാലിന്യങ്ങളും ഇന്ന് ഇടത്‌നേതാക്കള്‍ പേറുന്നു. ഇവരെയെല്ലാം സംരക്ഷിക്കാന്‍ ന്യായീകരണ തൊഴിലാളികള്‍ കൈ മെയ് മറന്ന് വാദങ്ങള്‍ നിരത്തുകയാണ്. പിവി അന്‍വര്‍, തോമസ് ചാണ്ടി, കാരാട്ട് റസാഖ്, പിടിഎ റഹിം , ജോയ്‌സ് ജോര്‍ജ് തുടങ്ങിയ വിശുദ്ധന്‍മാരാല്‍ എല്‍.ഡി.എഫിന്റെ ജനപ്രിതി നാള്‍ക്കുനാള്‍ ഇടിയുകയാണ്.

മഴക്കുഴി പോലും നിര്‍മിക്കരുതെന്ന് ദുരന്തനിവാരണ അതോറിട്ടി മുന്നറിയിപ്പ് നല്‍കിയ കൂടരഞ്ഞി പഞ്ചായത്തിലാണ് നിലമ്പൂര്‍ എം.എല്‍.എ പി.വി അന്‍വര്‍ വാട്ടര്‍തീം പാര്‍ക്ക് നിര്‍മിച്ചിരിക്കുന്നതെന്ന് കോഴിക്കോട് കളക്ടര്‍ കണ്ടെത്തിയിട്ടുണ്ട്. 188 ഏക്കര്‍ കരഭൂമി ഇദ്ദേഹം അനധികൃതമായി കൈവശം വച്ചിരിക്കുകയാണെന്ന രേഖകളും പുറത്തുവന്നിട്ടുണ്ട്. ഇതിന് പുറമേ നിരവധി പേരുടെ പേരില്‍ എം.എല്‍.എ ഭൂമി വാങ്ങിക്കൂട്ടിയെന്നും ആരോപണമുണ്ട്. സ്വര്‍ണക്കടത്ത് കേസിലെ പ്രതിയായ കാരാട്ട് ഫൈസല്‍ ഇടത്പക്ഷത്തിന്റെ പഞ്ചായത്ത് അംഗമാണ്. ഇദ്ദേഹത്തിന്റെ ആഢംബര കാറിലാണ് ജനജാഗ്രത യാത്രയില്‍ കോടിയേരി ബാലകൃഷ്ണനെ സ്വീകരിച്ചാനയിച്ചത്. ഇടത് എം.എല്‍.എ പിടിഎ റഹീമും കാരാട്ട് ഫൈസലും തമ്മിലുളള ബന്ധം തെളിയിക്കുന്ന, വിദേശത്തുള്ള ചിത്രങ്ങളും പുറത്തുവന്നിരുന്നു.