സരിത എസ്. നായര്‍ എഴുതിയെന്ന് പറയുന്ന 25 പേജുള്ള കത്തില്‍ ജോസ് കെ.മാണി എം.പിയുടെ പേര് രാഷ്ട്രീയ ഗൂഢാലോചനയുടെ പേരില്‍ കൂട്ടിച്ചേര്‍ത്തതാണെന്ന് വ്യക്തമായി. ഇക്കാര്യം ശരിവെച്ച് സരിതയുടെ മുന്‍ അഭിഭാഷകന്‍ ഫെനി ബാലകൃഷ്ണന്‍ ശനിയാഴ്ച വാര്‍ത്താസമ്മേളനം നടത്തിയതോടെയാണ് ഇക്കാര്യത്തില്‍ രാഷ്ട്രീയ കേരളത്തിന് വിശ്വാസത വര്‍ദ്ധിച്ചത്. കേരളാ കോണ്‍ഗ്രസില്‍ പി.സി ജോര്‍ജ്ജ് രാഷ്ട്രീയ പോരാട്ടം മുഴക്കി നടന്നിരുന്ന കാലത്താണ് സരിതയുടെ കത്ത് വിവാദമായത്. ഈസമയത്ത് സരിതയുടെ 21 പേജുള്ള കത്തിന്റെ കൂടെ പല നേതാക്കളുടെയും പേര് ചേര്‍ക്കുന്നതിനുള്ള നീക്കം നടക്കുന്നെന്ന് ഫെനി ബാലകൃഷ്ണന്‍ ജോസ് കെ. മാണിയെ അറിയിച്ചിരുന്നു. കമ്മിഷന്‍ റിപ്പോര്‍ട്ടില്‍ സരിതയുടെ കത്ത് 25 പേജാണെന്ന് പുറത്തായതോടെയാണ് ഫെനി പറഞ്ഞത് ശരിയായിരുന്നെന്ന് മനസിലാകുന്നത്. അതുകൊണ്ട് രാഷ്ട്രീയ കേരളവും ജനങ്ങളും കമ്മിഷന്‍ രേഖയാക്കിയ കത്തില്‍ വിശ്വാസമര്‍പ്പിക്കുന്നില്ല.

21 പേജുണ്ടായിരുന്ന യഥാര്‍ത്ഥ കത്തില്‍ യു.ഡി.എഫ് നേതാക്കളെ കുറിച്ച് ആക്ഷേപം ഉണ്ടായിരുന്നില്ല. തന്റെ പാട്ണറായിരുന്ന ബിജുരാധാകൃഷ്ണന്‍ ടീം സോളാറിന്റെ പണം തട്ടിയെടുത്തതും ഉപഭോക്താക്കളെ വഞ്ചിതും മറ്റുമായിരുന്നു കത്തിലുണ്ടായിരുന്നത്. ഉപഭോക്താക്കളില്‍ നിന്ന് ലഭിച്ച പണം ഉപയോഗിച്ച് ബിജുരാധാകൃഷ്ണ്‍ നടി ശാലൂമേനോന് പല കാര്യങ്ങളും ചെയ്ത് കൊടുത്തിരുന്നെന്നും കത്തില്‍ പറയുന്നുണ്ടായിരുന്നു. എന്നാല്‍ കെ.ബി ഗണേഷ് കുമാറിന്റെ ബന്ധുവായ ശരണ്യാ മനോജ് ആണ് കത്തില്‍ ജോസ് കെ. മാണി അടക്കമുള്ള നേതാക്കളുടെ പേര് എഴുതിച്ചേര്‍ത്തത്.