സിപിഎം പാര്‍ട്ടി നടപടി ഏത് നിമിഷവും പ്രതീക്ഷിക്കുന്ന കണ്ണൂര്‍ ജില്ലാ സെക്രട്ടറി പി.ജയരാജനെ കുഴച്ചത് എം.വി.ജയരാജനും ഇപി. ജയരാജനും ചേര്‍ന്ന്. പാര്‍ട്ടി ജില്ലാ ഘടകത്തില്‍ ജയരാജന്‍മാര്‍ തമ്മിലുളള പോര് മുറുക്കിയിട്ട് കാലമേറെയായി. പി യെ തൊട്ടതോടെ പിണറായിയുടെ അടിതെറ്റി. പി ക്കെതിരായ നടപടി കോടിയേരിക്കും പിണറായിക്കും എതിരെയുള്ള പ്രഹരമാണ്.

ഇ.പി.ജയരാജന്റെ മന്ത്രി സ്ഥാനം തെറിപ്പിച്ചത് പി.ജയരാജനാണെന്ന കാര്യം കണ്ണൂരിലാകെ പാട്ടാണ്. ഇ.പി.ജയരാജനെതിരെ അഴിമതി ആരോപണം കൊണ്ടുവന്നതും പി.ജയരാജനാണെന്ന് ഇ.പി.വിശ്വസിക്കുന്നു. എം.വി.ജയരാജനും പി.ജയരാജനും സ്വരചേര്‍ച്ചയില്ലാതാവുകയും അത് പരസ്യമായ വിഴുപ്പലക്കലിലെത്തുകയും ചെയ്തു. അപ്പോഴാണ് പിണറായി ഇടപെട്ട് എം.വി.ജയരാജനെ തന്നെ സെക്രട്ടറിയായി തിരുവനന്തപുരത്തേക്ക് കൊണ്ടുവന്നത്. അതോടെ പോര് അവസാനിക്കുമെന്ന് കരുതിയെങ്കിലും പോര് വര്‍ധിക്കുകയായിരുന്നു.

പോരിന് ശമനമുണ്ടാക്കിയില്ലെങ്കില്‍ കണ്ണൂരിലെ എണ്ണപ്പെട്ട നേതാക്കളായ കോടിയേരിക്കും പിണറായിക്കും ബുദ്ധിമുട്ടുണ്ടാക്കും. ഇക്കാലമത്രയും കണ്ണൂരിലെ പാര്‍ട്ടിയെ പിടിച്ചു നിര്‍ത്തിയത് മൂന്നു ജയരാജന്‍മാരും ചേര്‍ന്നാണ്. കാലാന്തരത്തില്‍ ജയരാജന്‍മാര്‍ തമ്മില്‍ അകലുകയും അത് പാര്‍ട്ടിയെ തകര്‍ച്ചയിലേക്ക് നയിക്കുകയും ചെയ്തു. കണ്ണൂരില്‍ തകര്‍ന്നാല്‍ പാര്‍ട്ടി കേരളത്തില്‍ തകരും. പാര്‍ട്ടി തകര്‍ന്നാലും സാരമില്ല തങ്ങള്‍ ലക്ഷ്യമിട്ട കാര്യം നടക്കട്ടേ എന്നാണ് ജയരാജന്‍മാര്‍ കരുതുന്നത്.

സി പി എമ്മിന്റെ കണ്ണൂര്‍ ഘടകത്തില്‍ മുമ്പില്ലാത്ത വിധം ജാതിയുടെയും മതത്തിന്റെയും സ്വാധീനം വര്‍ധിച്ചുവരുന്നു. ഇ.പി.ജയരാജന്‍ കണ്ണൂരിലെ ഭൂരിപക്ഷത്തിന്റെ പ്രതിനിധിയാണ്. അദ്ദേഹത്തെ സിപിഎം കൈവിട്ടതോടെ പിണറായിക്ക് നഷ്ടമായത് കണ്ണൂരിലെ ഭൂരിപക്ഷത്തിന്റെ പിന്തുണയാണ്. പി.കെ.ശ്രീമതിയും മറ്റും പിണറായിക്കും കോടിയേരിക്കും തീര്‍ത്തും എതിരാണ്. കോടിയേരി കണ്ണൂരിലെ ഭൂരിപക്ഷത്തെയാണ് പ്രതിനിധാനം ചെയ്യുന്നത്. അദ്ദേഹത്തെ എതിര്‍ത്ത് മുന്നേറാനാണ് ഇ.പിയും സംഘവും അടങ്ങുന്ന ടീം ശ്രമിക്കുന്നത്. അതായത് ഭൂരിപക്ഷത്തിനുള്ളില്‍ വിള്ളല്‍. ഇങ്ങനെയാണ് പോകുന്നതെങ്കില്‍ കണ്ണൂരില്‍ പാര്‍ട്ടി രണ്ടാകും. സി പി എമ്മിന്റ ശക്തികേന്ദ്രങ്ങളില്‍ തള്ളിക്കയറാനാണ് മറ്റ് പാര്‍ട്ടികളുടെ ശ്രമം. സി പി എമ്മിനള്ളില്‍ വിള്ളല്‍ വീഴ്ത്തിയാല്‍ ഇത് എളുപ്പമാകുമെന്ന് കരുതുന്നവര്‍ ധാരാളം ഉണ്ട്.

പി ജയരാജനെതിരെ ആരോപണം വന്നത് അദ്ദേഹത്തിന്റെ പാര്‍ട്ടിക്കുള്ളില്‍ നിന്നു തന്നെയാണ്. പകല്‍ പി.ജയരാജന്റെ ആളും രാത്രി ഇ.പി.യുടെ ആളുമായി പ്രവര്‍ത്തിക്കുന്ന വിശ്വസ്തര്‍ ധാരാളമായി കണ്ണൂരിലുണ്ട്. ഇവരാണ് പി.ജയരാജനു വേണ്ടി ഫ്‌ളക്‌സ് വയ്ക്കുകയും രാത്രിയുടെ മറവില്‍ അദ്ദേഹത്തിനെതിരെ സംസാരിക്കുകയും ചെയ്യുന്നത്. സി പി എമ്മിന്റെ സ്വഭാവം നന്നായി അറിയുന്ന നേതാവാണ് പി.ജയരാജന്‍. അദ്ദേഹം ഇത്തരമൊരു ബുദ്ധിമോശം കാണിക്കുമെന്ന് കരുതുന്നവരില്ല. കെ.കെ.രാഗേഷാണ് ജയരാജനെ കുറിച്ച് നൃത്തശില്പം തയാറാക്കിയത്. പിണറായിയുടെ വിശ്വസ്തനായ ജയരാജനെതിരെ സംസ്ഥാന സമിതിയില്‍ കലാപം മുറുകിയപ്പോള്‍ പിണറായിയാണ് സ്തബ്ദനായത്. പി യെ തൊടുമ്പോള്‍ ശരിക്കും തൊടുന്നത് പിണറായിയെയാണ്.

കണ്ണൂരിലെ പാര്‍ട്ടി അണികള്‍ മുമ്പില്ലാത്ത വിധം ആര്‍എസ്എസില്‍ ചേക്കേറുന്നുണ്ട്. പാര്‍ട്ടിയിലെ ഭിന്നത ആര്‍എസ്എസിന് സഹായകരമായി തീരാനാണ് സാധ്യത.