രണ്ട് വ്യാഴവട്ടം മുമ്പ് മുതിര്‍ന്ന സി.പി.എം നേതാവ് വി.എസ് അച്യുതാനന്ദന്റെ ജനപ്രീതി വര്‍ദ്ധിച്ചപ്പോള്‍ പാര്‍ട്ടി സംസ്ഥാന സെക്രട്ടറി പിണറായി വിജയന് ഹാലിളകിയിരുന്നു. പാര്‍ട്ടിക്ക് അതീതനായി വി.എസ് വളരുന്നെന്നും അദ്ദേഹം പാര്‍ട്ടിയെ വെല്ലുവിളിക്കുന്നെന്നും ആയിരുന്നു പിണറായി ഗ്രൂപ്പിന്റെ പ്രധാന ആരോപണം. അക്കാലത്ത് വി.എസും പിണറായിയും തമ്മില്‍ അഭിപ്രായഭിന്നതയും വാക്ക്‌പോരും രൂക്ഷമായിരുന്നു. ഒരിക്കല്‍ പി. ജയരാജന്‍ സംസ്ഥാന സതിയില്‍ വെച്ച് വി.എസിനെ ബിംബം പേറുന്ന കഴുത എന്നു പോക്ഷമായി വിശേഷിപ്പിച്ചിരുന്നു. ' ബിംബം ചുമക്കുന്ന കഴുതയുടെ വിചാരം ആളുകള്‍ വണങ്ങുന്നതു തന്നെയാണ്' എന്നാണ് ജയരാജന്‍ ആലങ്കാരികമായി പറഞ്ഞത്.

കാലം കുറേ കടന്നുപോയി. ചരിത്രത്തിന്റെ വിചിത്രമായ ആവര്‍ത്തനം. അതേയിടത്ത് പി.ജയരാജന്‍ തന്നെയെത്തി. അതേ ബിംബം, അതേ കഴുത. ഇത് കാലത്തിന്റെ കാവ്യനീതിയാകും. 1998ലെ പാലക്കാട് സംസ്ഥാന സമ്മേളനത്തിലൂടെ മല്‍സരിച്ചാണ് പി.ജയരാജന്‍ സി.പി.എം സംസ്ഥാന സമിതിയില്‍ എത്തിയത്. അന്ന് സി.പി.എം വി.എസിന്റെ നിയന്ത്രണത്തിലായിരുന്നു. അന്ന് എങ്ങനെയും സംസ്ഥാന കമ്മിറ്റിയിലെത്താല്‍ വി.എസിനെ വാഴ്ത്തി നടക്കുകയായിരുന്നു പി.ജയരാജന്റെ പ്രധാന പരിപാടി. എന്നാല്‍ 2006ലെ മലപ്പുറം സമ്മേളനത്തോടെ ജയരാജന്‍ വി.എസിന്റെ കടുത്ത ശത്രുവായി. പിണറായി ഭക്തിയായിരുന്നു അതിനുള്ള കാരണവും. അങ്ങനെയുള്ള പി.ജയരാജനെതിരെയാണ് പിണറായി അടക്കം വിമര്‍ശനം ഉന്നയിച്ചത്.

വി.എസ് ജനകീയ പ്രശ്‌നങ്ങളില്‍ നിരന്തരം ഇടപെട്ടും അഴിമതിക്കും അനീതിക്കും സ്ത്രീപിഡകര്‍ക്കും എതിരെ കേസുകള്‍ നടത്തിയുമാണ് ജനകീയനായത്. അഴിമതിക്കേസില്‍ ബാലകൃഷ്ണ പിള്ളയെ അദ്ദേഹം ജയിലിലടച്ചു. എന്നാല്‍ പി.ജയരാജന്‍ കൂടെ നടക്കുന്ന യുവനേതാവ് കെ.കെ രാഗേഷിനെ കൊണ്ടാണ് തന്റെ അപദാനങ്ങള്‍ പാടി പുകഴ്ത്താന്‍ ഏര്‍പ്പാട് ചെയ്തത്. വീഡിയോയും നൃത്തശില്‍പ്പവും ഫഌക്‌സ് ബോര്‍ഡുകളും അതില്‍പ്പെടും. എന്നാല്‍ ഈ ജയരാജന്‍ ഉള്‍പ്പെടെയുള്ള നേതാക്കള്‍ പാര്‍ട്ടി പരിപാടികള്‍ വിജയിപ്പിക്കാനും തെരഞ്ഞെടുപ്പിലൂടെ അധികാരത്തിലേറാനും വി.എസിന്റെ ഫഌക്‌സുകളും പോസ്റ്ററുകളും തങ്ങളുടെ ഇഷ്ടാനുസരണം ഉപയോഗിച്ചു. വി.എസിനെ കുറിച്ച് ഡോക്യുമെന്ററികളും മറ്റ് പരിപാടികളും വന്നിട്ടുണ്ടെങ്കിലും ഒന്നും അദ്ദേഹം പബഌസിറ്റിക്കായി ചെയ്തതായിരുന്നില്ല. എന്നാല്‍ ജയരാജന്‍ സ്വന്തം ഇമേജ് വര്‍ദ്ധിപ്പിക്കാന്‍ സ്വയം ബിംബമാകാന്‍ നോക്കി. പക്ഷെ, ബിംബമല്ല അത് പേറുന്നയാളാണ് താനെന്ന് പാര്‍ട്ടി തിരുത്തി.