കായല്‍ കൈയ്യേറിയെന്ന ആരോപണത്തില്‍ ഗതാഗത മന്ത്രി തോമസ് ചാണ്ടിക്കെതിരെ രൂക്ഷ വിമര്‍ശനവുമായി ഭരണപരിഷ്ക്കാര കമ്മിഷന്‍ ചെയര്‍മാന്‍ വി.എസ്.അച്യുതാനന്ദന്‍ രംഗത്തെത്തി. ചാണ്ടി രാജിവച്ചില്ലെങ്കില്‍ പിടിച്ചുപുറത്താക്കുമെന്ന് വി.എസ് പറഞ്ഞു. തിരുവനന്തപുരത്ത് മാദ്ധ്യമ പ്രവര്‍ത്തകരോട് പ്രതികരിക്കുകയായിരുന്നു അദ്ദേഹം .ചാണ്ടിയുടെ രാജിക്കായി മുറവിളി ശക്തമാകുന്നതിനിടെയാണ് ഇക്കാര്യത്തില്‍ ആഞ്ഞടിച്ച്‌ വി.എസ് രംഗത്തെത്തിയത്.

അതേസമയം, ചാണ്ടിയുടെ രാജിക്കാര്യം മുഖ്യമന്ത്രി തീരുമാനിക്കട്ടേയെന്നാണ് ഇടതുമുന്നണിയില്‍ ധാരണയിലെത്തിയത്. കഴിഞ്ഞ ദിവസം ചേര്‍ന്ന ഇടതുമുന്നണി യോഗത്തില്‍ ചാണ്ടിയെ പിന്തുണയ്ക്കാന്‍ ഘടകക്ഷികളാരും തയ്യാറായിരുന്നില്ല. തോമസ് ചാണ്ടിയുടെ രാജി അനിവാര്യമായ സാഹചര്യമാണുള്ളതെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍ പറഞ്ഞു. സര്‍ക്കാരിന് കളങ്കമുണ്ടാക്കുന്ന രീതിയിലാണ് തോമസ് ചാണ്ടി പ്രവര്‍ത്തിച്ചതെന്നും അതിനാല്‍ അദ്ദേഹം രാജിവയ്ക്കുന്നതാണ് മര്യാദയെന്നും കാനം പറഞ്ഞു. മുഖ്യമന്ത്രി ഇടപെട്ട് തോമസ് ചാണ്ടിയെ രാജിവയ്പിച്ചാല്‍ അത് സര്‍ക്കാരിന് ക്ഷീണം ഉണ്ടാക്കുമെന്നും കാനം പറഞ്ഞു.

എന്നാലിതിനോട് എന്‍.സി.പി നേതാക്കള്‍ പ്രതികരിച്ചില്ല. ജെ.ഡി.എസും തോമസ് ചാണ്ടി രാജിവയ്ക്കണമെന്ന നിലപാടിലായിരുന്നു. കളക്റുടെ റിപ്പോര്‍ട്ടിനെതിരെ സര്‍ക്കാരിലെ മന്ത്രി തന്നെ കോടതിയില്‍ പോയത് ഉചിതമായില്ലെന്നും ജെ.ഡി.എസ് വിമര്‍ശിച്ചു. അതേസമയം, ഒന്നുകൂടി ആലോചിച്ചിട്ട് പോരെ രാജി ആവശ്യപ്പെടുന്നതെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞെങ്കിലും സി.പി.ഐ വഴങ്ങിയില്ല. തര്‍ക്കം രൂക്ഷമായതോടെയണ് മന്ത്രിസഭയുടെ നാഥനെന്ന നിലയ്ക്ക് രാജിക്കാര്യം മുഖ്യമന്ത്രി പിണറായി വിജയന്‍ തീരുമാനിക്കട്ടെയെന്ന നിലപാടില്‍ യോഗം എത്തിയത്. നിയമോപദേശം കൂടി കണക്കിലെടുത്ത് എത്രയും വേഗം തീരുമാനം വേണമെന്നും കാനം ആവശ്യപ്പെട്ടു.