ശബരിമല അയ്യപ്പ ക്ഷേത്രം ദേശീയ തീര്ത്ഥാടന കേന്ദ്രമായി പ്രഖ്യാപിക്കണമെന്ന് മുഖ്യമന്ത്രി പിണറായി വിജയന്
ശബരിമല അയ്യപ്പ ക്ഷേത്രം ദേശീയ തീര്ത്ഥാടന കേന്ദ്രമായി പ്രഖ്യാപിക്കണമെന്ന് മുഖ്യമന്ത്രി പിണറായി വിജയന്. മണ്ഡലകാലത്തിന്റെ മുന്നൊരുക്കങ്ങള് വിലയിരുത്താന് വിളിച്ചു ചേര്ത്ത ദക്ഷിണേന്ത്യന് സംസ്ഥാനങ്ങളിലെ മന്ത്രിമാരുടെ യോഗത്തിലാണ് മുഖ്യമന്ത്രി ഈ ആവശ്യം മുന്നോട്ട് വെച്ചത്.
ശബരിമല തീര്ത്ഥാടകരുടെ ഏകോപനത്തിനായി എല്ലാ ദക്ഷിണേന്ത്യന് സംസ്ഥാനങ്ങളുടെയും തലസ്ഥാന നഗരങ്ങളില് പ്രത്യേക കണ്ട്രോള് റൂം തുറക്കണമെന്ന് മുഖ്യമന്ത്രി ആവശ്യപ്പെട്ടു. മലകയറുന്ന പാതയുടെയും സ്വാമി അയ്യപ്പന് റോഡിന്റെയും വീതി ഇത്തവണ വര്ദ്ധിപ്പിച്ചിട്ടുണ്ട്.
സുരക്ഷആരോഗ്യ സംവിധാനങ്ങള് മെച്ചപ്പെടുത്തിയെന്നും ജല മലിനീകരണം ഒഴിവാക്കാന് സ്വീവേജ് വാട്ടര് ട്രീറ്റ്മെന്റ് പ്ലാന്റ് തുറന്നെന്നും മുഖ്യമന്ത്രി യോഗത്തില് വിശദീകരിച്ചു. ജസ്റ്റിസ് സിരിജഗന്റെ നേതൃത്വത്തില് ഉന്നതാധികാര സമിതി ശബരിമലയില് വിവിധ നടപടികള് സ്വീകരിക്കുന്നതായും അദ്ദേഹം വിശദീകരിച്ചു.
ദേശീയ തീര്ഥാടന കേന്ദ്ര നിലവാരത്തിലേക്ക് ഉയര്ത്തുന്നതിന് ശബരിമല മാസ്റ്റര് പ്ലാന് പ്രകാരമുള്ള നടപടികളില് മിക്കതും പൂര്ത്തിയായിട്ടുണ്ട്. ബാക്കിയുള്ള അതിവേഗം പൂര്ത്തിയാകുകയാണ്. പമ്പയില് വസ്ത്രങ്ങള് ഉപേക്ഷിക്കുന്നത് ഒഴിവാക്കണമെന്ന് തീര്ഥാടകരെ കൃത്യമായി അറിയിക്കാനാകണം. ഇത്തരം നടപടി യാതൊരു ആചാരത്തിന്റെയും ഭാഗമല്ലെന്നും ഹൈക്കോടതി നിരോധിച്ചാതാണെന്നും മുഖ്യമന്ത്രി വിശദീകരിച്ചു.
കൃത്യമായ തിരിച്ചറിയല് കാര്ഡ് കരുതാന് തീര്ത്ഥാടകരോട് പറയണമെന്ന് മുഖ്യമന്ത്രി ആവശ്യപ്പെട്ടു. തീര്ഥാടകര്ക്ക് ബോധവത്കരണത്തിനായി തയ്യാറാക്കിയ വിവിധ ഭാഷകളിലെ വീഡിയോകള് കേരളം മറ്റ് സംസ്ഥാനങ്ങള്ക്ക് നല്കുമെന്നും മുഖ്യമന്ത്രി അറിയിച്ചു. ശബരിമലയിലേക്കുള്ള ഹൈവേകളില് എല്ലാ 50 കിലോമീറ്റര് ദുരത്തിനിടയ്ക്കും തീര്ഥാടകര്ക്കായി ഇടത്താവളങ്ങള് സംസ്ഥാന സര്ക്കാരും ഓയില് കമ്പനികളും ചേര്ന്ന് ഒരുക്കിയതായി ദേവസ്വം മന്ത്രി കടകംപള്ളി സുരേന്ദ്രന് പറഞ്ഞു.
അതേസമയം മണ്ഡല മകര വിളക്കിന് ശേഷം സ്വദേശി ദര്ശന് പദ്ധതി പ്രകാരം 106 കോടി രൂപയുടെ പദ്ധതികള് ശബരിമലയില് നടപ്പിലാക്കുമെന്ന് അല്ഫോണ്സ് കണ്ണന്താനം അറിയിച്ചു. ജനുവരി 15 കഴിയുന്നതോടെ വര്ക്ക് ഓര്ഡര് നല്കി ആറ് മാസത്തിനകം പണി പൂര്ത്തീകരിക്കാന് ശ്രമിക്കും. ശബരിമല സന്ദര്ശിച്ച ശേഷമാണ് അദ്ദേഹം ഇക്കാര്യം പറഞ്ഞത്. ദേശീയ തീര്ത്ഥാടന കേന്ദ്രമായി ശബരിമലയെ പ്രഖ്യാപിക്കാന് കേന്ദ്രത്തില് സമ്മര്ദ്ദം ചെലുത്തുമെന്നും അദ്ദേഹം പറഞ്ഞു.
തമിഴ്നാട്, തെലുങ്കാന, കര്ണാടക എന്നിവിടങ്ങളില് നിന്നുള്ള മുതിര്ന്ന സെക്രട്ടറിമാര് സംസ്ഥാനങ്ങളുടെ ആവശ്യങ്ങള് അവതരിപ്പിച്ചു. തങ്ങളുടെ സംസ്ഥാനങ്ങള്ക്ക് നല്കാനാവുന്ന സഹായങ്ങളും സഹകരണവും ഉണ്ടാകുമെന്നും അവര് വ്യക്തമാക്കി. സംസ്ഥാന സര്ക്കാരും തിരുവിതാംകൂര് ദേവസ്വം ബോര്ഡും തീര്ഥാടകര്ക്ക് സൗകര്യമൊരുക്കാന് ആവശ്യമായ നടപടികള് കൈക്കൊള്ളുമെന്ന് കേരളവും അറിയിച്ചു. 59 രാജ്യങ്ങളില് നിന്നാണ് ശബരിമലയിലെ കേരള പോലീസിന്റെ വിര്ച്വല് ക്യൂവിലേക്ക് രജിസ്ട്രേഷന് വരുന്നതെന്ന് ചടങ്ങില് സംസ്ഥാന പോലീസ് മേധാവി ലോക്നാഥ് ബെഹ്റ പറഞ്ഞു.
https://www.facebook.com/Malayalivartha
